ຊາວລາວຕ້ອງເຫັນດີ ນໍາແຜນພັທນາຂອງຣັຖ

ຣັຖບານ ສປປລາວ ໄດ້ ອະນຸມັດ ໃຫ້ ສໍາປະທານ ພື້ນທີ່ດິນ ເພື່ອພັທນາ ເປັນເຂດ ເສຖກິດ ພິເສດ ແລະເຂດ ເສຖກິດ ສະເພາະ ເພື່ອພັທນາ ປະເທດ ສ່ວນຫຼາຍ ການໃຫ້ ສໍາປະທານ ທີ່ດິນ ກໍກວມເອົາ ທີ່ດິນ ຂອງ ປະຊາຊົນ ຈຶ່ງເກີດ ການຂັດແຍ່ງ ແຕ່ກໍບໍ່ ສາມາດ ຂັດຂືນຕໍ່ວ່າ ຣັຖບານ ໄດ້ແຕ່ຢ່າງໃດ: ດັ່ງຄົນລາວ ຜູ້ນຶ່ງ ໃນແຂວງ ຈໍາປາສັກ ໄດ້ໃຫ້ຂໍ້ ຄິດເຫັນ ສ່ວນຕົວວ່າ:

"ຖ້າໄປຖືກ ເປັນຂອງ ປະຊາຊົນ ກະຊິບໍ່ດີ ມັນກໍບໍ່ດີ ບັງຄັບ ປະຊາຊົນ ເພາະວ່າ ບາງເທື່ອ ມັນກໍໄປ ແຕະຕ້ອງ ຂະເຈົ້າ ແຕ່ວ່າເວົ້າ ບໍ່ໄດ້ ມັນຣັຖບານ ອະນຸຍາດ ໃຫ້ແລ້ວ ປະຊາຊົນ ມັນເວົ້າຫຍັງ ບໍ່ໄດ້ ບ້ານເມືອງ ລາວເຮົາ ນີ້ໜາ ຣັຖບານລາວ ເວົ້າແລ້ວໆ ແຕ່ມັນຖືກໃຈ ຫລືບໍ່ຖືກ ມັນກໍບໍ່ຮູ້ ແນວໃດ".

ຊາຍຜູ້ນີ້ ເວົ້າອີກວ່າ ຣັຖບານ ໄດ້ອະນຸມັດ ພື້ນທີ່ດິນ ໃຫ້ນັກລົງທຶນ ຕ່າງຊາດ ຈໍານວນຫລາຍ ແລະ ປະຊາຊົນ ຕ້ອງໄດ້ ໂຍກຍ້າຍ ຈາກພື້ນທີ່ດິນ ຂອງຕົນ ໂດຍບໍ່ໄດ້ຮັບ ຄ່າຕອບແທນ ທີ່ສົມຄວນ ແຕ່ກໍບໍ່ ສາມາດ ຕໍ່ວ່າ ຮຽກຮ້ອງ ຫລືແມ່ນແຕ່ ອອກຄວາມຄິດເຫັນ ຫຍັງໄດ້ເລີຍ.

ສ່ວນຄົນລາວ ຜູ້ນຶ່ງ ໃນ ນະຄອນຫລວງ ວຽງຈັນ ມີຄວາມ ດີອົກດີໃຈ ເຫັນພ້ອມກັບ ການພັທນາ ເຂດເສຖກິດ ພິເສດ ໃນລາວ ຊື່ງຈະເຮັດ ໃຫ້ສປປລາວ ຈະເຣີນຮຸ່ງເຮືອງ ໃນພາຍພາກໜ້າ. ຄົນລາວຜູ້ນີ້ ເວົ້າວ່າ:

"ໃນນາມສ່ວນໂຕ ທີ່ເປັນຄົນລາວ ກໍດີ ເຂດເສຖກິດ ເພາະວ່າ ປະເທດລາວ ຕ້ອງການ ການພັທນາ ຕົວຢ່າງສໍາລັບ ປະເທດລາວ ບໍ່ມີການ ພັທນາແລ້ວ ປະເທດລາວ ກໍຈະທຸກຍາກ ຕລອດ ຕ້ອງມີຄວາມ ຈໍາເປັນ ໃນການພັທນາ".

ສປປ ລາວ ມີເຂດ ເສຖກິດພິເສດ 6 ແຫ່ງ ຄື: ສວັນ-ເຊໂນ ບໍ່ເຕັນແດນຄໍາ ສາມຫລ່ຽມຄໍາ ບໍ່ແກ້ວ ແລະໃນອີກ 10 ປີ ຣັຖບານ ມີແຜນການ ຈະສ້າງເຂດ ເສຖກິດພິເສດ ທັງໝົດ 41 ແຫ່ງ.