ໃນລາວ ເສືອ ບໍ່ມີບ່ອນຢູ່

ອົງການ ພິທັກຮັກສາ ສັດປ່າ TRAFFIC ຣາຍງານວ່າ ເມື່ອຕົ້ນຊຸມປີ 1990 ປະເທດລາວ ມີເສືອຢູ່ ປະມານ 600ໂຕ ແຕ່ປັດຈຸບັນ ຍັງເຫລືອຢູ່ ບໍ່ເຖິງ 100ໂຕ. ເສືອໄດ້ກາຍເປັນ ສັດປ່າ ທີ່ກຳລັງ ສູນພັນຢູ່ລາວ.

ຊາວລາວຊອກຫາ ຈັບແລະຂ້າເສືອ ຫລາຍຂື້ນ ຕົວຢ່າງຢູ່ໃນ ເຂດປ່າສງວນ ແຫ່ງຊາດ ນ້ຳແອດ-ພູເລີຍ ຊາວບ້ານຍັງມັກ ຫ້າງແຫ້ວເພື່ອ ຈັບເສືອ ເມື່ອໄດ້ແລ້ວກໍ ຫາມອອກໄປຂາຍ ຢູ່ວຽດນາມ ໄດ້ຣາຄາ ໂຕນຶ່ງເຖິງ 15,000 ດອນລ່າ ສະຫະຣັຖ ແຕ່ເມື່ອໄປເຖິງ ຈີນຈະໄດ້ ຣາຄາເຖິງ 70,000 ດອນລ່າ.

ເສືອມີຄ່າຫລາຍ ຈົນຊາວລາວ ໃນເຂດ ຊົນນະບົດ ບາງທ້ອງຖິ່ນ ຂ້າໝູຫລືງົວ ເພື່ອປະໄວ້ເປັນ ເຫຍື່ອລໍ້ໃຫ້ເສືອ ມາແລ້ວກໍຈັບ ຫລືຂ້າເອົາເສືອ. ອີກສາເຫດນຶ່ງ ທີ່ເຮັດໃຫ້ເສືອ ດັບສູນໄວ ຢູ່ລາວ ກໍແມ່ນການ ຕັດຕົ້ນໄມ້ ທຳລາຍປ່າ ເຮັດໃຫ້ເສືອຂາດ ບ່ອນຢູ່ອາໃສ ແລະ ອາຫານການກິນ. ປັດຈຸບັນ ເຖິງວ່າຈະ ດິ້ນຣົນແລະ ຕໍ່ສູ້ແນວໃດ ກໍຕາມ ເສືອກໍຄົງບໍ່ ສາມາດ ຊະນະຄົນໄດ້ ເສືອຊຶ່ງເປັນສັດ ປ່າທີ່ສວຍສົດ ງົດງາມ ແລະຫາຍາກ ກໍຄົງ ຈະສູນພັນໄປ ໃນອານາຄົດ ອັນໃກ້ໆນີ້ ທັງຢູ່ໃນ ລາວ ແລະປະເທດ ອື່ນໆໃນໂລກ.

ດຣ. Ron Tilson ເຈົ້າໜ້າທີ່ ສະຫະພັນ ສັດປ່າໂລກ ຣາຍງານເມື່ອ ວັນສຸກ ວັນທີ່ 29ພຶສພາ ປີ 2009ນີ້ວ່າ ເສື່ອຢູ່ໃນສາມ ປະເທດ ອິນໂດນີຈີນ ຄື ລາວ ວຽດນາມ ແລະກຳພູຊາ ຍັງເຫລືອຢູ່ ປະມານ 1,000ໂຕ ແລະແນ່ນອນວ່າ ໂຕເລກນີ້ຈະ ຫລຸດໜ້ອຍຖອຍລົງ ໄປເລື້ອຍໆ.

ສ່ວນຢູ່ພາກໃຕ້ ຂອງຈີນ ຍັງມີເສືອ ເຫລືອຢູ່ພຽງແຕ່ 20ໂຕເທົ່ານັ້ນ. ຈີນ ເປັນປະເທດທີ່ ມັກໃຊ້ເກືອບ ທຸກຊີ້ນສ່ວນ ຂອງເສືອເປັນຢາ ເຊັ່ນເພິ້ມກຳລັງ ວັງຊາທັງ ທາງເພດ ແລະ ຮ່າງກາຍ.