རྒྱ་གར་གཞུང་གི་བློན་ཆེན་ཟུར་པ་དང་རྒྱ་གར་གྱི་ Rashtriya Lok Dal སྲིད་དོན་ཚོགས་པའི་དབུ་ཁྲིད་སྐུ་ཞབས་Ajit Singh མཆོག་སྐུ་ཚེའི་འཕེན་པ་རྫོགས་པ།

དེ་ཡང་བོད་མི་མང་སྤྱི་འཐུས་ཚོགས་གཞོན་མཆོག་གིས་ཐུགས་གསོའི་ཕྱག་བྲིས་ཀྱི་ནང་Ajit Singhདམ་པ་ཁོང་ནས་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་གནང་སྟེ་སྔ་ཕྱིས་བར་གསུམ་དུ་བོད་ཀྱི་རྩ་དོན་ལ་རྒྱབ་སྐྱོར་གང་ཆེ་གནང་བར་རྗེས་དྲན་ཞུས་བཞིན། ཁོང་གི་ཁྱིམ་ཚང་ནས་བོད་ཀྱི་བདེན་པའི་འཐབ་རྩོད་ལ་ད་བར་རྒྱབ་སྐྱོར་རྒྱུན་ཆད་མེད་པར་གནང་བར་བོད་མི་ཚོས་བཀྲིན་རྗེས་དྲན་ཞུ་ཡི་ཡོད་པ་བཀོད་ཡོད་པ་རེད།

སྐུ་ཞབས་Ajit Singhདམ་པ་ཁོང་ནས་དེ་སྔ་སྲིད་བློན་Vajpayeeདམ་པ་ཁོང་གི་མནའ་འབྲེལ་སྲིད་གཞུང་ནང་བློན་ཆེན་གནང་ཡོད་པ་དང་།

ཁོང་གི་ཡབ་Chaudhary Charan Singh མཆོག་ནས་རྒྱ་གར་གྱི་སྲིད་བློན་གནང་ཡོད་པ་རེད། སྤྱི་འཐུས་ཚོགས་གཞོན་མཆོག་གིས་སྲིད་བློན་ཟུར་པ་Chaudhary Charan Singh མཆོག་དང་དེའི་རྗེས། Ajit Singh མཆོག་ནས་ཕ་དམ་པའི་ལས་དོན་མཇུག་སྐྱོང་གིས་བོད་མིའི་རྩ་དོན་མདུན་བསྐྱོད་ཀྱི་ཐད་སློབ་སྟོན་གྱི་མཚོན་གང་ཅིའི་རོགས་སྐྱོར་གནང་ཡོད་པས་བཀྲིན་ཆེན་པོ་ཡིན་ཞེས་བཀོད་ཡོད་པ་རེད།

Rashtriya Lok Dal སྲིད་དོན་ཚོགས་པའི་དབུ་ཁྲིད་སྐུ་ཞབས་Ajit Singh མཆོག་ཕྱི་ཟླ་༤པའི་ཚེས་༢༠ཉིན་ཏོག་དབྱིབས་ནད་ཡམས་ཕོག་སྟེ་སྨན་བཏུགས་གནང་ཀྱང་དྲག་སྐྱེད་མ་བྱུང་བར་ཕྱི་ཟླ་༥པའི་ཚེས་༦རེས་གཟའ་ཕུར་བུའི་ཉིན་སྐུ་ཆེའི་འཕེན་པ་རྫོགས་ཡོད་པ་དང་།སྐབས་དེར་ཁོང་དགུང་གྲངས་༨༢་ལ་ཕེབས་ཡོད་པ་རེད།།