རྒྱ་ནག་གིས་ཁེ་ཎ་ཌའི་ནང་གི་བོད་དོན་ཚོགས་པའི་མི་སྣར་ཉེས་ཆད་བཀལ་བ་ནི་རྒྱལ་མཚམས་བརྒལ་ཏེ་དྲག་གནོན་གྱི་སྲིད་བྱུས་ལག་བསྟར་བྱེད་ཤུགས་ཆེ་རུ་བཏང་པར་སྲིད་སྐྱོང་མཆོག་གིས་ངོས་འཛིན་གནང་འདུག

• 2025-01-03

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ (X) སྤྱི་ཚོགས་དྲྭ་རྒྱའི་ཐོག རྒྱ་ནག་གིས་ཁེ་ན་ཌའི་བོད་དོན་ཚོགས་པའི་མི་སྣ་ ༥ ལ་རྒྱ་ནག་ནང་ཐོངས་མཆན་བཀག་སྡོམ་དང་། རྒྱ་ནག་ནང་ཡོད་པའི་རྒྱུ་དངོས་བཀག་སྡོམ་བྱེད་རྒྱུའི་ཉེས་ཆད་བཀལ་བ་དེ་ནི་རང་དབང་ལུང་པའི་ནང་གི་བོད་མིའི་འབོད་སྒྲར་འགོག་གནོན་དམ་དྲག་བྱས་པ་གསལ་པོ་ཡིན་ཞིང་། ཛ་དྲག་ཅན་གྱི་གནས་སྟངས་ཤིག་ཏུ་གྱུར་ཡོད་ཅེས་དང་། བོད་དོན་ཞུ་གཏུགས་བྱེད་མཁན་གྱི་ཚོགས་པ་ཞིག་ལ་བཙན་གནོན་གྱི་ཐབས་ལམ་འཛིན་པ་འདི་རྒྱལ་མཚམས་བརྒལ་ཏེ་གཞི་རྩའི་རང་དབང་དང་མང་གཙོའི་ལྟ་གྲུབ་ལ་འཇིགས་སྐུལ་བྱས་པའི་བྱ་སྤྱོད་ཤུགས་ཆེ་རུ་འགྲོ་བཞིན་ཡོད་པ་མཚོན་གྱི་ཡོད་ཅེས་གསུངས་འདུག

རྒྱ་ནག་གིས་བཀག་སྡོམ་གྱི་ཉེས་ཆད་བཀལ་བའི་ཁེ་ན་ཌའི་བོད་དོན་ཚོགས་པའི་མི་སྣ་ལྔ་ནི་ཚོགས་གཙོ་ལྷ་ལུང་པ་བསམ་འཕེལ་ལགས་དང་། ཚོགས་གཞོན་ (Luisa Durante) ལགས། ལག་བསྟར་འགན་འཛིན་ཤེས་རབ་མཐར་ཕྱིན་ལགས། ཚོགས་མི་ (Eliza Von Baeyer) ལགས་དང་སྤྱི་མང་འབྲེལ་མཐུད་འགན་འཁུར་བ་གཡུང་དྲུང་བསྟན་འཛིན་ལགས་བཅས་ཚུད་ཡོད་པ་རེད།
རྒྱ་ནག་གིས་ཁེ་ན་ཌའི་ནང་གི་བོད་དང་ཡུ་གུར་གྱི་ལས་དོན་ཚོགས་པ་དང་མི་སྣར་ཉེས་ཆད་བཀལ་པ་འདི་ནི་ཉེ་སྔོན་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་ཁེ་ན་ཌ་གཞུང་གིས་ད་ལྟ་དང་དེ་སྔ་ཤིན་ཅང་དང་བོད་ནང་གི་རྒྱ་ནག་དམར་ཤོག་ཚོགས་པའི་དཔོན་རིགས་བྱེད་མྱོང་མཁན་ ཁྲན་ཆོན་ཀོ་དང་ད་ལྟ་ལྐོག་ཟ་རུལ་སུངས་ཐོག་ལས་གནས་ནས་ཕྱིར་ཕུད་བཏང་བའི་ ཝུ་ཡིན་ཇི་ སོགས་དཔོན་རིགས་ཁག་ཅིག་གི་ཁེ་ན་ཌའི་ནང་གི་རྒྱུ་དངོས་བཀག་སྡོམ་དང་ཁེ་ན་ཌའི་ནང་ཡོང་མི་ཆོག་པའི་ཐོངས་མཆན་བཀག་སྡོམ་གྱི་བཀའ་རྒྱ་བཏང་བ་དེར་འཁོན་ལན་སློག་པ་ཡིན་པ་གནད་དོན་དབྱེ་ཞིབ་པ་དང་འབྲེལ་ཡོད་མི་སྣས་ངོས་འཛིན་བྱེད་བཞིན་འདུག
དེ་འབྲེལ་བོད་མི་མང་སྤྱི་འཐུས་ལྷན་ཚོགས་ཀྱིས་རྒྱ་ནག་གཞུང་ལ་ངོ་རྒོལ་གྱི་གསར་འགོད་གསལ་བསྒྲགས་ཤིག་སྤེལ་བའི་ནང་། ང་ཚོས་རྒྱ་ནག་གཞུང་གིས་ཚོགས་པ་དང་མི་སྒེར་དེ་དག་ལ་ཉེས་ཆད་བཀལ་བའི་ཐག་གཅོད་ལ་མཐའ་ཅིག་ཏུ་ངོ་རྒོལ་ཡོད། ལྷག་པར་རྒྱ་ནག་གཞུང་གིས་རྒྱལ་མཚམས་ལས་བརྒལ་ནས་དྲག་གནོན་བྱེད་བཞིན་པའི་བྱ་སྤྱོད་རྣམས་འཕྲལ་དུ་མཚམས་འཇོག་བྱ་དགོས་པའི་འབོད་སྐུལ་ཞུ་བཞིན་ཡོད་ལ། རྒྱ་ནག་རྒྱལ་ཁབ་ཀྱི་ཕྱི་ནང་དུ་འགྲོ་བ་མིའི་ཐོབ་ཐང་གི་ཆེད་དུ་བློ་ཁོག་ཆེན་པོས་འབོད་སྒྲ་སྒྲོག་མཁན་ཚོར་འཇིགས་སྐུལ་བྱེད་པའི་བྱ་སྤྱོད་འདི་རིགས་དང་གནོད་འཚེ་གཏོང་རྒྱུ་མཚམས་འཇོག་བྱ་དགོས་ཞེས་དང་། ཁེ་ཎ་ཌའི་བོད་དོན་ཚོགས་པ་དང་ཡུ་གུར་འགྲོ་བ་མིའི་ཐོབ་ཐང་རྩོད་ལེན་ཚོགས་པའི་ལས་གཞི་བཅས་ཀྱིས། རྒྱ་ནག་གཞུང་གིས་ལག་བསྟར་བྱེད་བཞིན་པའི་གདུག་རྩུབ་དང་མནར་གཅོད། འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེན་གཏོང་བཞིན་པའི་གནས་སྟངས་ཐེར་འདོན་གནང་བའི་བློ་སྟོབས་ལ་ཐུགས་རྗེ་ཆེ་ཞུ་རྒྱུ་ཡིན་ཞེས་འཁོད་འདུག།

གསར་འགོད་པ། བཀྲ་ཤིས་དབང་ཕྱུག
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་སྤེལ་མཁན། ཀླུ་འབུམ།