ກອງປະຊຸມສຸດຍອດ ອາຊຽນຄັ້ງທີ 17

ນາຍົກຣັຖມົນຕຣີ ສປປລາວ ທ່ານ ບົວສອນ ບຸບຜາວັນ ຈະນຳພາຄນະ ຜູ້ຕາງໜ້າ ຣັຖບານລາວ ເຂົ້າຮ່ວມກອງປະຊຸມ ສຸດຍອດອາຊຽນ ຄັ້ງທີ 17 ແລະກອງປະຊຸມ ທີ່ກ່ຽວຂ້ອງອື່ນໆ ຊຶ່ງຈະຈັດຂຶ້ນ        ທີ່ນະຄອນຫລວງ ຮາໂນຍ ປະເທດວຽດນາມ ລະຫວ່າງວັນທີ 28 ຫາ 30 ຕຸລາ 2010 ນີ້.

ກອງປະຊຸມ ຈະຖືກຈັດຂຶ້ນ ຖ້າມກາງບັນຫາ ທີ່ສັບສົນຕໍ່ເນື່ອງ ໃນພູມີພາກ ແລະໃນໂລກ, ໃນເວລາທີ່ອາຊຽນ ຈະມຸ້ງໜ້າໄປສູ່ ຈຸດໝາຍປາຍທາງ ໃນການຈັດຕັ້ງ ປະຊາຄົມອາຊຽນ ພາຍໃນ ປີ 2015.
ໃນກອງປະຊຸມ ສຸດຍອດເທື່ອນີ້ ຜູ້ນຳອາຊຽນ ຈະທົບທວນຄືນ ຄວາມກ້າວໜ້າໃນ ການຈັດຕັ້ງ ປະຊາຄົມ ພູມີພາກ ແລະ ການເຊື່ອມເຂົ້າກັນ ທາງດ້ານເສຖກິດ.

ນອກຈາກນີ້ ຜູ້ນຳອາຊຽນ ຍັງຈະໄດ້ ປຶກສາຫາລືກັນ ກ່ຽວກັບຄວາມທ້າທາຍ ທາງດ້ານການຟື້ນຟູ ຂອງເສຖກິດ ແລະການພັທນາທີ່ ຍືນຍົງ, ການຂາດແຄນອາຫານ, ການຂາດແຄນ ພະລັງງານ, ການປ່ຽນແປງ ຂອງສະພາບ ດິນຟ້າອາກາດ, ການບັນເທົາທຸກ ຈາກເຫດພັຍ ທັມມະຊາດ ແລະການແພ່ລະບາດ ຂອງພຍາດຕ່າງໆ.

ພ້ອມດຽວກັນນີ້ ກອງປະຊຸມຍັງຈະໄດ້ ສົນທະນາ ກ່ຽວກັບດ້ານການຮ່ວມມື ພາຍໃນອາຊຽນ, ລະຫວ່າງອາຊຽນ ແລະຄູ່ເຈຣະຈາ, ບັນຫາພູມີພາກ ແລະ ບັນຫາໃນໂລກ. ໃນກອງປະຊຸມ ສຸດຍອດອາຊຽນ ຄັ້ງທີ 17 ນີ້ຈະເປັນໂອກາດ ອັນດີທີ່ ສປປລາວຈະໄດ້ ສົ່ງເສີມການ ຮ່ວມມືລະດັບນາໆຊາດ ເປີດເຜີຍກ່ຽວກັບ ນະໂຍບາຍຂອງ ປະເທດ ທີ່ຈະປະກອບສ່ວນ ໃນການສ້າງຕັ້ງ ປະຊາຄົມອາຊຽນ ພາຍໃນປີ 2015.