ຫຼາຍໝູ່ບ້ານໃນໄທ ກໍາລັງແຫ້ງແລ້ງ

ທ່ານ ວິບູນ ສງວນພົງ ເອກອະທິບໍດີ ຫ້ອງການ ປ້ອງກັນ ພັຍພິບັດ ແຫ່ງຊາດ ຖແລງ ໃນມື້ວານ ນີ້ວ່າ ປະມານ ກວ່າ 21 ພັນບ້ານ ໃນເຂດ 37 ແຂວງຂອງໄທ ສ່ວນໃຫຍ່ ຈະເປັນແຂວງ ພາກເຫນືອ ພາກຕາເວັນ ອອກສ່ຽງເຫນືອ ແລະ ພາກກາງ ຂອງໄທ ຖືກປະກາດ ໃຫ້ເປັນພື້ນທີ່ ພັຍແຫ້ງແລ້ງ ໃນປີນີ້. ທ່ານວ່າ ປະຊາຊົນ ຜູ້ທີ່ໄດ້ຮັບ ຜົລກະທົບ ຈາກພັຍ ແຫ້ງແລ້ງ ສາມາດ ໂທຣະສັບ ຂໍຄວາມ ຊ່ອຍເຫລືອ ຈາກທາງການ ໄດ້ຕຣອດ ເວລາ.

ກົມຊົລປະທານ ແຫ່ງຊາດ ຖແລງວ່າ ເຂື່ອນນ້ຳໃຫຍ່ໆ ໃນປະເທດ ໃນປັດຈຸບັນ ມານ້ຳພຽງ ແຕ່ 44 ພັນ ແມັດກອ້ນ ແຕ່ໃນນັ້ນ ສາມາດໃຊ້ ສຳລັບ ການຊົລປະທານ ພຽງແຕ່ 30% ເຂື່ອນໄຟຟ້າ ເຊັ່ນເຂື່ອນ ຫ້ວຍນ້ອຍ ບຳຣຸງດັນ ທີ່ແຂວງ ພິສນຸໂລກ ມີນ້ຳພຽງແຕ່ 29 ສ່ວນຮ້ອຍ ເຂື່ອນປາສັກ ທີ່ແຂວງ ລົບບຸຣີ ມີນ້ຳພຽງແຕ່ 41 ສ່ວນຮ້ອຍ ເຂື່ອນຫ້ວຍຫລວງ ທີ່ແຂວງ ອຸດອນທານີ ມີນ້ຳປະມານ 27% ແລະ ເຂື່ອນ ລຳປາວ ທີ່ແຂວງ ກາຣະສີນ ມີນ້ຳພຽງແຕ່ 39% ແລະ ເຂື່ອນອື່ນໆ ໃນໄທ ກໍມີນ້ຳ ຫນ້ອຍກວ່າ ປົກກະຕິ ໃນປີນີ້ ບໍ່ພໍສຳລັບ ການຊົລປະທານ ແລະ ການປັ່ນໄຟຟ້າ.

ເຖິງຢ່າງໃດ ກໍຕາມ ຫ້ອງການ ຊົລປະທານ ກໍໄດ້ແຈກ ຈັກປ້ຳນ້ຳ ໃຫ້ແກ່ຊາວ ຊາວກະສີກອນ ໃນພື້ນທີ່ ທີ່ຂາດນ້ຳ ສຳລັບ ການກະເສດ ແຕ່ກໍຍັງ ບໍ່ທົ່ວເຖີງ.