ຄວາມສໍາພັນຂອງ ລາວແລະສະຫະຣັດ

ເນື່ອງໃນວັນ ຄົບຮອບ 55 ປີ ຂອງ ຄວາມສໍາພັນ ທາງການທູຕ ລະຫ່ວາງ ສະຫະຣັຖ ອະເມຣິກາ ແລະ ສປປລາວ ວັນທີ 10 ສິງຫາ ມາດາມ Hillary Clinton ຣັຖມົນຕຣີ ກະຊວງການ ຕ່າງປະເທດ ສະຫະຣັຖ ອະເມຣິກາ ໄດ້ຖແລງ ໂດຍມີໃຈຄວາມ ດັ່ງນີ້:

ໃນນາມຂອງ ປະທານາທິບໍດີ ບາຣັກ ໂອບາມາ ແລະ ປະຊາຊົນ ອາເມຣິກັນ ຂ້າພະເຈົ້າ ຂໍສົ່ງຄໍາ ອວຍພອນ ອັນປະເສີດ ມາຍັງ ສາທາຣະນະຣັຖ ປະຊາທິປະໄຕ ປະຊາຊົນລາວ ໃນໂອກາດ ທີ່ພວກເຮົາ ສລອງ 55 ປີ ຂອງ ຄວາມສໍາພັນ ທາງການທູຕ ລະຫ່ວາງ ສອງປະເທດ ຂອງພວກເຮົາ ໃນວັນທີ 10 ສິງຫານີ້.

ສະຫະຣັຖ ອະເມຣິກາ ຂໍຖືໂອກາດ ນີ້ຢືນຢັນ ອີກໃໝ່ວ່າ ສະຫະຣັຖ ຈະມີ ບົດບາດ ໃນການຊ່ວຍເຫລືອ ລາວ ໃນການພັທນາ ເພື່ອໃຫ້ໄດ້ ມາຊື່ງ ສັນຕິພາບ ແລະ ຄວາມອຸດົມ ສົມບູນ ແລະຄວາມປາຖນາ ຂອງສະຫະຣັຖ ທີ່ຈະເຮັດວຽກ ຮ່ວມກັນ ໃນຖານະ ເປັນພາຄີ ກ່ຽວກັບບັນຫາ ທີ່ຕ່າງຝ່າຍ ຕ່າງມີຄວາມ ເປັນຫ່ວງ.

ພວກຂ້າພະເຈົ້າ ພໍໃຈທີ່ ສປປລາວ ໃຫ້ການຊ່ວຍເຫລືອ ໃນການຊອກຫາ ນັກລົບ ຊາວ ອາເມຣິກັນ ທີ່ຍັງຫາຍ ສາບສູນ ໃນປາງສົງຄາມ ແລະ ເນັ້ນເຖິງ ຄໍາມຸ້ງໝັ້ນ ຂອງສະຫະຣັຖ ໃນການຊ່ວຍເຫລືອ ລາວ ເກັບກູ້ລະເບີດ ທີ່ບໍ່ທັນແຕກ. ການຮ່ວມມື ຂອງ ສະຫະຣັຖ ຜ່ານທາງ ໂຄງການລິເລີ້ມ ແມ່ນໍ້າຂອງ ຕອນໃຕ້ເພື່ອ ປົກປ້ອງ     ແລະ ອານຸຮັກ ສິ່ງແວດລ້ອມ ສ້າງປະຊາຄົມ ທີ່ມີ ສຸຂພາບດີ ສນັບສນູນ ການສືກສາ ແລະ ພັທນາ ໂຄງຮ່າງພື້ນຖານ ໃນພູມີພາກ ຍິ່ງຊີ້ ໃຫ້ເຫັນວ່າ ການຮ່ວມມືກັນ ແບບໃກ້ຊິດນີ້ ສ້າງຜົນປໂຍດ ໃຫ້ແກ່ສອງ ປະເທດ ແລະໃນ ພູມີພາກ.

ຂ້າພະເຈົ້າ ຫວັງວ່າຈະ ໄດ້ເຮັດວຽກ ຮ່ວມກັບ ຣັຖບານ ແລະ ປະຊາຊົນລາວ ເພື່ອເສີມສ້າງ ຄວາມເປັນພາຄີ ຂອງພວກເຮົາ ໃຫ້ເຂັ້ມແຂງ ສືບຕໍ່ໄປ ບົນພື້ນຖານ ຄວາມສໍາເຣັດ ທີ່ພວກເຮົາ ໄດ້ປະສົພມາ. ນັ້ນຄືຄໍາ ຖແລງຂອງ ມາດາມ Hillary Clinton.