ເຂດແຜ່ນດິນໄຫວແມ່ນຈຸດ ໃກ້ເສັ້ນອັນຕຣາຍ

ເຫຕກາຣ ແຜ່ນດິນໄຫວ ຢູ່ແຂວງ ໄຊຍະບູຣີ ໃນມື້ວັນພຸທ ທີ່ຜ່ານມານັ້ນ ຍິ່ງເຮັດໃຫ້ ນັກສັງເກດກາຣ ມີຄວາມເປັນຫ່ວງ ນໍາໂຄງກາຣ ທີ່ຣັຖບາລ ສປປລາວ ຈະສ້າງເຂື່ອນ ພລັງນ້ຳ ໃສ່ແມ່ນ້ຳຂອງ ໃນເຂຕແຂວງ ໄຊຍະບູຣີ.

ໜັງສືພີມ ວຽງຈັນໄທມສ໌ ຣາຍງານວ່າ ເຖິງແມ່ນຄວາມແຮງ ຂອງແຜ່ນດິນໄຫວ ຈາກກາຣຄາດເຄື່ອນ ຫລືຊັ້ນຫີນ ໃນພື້ນດິນຫັກ ທີ່ວັດແທກໄດ້ແຕ່ 4.7 ຕາມເຄື່ອງວັດແທກ ຣິຄເຕີ໊ຣ໌ (Richter) ແຕ່ກໍບໍ່ມີ ຣາຍງານ ຄວາມເສັຽຫາຍ ແຕ່ຢ່າງໃດ, ແຕ່ກໍມີຄວາມ ສັ່ນສະເທືອນ ໄປຮອດຕົວ ນະຄອນຫລວງ ວຽງຈັນ ທີ່ຢູ່ຫ່າງໄກ ຈາກບ່ອນເກີດເຫຕ ເຖິງ 140 ກິໂລແມ໊ຕ ຊຶ່ງເຮັດໃຫ້ ນັກວິຊາກາຣ ແລະ ນັກທໍຣິນີສາຕ ມີຄວາມເປັນຫ່ວງ ນຳໂຄງກາຣສ້າງເຂື່ອນ ໄຊຍະບູຣິ ຂອງຣັຖບາລລາວ ນັ້ນນຳດ້ວຍ.

ຍານາງເປຣມຣູດີ ດາວເຮືອງ ຜູ້ອຳນວຍກາຣ ຂອງອົງກາຣແນວຮ່ວມ ແລະ ຟື້ນຟູ ສະພາບແວດລ້ອມ ຫລື TERRA ຂອງໄທຽໄດ້ກ່າວວ່າ ບໍຣິເວນ ທີ່ຈະມີກາຣ ກໍ່ສ້າງເຂື່ອນ ໃສ່ແມ່ນ້ຳຂອງ ໃນໄຊຍະບູຣີ ດັ່ງກ່າວ ຢູ່ໃກ້ກັບເສັ້ນ ຊັ້ນຫີນທີ່ຄາດເຄື່ອນ ເສັ້ນດຽວກັບ ທີ່ພົບເຫັນຢູ່ທາງ ພາຄເໜືອ ໃນປະເທສໄທຽ ແລະ ອາຈຈະມີກາຣ ແຕກຫັກຕື່ມອີກ ໃນອະນາຄົຕ ອັນໃກ້ກໍເປັນໄດ້.

ໃນປີ 2007 ຜ່ານມາ ກໍມີເຫຕກາຣ ແຜ່ນດິນໄຫວ ຢູ່ແຂວງບໍ່ແກ້ວ ທາງພາຄເໜືອຂອງລາວ ເຊັ່ນກັນ ທີ່ວັດແທກ ໄດ້ເຖິງ 6.1 ຣິຄເຕີ້ຣ໌ ທີ່ຍິ່ງເຮັດໃຫ້ ບັນດາ ນັກທໍຣະນີວິທຍາ ມີຄວາມເປັນຫ່ວງ ໂດຽ ສະເພາະທີ່ວ່າ ທາງກາຣລາວ ຍັງຈະມີໂຄງກາຣ ສ້າງເຂື່ອນຫລາຍແຫ່ງ ໃສ່ແມ່ນ້ຳຂອງ ດັ່ງກ່າວນີ້ນັ້ນ.