ຈີນ ກວາດຊື້ ບໍ່ແຮ່ ຢູ່ລາວຫລາຍແຫ່ງ

ລາຍງານວ່າ ບໍຣິສັດ ແຮ່ທາດຍັກໃຫຍ່ ຂອງຈີນ ກຳລັງກວາດຊື້ ບໍແຮ່ໃນລາວ ຈາກບໍຣິສັດ ອອສເຕຣເລັຽ ດັ່ງບໍ່ຄຳທີ່ ເຊໂປນ ຂອງບໍຣິສັດ ໂອຊີ ແລະບໍຄຳ ທີ່ພູເບັ້ຽ ແລະພູຄຳ ຂອງບໍຣີສັດ ແຟນອອສເຕຣເລັຽ.

ນອກຈາກນັ້ນ ບໍຣິສັດຈີນ ອີກບໍຣິສັດ ນື່ງກຳລັງ ຄົ້ນຄົ້ວແຮ່ທາດ ບອກໃຊ ທີ່ ແຂວງອັຕະປື ແລະແຂວງ ຈຳປາສັກ ຂອງລາວ ຊື່ງທາງການຈີນ ຄາດວ່າເປັນແຫລ່ງ ສະສົມທາດ ບອກໃຊ ທີ່ໃຫຍ່ທີ່ສຸດ ໃນລາວ. ທາງການຈີນ ຈະປ່ຽນໂສມຫນ້າ ຈາກຜູ້ຊື້ ມາເປັນຜູ້ຜລີດ ແຮ່ທາດໃນລາວ ໃນອານາຄົດ.

ທຸຣະກິດ ແຮ່ທາດ ສົ່ງລາຍໄດ້ໃຫ້ ແກ່ຣັຖບານ ຫລາຍພໍສົມຄວນ ໃນແຕ່ລະປີ ທັງໃນສ່ວນການ ໃຫ້ສັມປະທານ ການເສັຽພາສີ ລາຍໄດ້ ແລະການປັນຜົລ ປະພດ ຕ່າງໆແລະການ ຂາຍກິຈການ ໃຫ້ຈີນ ບໍຮີສັດ ໂອຊີ ອອສເຕຣເລັຽ ໃຫ້ການວ່າຈະ ບໍສົ່ງຜົລ ກະທົບໃດໆ ຕໍ່ພະນັກງານ ແລະຜົລປະໂຍດ ຂອງຣັຖບານ ຮ່ວມດ້ວຍ ປະຊາຊົນ ທ້ອງຖີ່ນ ໃນເຂດເມືອງ ວິຣະບຸຣີ ຜູ້ທີ່ໄດ້ຮັບ ການຊ່ອຍເຫລືອ ຈາກໂຄງການ ເຊໂປນ ຕາມສັນຍາ ຊື່ງກ່ອນຫນ້ານີ້ ບໍຣິສັດ ດັ່ງກ່າວ ໄດ້ປະກາດ ຫລຸດພະນັກງານ ລົງ 60ຄົນ ໃຫ້ເຫດຜົລວ່າ ຍ້ອນພົລພວງຈາກ ພາວະເສຖກິດ ຕົກຕ່ຳໃນ ທົ່ວໂລກ.

ສື່ຂອງທາງການ ລາວ ລາຍງານວ່າ ຫນ່ວຍງານທີ່ ກ່ຽວຂ້ອງຮ່ວມດ້ວຍ ກະຊວງແຜນຜັງ ແລະການລົງທືນ ກະຊວງ ພະລັງງານ ແລະບໍແຮ່ ບໍ່ມີຄວາມ ຂັດຂ້ອງຕໍ່ ການປ່ຽນເຈົ້າຂອງ ບໍແຮ່ ອັນດັບນື່ງ ໃນລາວແກ່ຈີນ ແຕ່ຢ່າງໃດ. ນອກຈາກ ບໍຣິສັດ ດັ່ງກ່າວແລ້ວ ກໍ່ຍັງມີ ບໍຣີສັດ ຈາກຈີນ ອີກຢ່າງນ້ອຍ 10ບໍຣິສັດ ກຳລັງສຳຣວດ ແຮ່ທາດໃນລາວ ຢູ່ໃນ ເວລານີ້.