ເຈົ້າໜ້າທີ່ຂັ້ນສູງລາວ ໄປຝຶກວິຊາການເມືອງ ແລະ ການປົກຄອງ ທີ່ວຽດນາມ

ໃນລະຍະເວລາຮຽນ 5ເດືອນ ຢູ່ວຽດນາມນີ້ ເຈົ້າໜ້າທີ່ຂັ້ນສູງ 20ຄົນ ຂອງລາວ ຈະມີໂອກາດ ຮຽນຮູ້ກ່ຽວກັບ ທິສດີ ມາກຊິສ-ເລນິນນິສ ແລະ ຫລັກການແນວຄິດ ປະທານໂຮຈິມິນ. ນອກຈາກນັ້ນກໍຍັງ ຈະໄດ້ຮຽນກ່ຽວກັບ ນະໂຍບາຍແລະ ແນວທາງ ຂອງພັກແລະຣັຖ ວຽດນາມອີກນຳ.

ຜູ້ອຳນວຍການ ສຖາບັນ ທ່ານ ເລຮຸຍຢຽບ ກ່າວໃນເວລາເປີດ ການຝຶກອົບຮົມວ່າ ຫລາຍປີຜ່ານມາ ສຖາບັນແຫ່ງນີ້ ໄດ້ຝຶກສອນອົບຮົມ ພນັກງານຂັ້ນສູງລາວ ຫລາຍຮ້ອຍຄົນ ໂດຍຫວັງວ່າຈະສ້າງ ຄວາມເຂົ້າອົກເຂົ້າໃຈ ພັທນາ ຄວາມສຳພັນພິເສດ ຣະຫວ່າງທັງສອງ ປະເທດ.

ການທີ່ຜູ້ນຳ ພັກ-ຣັຖລາວ ຍັງສົ່ງພນັກງານ ຂັ້ນອາວຸໂສຂອງຕົນ ໄປຮັບຝຶກອົບຮົມ ຢູ່ວຽດນາມ ຢ່າງຕໍ່ເນື່ອງກ່ອນ ຈະໃຫ້ເຂົ້າຮັບ ໜ້າທີ່ຕຳແໜ່ງ ຮັບຜິດຊອບໃດໆ ນັ້ນ ກໍສະແດງໃຫ້ເຫັນວ່າ ອິທິພົນຂອງ ວຽດນາມ ໃນວົງການຜູ້ນໍາ ຂອງ ສປປລາວ ຍັງມີຢູ່ຢ່າງ ຫລວງຫລາຍ ໂດຍບໍ່ມີການ ປ່ຽນແປງແຕ່ຢ່າງໃດ ເຖິງວ່າລາວຈະ ມີການເປີດປະເທດ ຫລາຍຂື້ນ ໃນລະຍະຫລາຍປີ ຜ່ານມາ ໂດຍສະເພາະ ໃນດ້ານເສຖກິດ ແລະ ສັງຄົມ ກໍຕາມ.