རྒྱ་གར་ལྷོ་ཕྱོགས་སུ་མི་གྲངས་༡༢༥འདས་གྲོངས་སུ་གྱུར་ཡོད་པ།

༄༅༎རྒྱ་གར་ལྷོ་ཕྱོགས་སུ་ཡོད་པའི་མངའ་སྡེ་གཉིས་ཀྱི་ནང་ཆུ་ལོག་གིས་རྐྱེན་པས་ད་བར་མི་གྲངས་བརྒྱ་དང་ཉི་ཤུ་ཙམ་གྱི་ཚེ་སྲོག་ཤོར་ཡོད་འདུག དེ་ཡང་རྒྱ་གར་གྱི་ལྷོ་ཕྱོགས་མངའ་སྡེ་ཀར་ན་ཊ་ཀ་དང་ཨན་རྡ་ར་པཱར་རྡེཤ་གཉིས་ཀྱི་ནང་འདས་པའི་ཉིན་གྲངས་གསུམ་རིང་ཆར་པ་རྒྱུན་ཆད་མེད་པ་བབས་པས་རྐྱེན་གྱིས་མང་ཚོགས་ཀྱི་ཁང་ཁྱིམ་ཉིས་ཁྲི་ཉིས་སྟོང་ཙམ་ཞིག་རྡིབ་སྐྱོན་དུ་སོང་བ་དང་ཡང་ན་གཙང་ཆུ་རྒྱས་པ་སོགས་བྱུང་བའི་ནང་ད་བར་མི་གྲངས་༡༢༥འདས་གྲོངས་སུ་གྱུར་ཡོད་པ་མ་ཟད་འགྲུལ་བསྐྱོད་གཞུང་ལམ་དང་ཞིང་ཁའི་སྟོན་འབྲས་སོགས་ལ་གནོད་སྐྱོན་ཚབས་ཆེ་བཟོས་ཡོད་པར་ད་ཆ་ཡུལ་དེའི་ས་གནས་དང་དབུས་གཞུང་གཉིས་ཀས་ངལ་སེལ་གྱི་རོགས་སྐྱོབ་ལས་དོན་ཛ་དྲག་ངང་སྤེལ་བཞིན་ཡོད་པའི་གནས་ཚུལ་ཐོན་འདུག།