ເຂົ້ານາແຊງໃນເມືອງແມດ ບໍ່ໄດ້ຜົລຕາມຄາດໝາຍ

ທາງຝ່າຍການປົກຄອງ ເມືອງແມດໄດ້ ຊ່ວຍເຫລືອ ຊາວໄຮ່ຊາວນາ ໂດຍການສົ່ງເສີມ ໃຫ້ປູກພືດພັນ ລະດູແລ້ງ ແທນການປູກ ເຂົ້ານາແຊງ ເພື່ອບໍ່ໃຫ້ ຊາວກະສິກອນ ຂາດລາຍຮັບ. ເຈົ້າໜ້າທີ່ ຈາກຫ້ອງການ ກະສິກັມ ເມືອງແມດ ແຂວງວຽງຈັນ ໄດ້ເວົ້າວ່າ:

"ນາແຊງປີນີ ຕາມແຜນການ ຢາກໃຫ້ມັນໄດ້ 80 ເຮັກຕາ ແຕ່ເຮັດຕົວຈິງແທ້ ມັນໄດ້ 35 ເຮັກຕາ ຜ່ານການຜລິດຖືວ່າ ລະດູແລ້ງມັນ ຈະຫຍຸ້ງຍາກເຣື້ອງນ້ຳ ນ້ຳຢູ່ໃນ ທັມມະຊາດ ມັນຈະໜ້ອຍ ບໍ່ຄືຍາມຝົນ ມັນເປັນນາເຂດ ພູດອຍ".

ເຈົ້າໜ້າທີ່ ເວົ້າຕໍ່ໄປວ່າ ຍ້ອນລະບົບ ຊົລປະທານ ທີ່ໄດ້ຮັບຄວາມເສັຍຫາຍ ແລະ ຍັງບໍ່ໄດ້ຮັບການສ້ອມແປງ ໃນທຸກໆບ້ານ ຍ້ອນຂາດເຂີນ ງົບປະມານ ຈຶ່ງເຮັດໃຫ້ຜົນຜລິດ ເຂົ້ານາແຊງ ສຳລັບປີນີ້ ຕົກຕໍ່າຫລາຍກວ່າເຄິ່ງ ຂອງຄວາມຄາດໝາຍ ເຮັດໃຫ້ຊາວ ກະສິກອນໄດ້ຮັບ ຜົນກະທົບຢ່າງ ຮຸນແຮງ ຈົນວ່າອາດຈະບໍ່ມີ ເຂົ້າພຽງພໍ ສຳລັບ ລ້ຽງຄອບຄົວ. ດ້ວຍເຫດນີ້ ທາງຝ່າຍການ ປົກຄອງທ້ອງຖິ່ນ ຈຶ່ງໄດ້ຫາວິທີ ຊ່ວຍເຫລືອໂດຍ ການສົ່ງເສີມໃຫ້ ປູກພືດ ກະສິກັມຊນິດ ອື່ນແທນ. ເຈົ້າໜ້າທີ່ ອະທິບາຍວ່າ:

"ພວກເຮົາ ສິປູກນາແຊງ ມັນບໍ່ໄດ້ຜົນ ນ້ຳໝົດ ໝົດສະເພາະໃນຊ່ວງ ການເກັບກ່ຽວນີ ເຮົາຕ້ອງຫັນໄປປູກ ພືດລະດູແລ້ງ ກໍເລັ່ງໃສ່ປູກ ພືກດິນ ຫລາຍກວ່າໝູ່ ໃນປັດຈຸບັນນີ້".

ນອກຈາກນີ້ ທາງຝ່າຍປົກຄອງ ທ້ອງຖິ່ນເມືອງແມດ ຍັງໄດ້ສົ່ງ ພະນັກງານ ວິຊາການລົງໄປ ຊຸກຍູ້ ແລະແນະນຳ ວິທີໃນການຮັກສາ ເຂົ້ານາແຊງ ໃຫ້ຊາວກະສິກອນ ໄດ້ຮຽນຮູ້.