ຕຳຣວດໄທ ຍຶດສັດປ່າ ແລະພຶດ ຢູ່ຕລາດ ຊາຍແດນ

ເມື່ອວັນອາທິດ ວັນທີ່ 15 ກຸມພານີ້ ເຈົ້າໜ້າທີ່ສັດປ່າ ປ່າໄມ້ແລະຕຳຣວດແຂວງ ໜອງຄາຍຂອງໄທ ໄດ້ໄປກວດກາສິນຄ້າ ທີ່ຕລາດຊາຍແດນ ຫລືທີ່ໄທມັກເອີ້ນວ່າ ຕລາດຜ່ອນປົນ ທີ່ບ້ານເປັ່ງຈານ ເມືອງຣັດຕະນະວາປີ ແຂງໜອງຄາຍແລະ ເຈົ້າໜ້າທີ່ໄດ້ພົບ ເຫັນແລະຍຶດສັດປ່າ ແລະພືດທີ່ຫາຍາກ ຫລາຍຊະນິດທີ່ຊາວລາວ ນຳໄປວາງຂາຍ.

ເຈົ້າໜ້າທີ່ຕຳຣວດເວົ້າວ່າ ສັດປ່າແລະພືດ ທີ່ຫາຍາກຫລືກ້ວຍໄມ້ ທີ່ຖືກຍຶດຄັ້ງນີ້ ມີຈຳນວນຫລວງ ຫລາຍຈົນນັບບໍ່ໄດ້; ສັດປ່າມີທັງໂຕເປັນ ແລະໂຕຕາຍຫລື ໂຕທີ່ຄົວແລ້ວ. ສັດປ່າໂຕເປັນກໍມີ ນົກກົດ ນົກເງືອກ ແລະກະຮອກ; ສ່ວນສັດທີ່ຄົວແລ້ວກໍມີ ເໝັ້ນ ໝູ່ປ່າ ຫລິ່ນ ແລະເຄື່ອງໃນສັດປ່າ; ສຳຣັບກ້ວຍໄມ້ກໍມີ ກ້ວຍໄມ້ຕະກຸນຊ້າງ ຕະກູນຫວາຍແລະຕະກູນເອື້ອງ.

ທ່ານ ທັບສິນ ຈົງດີ ນັກວິຊາການປ່າໄມ້ ແຂວງໜອງຄາຍເວົ້າວ່າ ຊາວລາວມັກນຳເອົາ ສັດປ່າແລະພືດຊະນິດ ຕ່າງໆມາຂາຍຢູ່ຕລາດຜ່ອນ ເປັນປະຈຳທຸກໆວັນອາທິດ; ບາງເທື່ອສັດປ່າທີ່ຄົວແລ້ວ ຖືກສີດຢາກັນບູດໃສ່ ຈົນແມງວັນກໍບໍ່ກ້າຕອມ ເພາະອາດເປັນຢາເບື່ອ; ຕົວຢ່າງ ຫລິ່ນ ຖືກສີດຢາຟໍມາລິ່ນໃສ່ ເພື່ອສົ່ງໄປຂາຍຕ່າງປະເທດ.

ສຳຣັບສັດປ່າແລະກ້ວຍໄມ້ ທີ່ເຈົ້າໜ້າທີ່ໄທຍຶດ ໄດ້ເທື່ອນີ້ນັ້ນ ເຈົ້າໜ້າທີ່ຈະມອບສັດເປັນ ໃຫ້ແກ່ປ່າສງວນ ຈະສົ່ງສັດທີ່ຄົວແລ້ວ ໄປຈູດເຜົາເພື່ອປ້ອງກັນ ເຊື້ອໂຣກຕິດແປດ ແລະຈະມອບກ້ວຍໄມ້ໃຫ້ ແກ່ຜແນກປ່າໄມ້ ແຂວງໜອງຄາຍເພື່ອ ນຳໄປຮັກສາໄວ້.

ປະກົດວ່າເຈົ້າໜ້າທີ່ໄທ ຍຶດແຕ່ສັດປ່າ ແລະພືດເທົ່ານັ້ນ ແຕ່ບໍ່ຈັບກຸມພວກພໍ່ຄ້າ ແມ່ຄ້າສິ່ງເຫລົ່ານີ້ເລີຍ. ໄທຫ້າມຄ້າຂາຍສັດປ່າ ແລະພືດຫລາຍຊະນິດ ຕາມກົດໝາຍຣະຫວ່າງຊາດ.