ແຮງງານລາວ ໃນປະເທສໄທຽ

ກາຣພິສູຕ ສັນຊາຕ ພວກແຮງງານ ຊາວລາວໃນໄທຽ ຈະເຣີ່ມປະຕິບັຕ ໃນເດືອນມີຖຸນາ ທີ່ຈະມາເຖິງນີ້ ຊຶ່ງຄາດວ່າ ຈະມີຄົນງານ ຊາວລາວ ໄປຍື່ນເອກກະສາຣ ຂໍພິສູຕສັນຊາຕ  ແລະ ຕໍ່ໃບອະນຸຍາຕ ເຮັດວຽກງານຢູ່ ປະເທສໄທຽໄດ້ ຕໍ່ໄປຕື່ມອີກ ບໍ່ຕໍ່າກວ່າ ໜຶ່ງແສນຄົນ ໂດຽໃຫ້ແລ້ວສຳເຣັຈ ພາຍໃນ 6 ເດືອນ ແລະ ສ່ວນພວກທີ່ບໍ່ ຜ່ານກາຣພິສູຕສັນຊາຕ ກໍອາຈໄດ້ຮັບ ຄວາມກົດດັນ ຈັດສົ່ງກັບຄືນ ບ້ານເດີມ ດັ່ງທ່ານທະນິຊ ຫນຸ່ມນ້ອຍ ຜູ້ອຳນວຍກາຣ ສຳນັກບໍຣິຫາຣ ແຮງງານ ຕ່າງດ້າວຂອງໄທຽ ໄດ້ກ່າວວ່າ:

“ເຂົາແຈ້ງມາແລ້ວ ຢືນຢັນວ່າ ຈະມາ ມີຖຸນາ ແນ່ນອນ ຂອງລາວນີ້ ພໍເຂົ້າມາແລ້ວ ເຂົາຈະມີກາຣ ປະຈຳ ຢູ່ບາງກອກ ແລ້ວກໍຈະມີ Mobile ອອກໄປ ເດີນສາຍອອກ ໄປອີກ 4 ສາຍ ແລ້ວວັນໜຶ່ງ ເຂົາຈະເຮັດໄດ້ ປະມານ 250 ຄົນຕໍ່ໜ່ວຍ ຂອງເຂົາເຈົ້າ ຂອງລາວນີ້ ຄິດວ່າພາຍໃນ 6 ເດືອນ ຄົງຈະແລ້ວ”.

ພ້ອມດຽວກັນນີ້ ທ່ານກໍວ່າ ຈຸດສຳຄັນຂອງ ກາຣພິສູຕສັນຊາຕ ແຮງງານຊາວລາວ ແມ່ນມີກຳໜົດ ຈັດຂຶ້ນໃນເຂຕ ບາງແຄ ທີ່ບາງກອກ ແລະຈະມີກາຣ ກະຈາຍອອກ ໄປຕື່ມອີກ ໃນທຸກໆແຂວງ ທົ່ວປະເທສ. ແຕ່ສະເພາະກາຣ ພິສູຕສັນຊາຕ ຊາວພະມ້າ ແລະ ກັມພູຊາ ກໍໄດ້ເຣີ່ມ ປະຕິບັຕກັນ ແດ່ແລ້ວ ຊຶ່ງກໍພົບເຫັນ ມີບາງຄົນທີ່ ບໍ່ຜ່ານ:

“ກໍຕ້ອງໄດ້ມີ ກາຣຈັດສົ່ງພວກ ທີ່ບໍ່ຜ່ານນັ້ນ ກັບຄືນບ້ານເດີມ ຂອງເຂົາເຈົ້າ ຫລືສົ່ງໄປຍັງ ປະເທສທີ່ 3 ຊຶ່ງເປັນກາຣ ປະຕິບັຕໄປ ຕາມສະພາບ ຄວາມໝັ້ນຄົງຂອງ ກະຊວງມະຫາດໄທ, ແຕ່ສະເພາະຄົນ ງານຊາວລາວທີ່ ບໍ່ຜ່ານ ກໍຈະມີກາຣ ຈັດສົ່ງກັບລາວ ເຊັ່ນກັນ”.

ທ່ານໄດ້ກ່າວເນັ້ນ ອີກວ່າ ຕາມຂໍ້ມູລທີ່ ໄດ້ຮັບແລ້ວນັ້ນ ມີຊາວພະມ້າ 822,093 ຄົນ, ຊາວລາວ 101,585 ຄົນ ແລະຊາວ ກັມພູຊາ 93,782 ຄົນ.