ລາວແລະວຽດນາມ ຮ່ວມມືຢ່າງເລິກເຊິ່ງ

ທ່ານ ຈູມມະລີ ໄຊຍະສອນ ປະທານ ປະເທດ ສປປລາວ ຊຶ່ງຫາ ກໍໄດ້ຮັບ ຕຳແໜ່ງໃໝ່ໆ ຕື່ມອີກ ສມັຍນຶ່ງ ຈະໄປຢ້ຽມຢາມ ວຽດນາມ ໃນວັນທີ່ 8 ຈົນເຖິງ ວັນທີ່ 10 ເດືອນ ສິງຫາ ນີ້. ປະທານ ປະເທດລາວ ຈະຫາລື ກັບ ທ່ານ ຫງຽນຟູຈ່ອງ ຊຶ່ງ ຖືກເລືອກ ໃຫ້ເປັນ ປະທານ ປະເທດ ວຽດນາມ ຜູ້ໃໝ່ ເມື່ອຕົ້ນ ສັປດານີ້. ຜູ້ນຳທັງສອງ ຈະຫາລືກັນ ກ່ຽວກັບ ການປັບປຸງ ຄວາມສຳພັນ ທີ່ພິເສດ ຢູ່ແລ້ວນັ້ນ ໃຫ້ຍິ່ງ ພິເສດ ຂື້ນ.

ອົງການຂ່າວ ສານ ທາງການ ຂອງ ວຽດນາມ Vietnam news brief ຣາຍງານ ວ່າ ວຽດນາມ ໃຫ້ການ ຊ່ວຍເຫລືອ ໃນທຸກດ້ານ ແກ່ ສປປລາວ ເຊັ່ນໄດ້ຝຶກ ອົບຣົມ ເຈົ້າໜ້າທີ່ ລາວ ຮັບເອົາ ນັກສຶກສາ ລາວ ໄປຮຽນຕໍ່ ແລະ ໄດ້ເຂົ້າມາ ລົງທຶນ ໃນລາວ ຫລາຍ ຂແນງການ; ແຕ່ ໃນຂນະດຽວກັນ ອົງການ ສືບສວນ ສະພາບ ແວດລ້ອມ ຂອງອັງກິດ ຣາຍງານວ່າ ກອງທັບ ວຽດນາມ ເປັນຜູ້ ຕັດໄມ້ ຢູ່ລາວ ແລະສົ່ງອອກ ໄປ ວຽດນາມ ເພື່ອ ຜລິດເຟີນີເຈີ ຈົນວຽດນາມ ກາຍເປັນ ປະເທດນຶ່ງ ທີ່ສົ່ງ ເຟີນີເຈີ ອອກຕ່າງ ປະເທດຫລາຍ ທີ່ສຸດ ໃນໂລກ. ແຕ່ໃນ ຣະຍະ 7-8 ປີທີ່ຜ່ານມາ ວຽດນາມ ມີຄູ່ແຂ່ງ ໃນການມີ ອິດທິພົນ ຢູ່ລາວ ຄູ່ແຂງນັ້ນ ກໍແມ່ນ ຈີນ.

ນັບແຕ່ປີ 2004 ເປັນຕົ້ນມາ ຈີນ ໄດ້ໃຫ້ການ ຊ່ວຍເຫລືອ ແລະ ເຂົ້າມາ ລົງທຶນ ຢູ່ສປປລາວ ຫລາຍຂື້ນ ເຊັ່ນໄດ້ຊ່ວຍ ສ້າງສນາມ ກິລາ ແຫ່ງຊາດ ໃໝ່ຢູ່ ນະຄອນຫລວງ ວຽງຈັນ ເພື່ອໃຊ້ ໃນການ ແຂ່ງຂັນ ກິລາ ຊີເກມ ປູກຢາງ ພາຣາ ແລະ ຂຸດຄົ້ນ ບໍ່ແຮ່ ຢູ່ ທາງພາກເໜືອ ຂອງລາວ. ສິ່ງທີ່ ວຽດນາມ ແລະ ຈີນ ແຕກຕ່າງກັນ ວຽດນາມ ຂັດຄ້ານ ການສ້າງເຂື່ອນ ໄຊຍະບຸຣີ ຂອງລາວ ແຕ່ ຈີນ ສນັບສນູນ.