ຊາວບ້ານເຂດຫົງສາ ຈະເລີ້ມໂຍກຍ້າຍ

ຄວາມຄືບໜ້າ ໂຄງການກໍ່ສ້າງ ໂຮງໄຟຟ້າ ຖ່ານຫີນລິກໄນທ໌ ໃນແຂວງ ໄຊຍະບູຣີ ຂນະນີ້ ປາກົດວ່າ ເຈົ້າຂອງໂຄງການ ກໍ່ສ້າງ ເລີ້ມໂຍກຍ້າຍ ປະຊາຊົນ ທີ່ໄດ້ຮັບ ຜົລກະທົບ ອອກໄປຕັ້ງ ບ້ານເຮືອນໃໝ່ ໃນເຂດທີ່ ທາງການ ຈັດສັນໄວ້ໃຫ້. ຕາມຄໍາເວົ້າ ຂອງເຈົ້າໜ້າທີ່ ພລັງງານ ແລະບໍ່ແຮ່ ແຂວງໄຊຍະບູຣີ:

"ບ້ານທີ່ມີ ຜົລກະທົບ ປະມານ 5 ບ້ານ ແຕ່ບ້ານຢູ່ໃກ້ ຕ້ອງໄດ້ຍ້າຍ ອອກກ່ອນ ເພິ່ນກໍກຽມພ້ອມ ກໍເຂດບ້ານ ໜອງຄໍາ ບ້ານນາຊາຍຄໍາ ທີ່ຕ້ອງຍ້າຍ ກ່ອນ 2 ບ້ານນີ້ ແຫຼະ".

ປະຊາຊົນ ທີ່ຖືກ ຜົລກະທົບ ແລະຕ້ອງໄດ້ ຍ້າຍອອກ ຈາກພື້ນທີ່ ກໍ່ສ້າງ ທັງໝົດ ມີ 5 ບ້ານ ຄື ບ້ານນາໜອງຄໍາ ບ້ານນາຊາຍຄໍາ ບ້ານຫານ ບ້ານທາດ ແລະບ້ານຈໍາປາ ຮວມມີ 500 ກວ່າຄອບຄົວ. ໃນເວລານີ້ ທາງການ ໄດ້ນໍາ ປະຊາຊົນ ບາງສ່ວນໃນ 2 ໝູ່ບ້ານ ທີ່ຢູ່ໃກ້ໂຮງ ໄຟຟ້ານັ້ນ ໂຍກຍ້າຍໄປ ພື້ນທີ່ໃໝ່ແລ້ວ.

ສ່ວນການຊ່ວຍເຫລືອ ຂອງທາງການ ຈະເຮັດແບບດຽວ ກັນກັບການ ໂຍກຍ້າຍ ປະຊາຊົນ ໃນເຂດ ເຂື່ອນນໍ້າເທີນ 2 ແຂວງຄໍາມ່ວນ ຄືໃຫ້ທີ່ດິນ ໃຫ້ບ້ານ ໃຫ້ອາຊີພ ກໍ່ສ້າງ ສາທາຣະນຸປະໂພກ ພື້ນຖານ ຮອງຮັບ. ສໍາລັບ ຜົລກະທົບ ດ້ານສິ່ງແວດລ້ອມ ທາງການ ກໍຍອມຮັບວ່າ ມີແນ່ນອນ ແຕ່ກໍມີທາງ ແກ້ໄຂດີ ທີ່ສຸດ ຕາມມາຕຖານ ແບບດຽວກັບ ໂຮງໄຟຟ້າແມ່ເມາະ ໃນແຂວງລໍາປາງ ຂອງໄທ. ທ່ານກ່າວຕໍ່ໄປວ່າ:

"ທາງໂຄງການ ເພິ່ນໄດ້ ຣະບຸວ່າ ມີສິ່ງທີ່ເກັບ Co2 ມີຫຍັງເນາະ ກໍບໍ່ໃຫ້ ມັນກະຈາຍ ໄປຫຍັງໄກ ກໍຄືສິ ຮັບປະກັນ ຢູ່ສະພາບແວດລ້ອມ ເນາະ".

ໂຄງການ ຫົງສາລິກໄນທ໌ ປະກອບດ້ວຍ 2 ສ່ວນ ມີຂນາດການ ລົງທຶນໃຫຍ່ໂຕ ຄື ສ່ວນທີ່ເປັນຕົວ ໂຮງໄຟຟ້າ ກັບບໍ່ຖ່ານຫີນ. ໂຮງໄຟຟ້າ ຫົງສາລິກໄນທ໌ ຈະຕິດຕັ້ງ ເຄື່ອງຈັກປັ່ນໄຟ ຂນາດ 650 ແມັກກາວັດ ຈໍານວນ 3 ເຄື່ອງ ຮວມເປັນ 1880 ແມັກກາວັດ  ສາມາດຜລິດ ໄຟຟ້າໄດ້ 1249 ລ້ານ ກິໂລວັດຊົ່ວໂມງ. 

ໃນນັ້ນ 1470 ແມັກກາວັດ ຈະຈໍານ່າຍໃຫ້ ການໄຟຟ້າ ຝ່າຍຜລິດຂອງໄທ ທີ່ເຫລືອ ສ່ວນໃຫຍ່ ຈໍາໜ່າຍໃຫ້ ຣັຖວິສາຫະກິດ ໄຟຟ້າລາວ. ຜູ້ລົງທຶນ ຄື ຣັຖວິສາຫະກິດ ໄຟຟ້າລາວ 20% ບໍຣິສັດ ບ້ານປູຈໍາ ກັດຂອງໄທ 40% ຣາຊບູຣີ Holding ຂອງໄທ 40%.