ཁེ་ན་ཌ་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྒྱ་ནག་གི་དཔོན་རིགས་ཁག་ཅིག་ལ་ཉེས་ཆད་བཀལ་འདུག

* གནས་ཚུལ་ཁ་སྣོན་བྱས་ཡོད།

དེ་ཡང་(Global Affairs Canada) ཞེས་ཁེ་ན་ཌ་ཕྱི་སྲིད་ལས་ཁུངས་ཀྱིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དམིགས་བསལ་དཔལ་འབྱོར་ཐབས་ཇུས་སྒྲིག་གཞིའི་འོག རྒྱ་ནག་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེན་བཏང་བའི་མཐོ་རིམ་དཔོན་རིགས་ཟུར་བ་དང་། ད་ལྟའི་མཐོ་རིམ་དཔོན་རིགས་བཅས་མི་སྣ་བརྒྱད་ལ་བཀག་སྡོམ་ཉེས་ཆད་བཀལ་ཡོད་པ་འདི་ཚེས་༡༠ཉིན་ཁེ་ན་ཌའི་ཕྱི་སྲིད་བློན་ཆེན་ལྕམ་(Mélanie Joly)་ཡིས་གསལ་བསྒྲགས་གནང་འདུག
རེས་གཟའ་མིག་དམར་ཉིན་ཕྱི་བསྒྲགས་གནང་བའི་བཀག་སྡོམ་ཉེས་ཆད་དེ་ནི་རྒྱ་ནག་གཞུང་གི་འགོ་ཁྲིད་ཚོས་བོད་དང་ཤིན་ཅང་སོགས་གྲངས་ཉུང་མི་རིགས་གཞན་དག་དང་། དེ་བཞིན་ཧྥ་ལུང་ཀུང་རྩ་རླུང་སྒོམ་སྒྲུབ་ཉམས་ལེན་བྱེད་མཁན་བཅས་ཀྱི་འགྲོ་བ་མིའི་ཐོབ་ཐང་དང་ཆོས་ལུགས་དད་མོས་ཐོག་དྲག་གནོན་བྱེད་བཞིན་པར་ཁ་གཏད་རྒོལ་ལན་སྤྲོད་ཆེད་ཡིན་ཞེས་ཁོང་གིས་གསལ་བསྒྲགས་གནང་འདུག
ཡང་ཁེ་ན་ཌའི་ཕྱི་སྲིད་བློན་ཆེན་ཁོང་གིས་མུ་མཐུད་དུ། ང་ཚོས་ཕྱི་ཟླ་༡༢ ཚེས་༡༠ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་སྲུང་བརྩི་ཞུ་བཞིན་པའི་སྐབས། ཁེ་ན་ཌས་མུ་མཐུད་དུ་འཛམ་གླིང་ཁྱོན་ཡོངས་སུ་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་ལ་སྐྱོན་བརྗོད་བྱེད་ཀྱི་ཡོད། ཕྱི་ལོ་༢༠༡༧ ལོ་ནས་བཟུང་རྒྱ་ནག་གཞུང་གིས་ཤིན་ཅང་ནང་ཡུ་གུར་བ་ས་ཡ་གཅིག་ལྷག་གང་བྱུང་འཛིན་བཟུང་བཀག་ཉར་བྱས་པའི་ཁྲོད་མི་ཁ་ཤས་ལ་ལུས་སེམས་གཉིས་ཀར་དཀའ་ངལ་དང་། བཙན་གཡེམ་བཅས་ཀྱི་གནོད་འཚེ་ཕོག་པའི་གནས་ཚུལ་བྱུང་པར་ཁེ་ན་ཌ་ཡིས་སེམས་ཁྲལ་ཆེན་པོ་བྱེད་བཞིན་ཡོད་ཞེས་དང་། ཡང་ཕྱི་སྲིད་བློན་ཆེན་ལྕམ་(Mélanie Joly)་ཡིས་མུ་མཐུད་དུ། རྒྱ་ནག་གཞུང་གིས་བོད་མི་ཚོའི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པའི་ཁྲོད་དུ་བཙན་ཤེད་ཀྱིས་ངལ་རྩོལ་དུ་བཀོལ་བ་དང་། གང་འདོད་དུ་འཛིན་བཟུང་བཀག་ཉར་བྱེད་པ། བོད་མིའི་ཆོས་ལུགས་དད་མོས་དང་འགྲོ་སྐྱོད་རང་དབང་། སྤྱི་ཚོགས་འབྲེལ་འདྲིས་ཀྱི་རང་དབང་བཅས་ལ་བཀག་སྡོམ་བྱེད་བཞིན་ཡོད་སྐོར་ཐེར་འདོན་གནང་འདུག
ཕྱི་སྲིད་བློན་ཆེན་ཁོང་གིས་ཁེ་ན་ཌས་མུ་མཐུད་དུ་རྒྱ་ནག་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་སེམས་ཚབས་བྱེད་བཞིན་ཡོད་ལ། རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཚུད་པའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་འགན་འཁྲི་སྒྲུབ་དགོས་པའི་འབོད་སྐུལ་ཞུ་བཞིན་ཡོད་ཅེས་སྐུལ་འདེད་ཀྱང་གནང་ཡོད་པ་རེད།
གོང་ཞུས་ཉེས་ཆད་བཀེལ་སའི་རྒྱ་ནག་གི་དཔོན་རིགས་བརྒྱད་ཀྱི་མིང་བཏོན་ཡོད་པའི་ཁོངས་སུ། དེ་སྔ་ཤིན་ཅང་མངའ་ཁུལ་གྱི་དམར་ཤོག་ཚོགས་པའི་དྲུང་ཆེ་བྱས་མྱོང་མཁན་(Chen Quanguo)་དང་། བོད་ནང་རྒྱ་ནག་དམར་ཤོག་ཚོགས་པའི་དྲུང་ཆེ་གནངམྱོང་མཁན་(Wu Yingjie)་གཉིས་ཡོད་པ་རེད།
རྒྱ་ནག་གི་གསར་ལམ་ཁག་ནང་(Wu Yingjie)་དང་འབྲེལ་བའི་གནས་ཚུལ་ཐོན་པ་ལྟར་ན། སྤྱི་ཟླ་༡༢ ཚེས་༡༡ཉིན། རྒྱ་ནག་གཞུང་གིས་བཅད་བགོས་བྱས་པའི་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཟུར་བ་ཝུའུ་དབྱིང་ཇེ་(Wu Yingjie)་ཟེར་བར། འདི་ལོའི་ཕྱི་ཟླ་༦་པ་ནས་བཟུང་ཞིབ་བཤེར་བྱེད་བཞིན་པ་ལྟར། ཐེངས་འདིར་ཁོས་དམར་ཤོག་ཚོགས་པར་དད་སེམས་ཉམས་པ་དང་དམར་ཤོག་གི་རྩ་དོན་ཤོར་བ། ཕུགས་བསམ་ཉམས་པ་དང་བོད་རང་སྐྱོང་ལྗོངས་ཀྱི་དམར་ཤོག་གི་ཆབ་སྲིད་ཁོར་ཡུག་ལ་གཏོར་སྐྱོན་བཟོས་པ་སོགས་ཀྱི་ཉེས་མིང་འོག་ཝུའུ་དབྱིང་ཇེ་རྒྱ་ནག་དམར་ཤོག་ཚོགས་པའི་སྐྱིད་སྡུག་དང་ལས་གནས་ནས་ཕྱིར་ཕུད་བཏང་ཡོད་པ་བསྒྲགས་འདུག
ད་རེས་ཁེ་ན་ཌའི་ཕྱི་སྲིད་ལས་ཁུངས་ནས་རྒྱ་ནག་གི་དཔོན་རིགས་ཁག་ཅིག་ལ་དཔལ་འབྱོར་གྱི་ཉེས་ཆད་བཀེལ་བའི་ནང་། ཁེ་ན་ཌའི་ནང་གི་ཁོང་ཚོའི་དངུལ་དངོས་ཐོག་སྟངས་འཛིན་དང་ཁང་པ་རིགས་ཉོ་ཚོང་བྱེད་མི་ཆོག་པའི་དམ་དྲག་གནང་རྒྱུ་ཡིན་འདུག
དེའི་ཐད་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་མའོ་ནིང་གིས་འཆར་ཅན་གསར་འགོད་ལྷན་ཚོགས་ཐོག ཁེ་ན་ཌའི་ཕྱི་སྲིད་ལྷན་ཁང་གིས་ཉེས་ཆད་འགེལ་བའི་གནད་དོན་ཐད། ང་ཚོར་སྐྱོན་བརྗོད་བྱེད་རྒྱུའི་ཚབ་ཏུ་ཁེ་ན་ཌ་རང་ཉིད་ཀྱི་འགྲོ་བ་མིའི་ཐོབ་ཐང་ཞན་པོ་དང་དཀའ་ངལ་ཡོད་པ་དེ་དག་ཡོ་བསྲང་བྱེད་དགོས་ཀྱི་རེད། རྒྱ་ནག་གི་ནང་སྲིད་ལ་ཐེ་བྱུས་བྱེད་རྒྱུ་མཚམས་འཇོག་བྱེད་དགོས་ཅེས་བརྗོད་འདུག
སྤྱིར་བཏང་འདས་པའི་དུས་ཡུན་གང་མཚམས་ཞིག་ནས་བཟུང་ཁེ་ན་ཌ་དང་རྒྱ་ནག་གཉིས་བར་གྱི་འབྲེལ་བ་ཇེ་སྡུག་ཏུ་ཕྱིན་ཡོད་པ་རེད།

གསར་འགོད་པ། རྡོ་རྗེ་མཚོ། རིག་འཛིན་ཆོས་སྒྲོན། བདེ་ཆེན་དབང་མོ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།