ຂ່າວໃນລາວ ເປັນລັກສນະທາງການ

ຕາມບົດຣາຍງານ ຂອງອົງການ ການສຶກສາ ວິທຍາສາດ ແລະ ວັທນະທັມ ຂອງ ສະຫະປະຊາຊາດ ຫລື ຢູແນສໂກ ທີ່ອອກ ເຜີຍແຜ່ ເມື່ອວັນທີ່ 3 ເດືອນພຶສພາ ທີ່ ບາງກອກ ປະເທດໄທ.

ບົດຣາຍງານ ແຈ້ງຣາຍ ລະອຽດ ວ່າ ນັກຂ່າວ ຢູ່ໃນເຂດອ່າງ ແມ່ນ້ຳຂອງ ໄດ້ຮັບການ ຂົ່ມຂູ່ຫລາຍ ໃນຣະຍະ ສອງສາມປີ ທີ່ຜ່ານມາ ເຊັ່ນຢູ່ໄທ ພະມ້າ ວຽດນາມ ແລະ ສປປລາວ, ໂດຍສະເພາະ ໃນລາວ ຣັຖບານ ເປັນຜູ້ ຜູກຂາດ ໃນການ ອອກຂ່າວ; ຂ່າວທຸກຢ່າງ ຕ້ອງຮັບໃຊ້ ຜົນປໂຍດ ຂອງພັກ ແລະຣັຖ. ການຂຽນຂ່າວ ແລະ ອອກຂ່າວ ສ່ວນຫລາຍ ເປັນການຂຽນ ທີ່ມີ ລັກສນະ ວິຊາການ ແລະ ກໍເປັນ ທາງການເກີນໄປ. ບໍ່ພຽງ ເທົ່ານັ້ນ ການອອກຂ່າວ ຍັງບໍ່ມີການ ທ້າທາຍ ບໍ່ເຈາະເລິກ ແລະ ກໍບໍ່ຕຳນິ ຕິຕຽນ ພັກ ຫລື ຣັຖບານ ເລີຍ. ເຖິງຢ່າງໃດ ກໍດີ ທາງຢູແນສໂກ ກໍເຫັນວ່າ ສື່ມວລຊົນ ຂອງລາວ ກໍໄດ້ມີຄວາມ ກ້າວໜ້າ ຂື້ນຫລາຍ ໃນຣະຍະ ສອງສາມປີ ທີ່ຜ່ານມາ.

ທ່ານ ວັນນະພອນ ສິດທິຣາຊ ຜູ້ສ້າງໜັງ ສາຣະຄະດີ ຢູ່ລາວ ກ່າວວ່າ ປັດຈຸບັນ ສປປລາວ ມີກົດໝາຍ ສື່ມວລຊົນ ແລ້ວ ຊຶ່ງອະນຸຍາດ ໃຫ້ ເອກກະຊົນ ມີສິດ ເປັນເຈົ້າຂອງ ສະຖານີ ໂທຣະທັດ ວິທຍຸ ແລະ ໜັງສືພິມ ໄດ້. ບໍ່ເທົ່ານັ້ນ ບໍຣິສັດ ເອກກະຊົນ ຍັງສາມາດ ຊື້ເວລາ ອອກຣາຍການ ທາງສະຖານີ ໂທຣະທັດ ແລະ ວິທຍຸແຫ່ງຊາດ ໄດ້.