བོད་ཀྱི་སྐད་ཡིག་འཇིག་ཉེན་དང་དེ་བཟློག་ཐབས།

༄༅།། ཐེངས་འདིའི༼གངས་ལྗོངས་གླེང་སྟེགས༽ཀྱི་སྐབས་སུ་བབ་པའི་བརྗོད་བྱ་ནི། བོད་ཀྱི་སྐད་ཡིག་གི་མདུན་དུ་ལྷགས་པའི་འཇིག་ཉེན་དང་དེ་བཟློག་ཐབས་སྐོར་ཡིན།
ཉེ་བའི་ལོ་ཤས་སྔོན་དུ། མཉམ་འབྲེལ་རྒྱལ་ཚོགས་ཀྱི་བཀོད་སྒྲིག་འོག་རྒྱལ་སྤྱིའི་སྐད་བརྡ་རིག་པ་བ་དང་། སྐད་ཡིག་ཆེད་མཁས་པ་མང་པོ་ལྷན་གཅིག་ཏུ་འཛོམས་ནས་སྐད་ཡིག་གི་ཆགས་འཇིག་ལ་གཞིགས་པའི་ལྷན་ཚོགས་ཤིག་བསྐོངས་པའི་ཐོག ཐུན་མོང་གིས་སྐད་ཡིག་ཅིག་འཇིག་རྒྱུར་ཉེན་ཁ་ཆེན་པོ་ལྔ་ཡོད་པར་ངོས་འཛིན་བྱས་ཡོད་པ་ལྟར། ང་ཚོ་བོད་ཀྱི་སྐད་དང་ཡི་གེ་ཉེན་ཁ་དེ་དག་ལ་ཐུག་ཡོད་མེད་ཐད་བོད་མི་རིག་བ་པ་གཉིས་དང་མཉམ་དུ་བགྲོ་གླེང་བྱེད་རྒྱུ་ཡིན།
གདན་ཞུ་སྐུ་མགྲོན་རྣམ་པ་གཉིས་ནི།
༡༽བཙན་བྱོལ་ཁྲོད་ཀྱི་བོད་ཡིག་གི་ཚགས་པར༼སྤྱི་ཚོགས་མེ་ལོང༽གསར་འཛུགས་གནང་མཁན་དང་། ༼སྤྱི་ཚོགས་མེ་ལོང༽གི་རྩོམ་སྒྲིག་པ་ཟུར་བ། བཙན་བྱོལ་བོད་མིའི་པེན་བོད་ཀྱི་རྩོམ་པ་པོའི་མཐུན་ཚོགས་གསར་འཛུགས་གནང་མཁན་དང་། པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོ་ཟུར་བ། རྩོམ་པ་པོ་དང་ཨེམ་ཆི་བླ་བྲང་སྐལ་བཟང་ལགས་ཡིན། ཁོང་ད་ལྟ་ཨུ་རུ་སུ་ན་ཡོད་པ་དང། གསོ་རིག་གི་ཕྱག་ལས་གནང་མུས་སུ་ཡོད་པ་རེད།
༢༽བཙན་བྱོལ་བོད་མིའི་སྒྲིག་འཛུགས་བདེ་སྲུང་ཉམས་ཞིབ་ལས་ཁང་གི་ཉམས་ཞིབ་པ་ཟུར་བ་དང་། རྩོམ་པ་པོ། བོད་དོན་ཉམས་ཞིབ་པ་ལྷ་སྡེ་གནམ་ལོ་ཡག་ལགས་ཡིན། ཁོང་ད་ལྟ་ཨོ་སི་ཊི་རེ་ལེ་ཡ་ན་ཉམས་ཞིབ་ཀྱི་ཕྱག་ལས་གནང་བཞིན་པ་རེད།