ໂພນໂຮງ ໄດ້ຮັບຄວາມເສັຍຫາຍ ຈາກພັຍນໍ້າຖ້ວມ
2008.08.11
ເມືອງໂພນໂຮງ ໄດ້ຮັບຄວາມເສັຍຫາຍ ຢ່າງໜັກ ຈາກພັຍນໍ້າຖ້ວມ, ໂດຍສະເພາະ ພື້ນທີ່ປູກຝັງ ໄດ້ຮັບຄວາມເສັຍຫາຍ ຢ່າງຫລວງຫລາຍ ເມື່ອທຽບໃສ່ ເມືອງອື່ນໆ, ແລະ ຣະດັບນໍ້າ ກໍຍັງບໍ່ທັນຫລຸດລົງເທື່ອ ໃນຂະນະທີ່ ເມືອງອື່ນໆ ພົບວ່າ ນໍ້າເຣີ້ມ ຫລຸດລົງ ແດ່ແລ້ວ, ອີງຕາມ ການເປີດເຜີຍ ຂອງເຈົ້າໜ້າທີ່ ກ່ຽວຂ້ອງ ຈາກຫ້ອງການ ຄົມມະນາຄົມ ແຂວງວຽງຈັນ.
“ແມ່ນລະ ກະສິກັມ ບາງຈຸດ ຍັງຖ້ວມຢູ່, ຖ້ວມສ່ວນຫລາຍ ຢູ່ທົ່ງພຽງ ເຂດໂພນໂຮງ ເພາະເພິ່ນ ປ່ອຍນໍ້າເຂື່ອນ ໃສ່ນໍ້າງື່ມ ລົງມາ.”
ນໍ້າຖ້ວມ ຄັ້ງນີ້, ສາເຫດ ເກີດຈາກ ນໍ້າງື່ມ ລົ້ນເຂື່ອນ, ຈຶ່ງຖືກປ່ອຍລົງມາ ເຮັດໃຫ້ນໍ້າຖ້ວມ ຫລາຍພື້ນທີ່. ແຂວງວຽງຈັນ ນໍ້າຖ້ວມໜັກ ແມ່ນໃນຣະຫວ່າງ ວັນທີ 17 ຫາ 22 ກໍຣະກະດາ ຜ່ານມາ, ຊຶ່ງພົບວ່າ ມີ 68 ໝູ່ບ້ານ ໃນ 5 ໂຕເມືອງ, ໄດ້ຮັບຜົນກະທົບ. ແຕ່ໃນເວລານີ້, ຣະດັບນໍ້າ ເຣີ້ມຫລຸດລົງແດ່ແລ້ວ, ແຕ່ ຍັງຂັງຢູ່ ໃນພື້ນທີ່ ໄຮ່ນາ.
ນອກຈາກນັ້ນ, ໃນເຂດເມືອງກາສີ ພົບວ່າ ດິນ ໄດ້ເຈື່ອນລົງມາ ຕັນຖນົນ, ຊຶ່ງ ເຈົ້າໜ້າທີ່ ກ່ຽວຂ້ອງ ກໍໄດ້ແກ້ໄຂ ບັນຫາ ດັ່ງກ່າວໄປແລ້ວ. ສ່ວນ ເມືອງໂພນໂຮງ ນັ້ນ, ນໍ້າ ຍັງຖ້ວມສູງຢູ່ ເພາະວ່າ ນໍ້າຈາກເຂື່ອນ ໄດ້ລົ້ນອອກມາ ໃສ່ພື້ນທີ່ ບ້ານເຮືອນ ແລະ ພື້ນທີ່ ປູກຝັງ ຂອງປະຊາຊົນ ຢ່າງກ້ວາງຂວາງ. ໃນປັດຈຸບັນ, ພາກສ່ວນ ກ່ຽວຂ້ອງ ຍັງບໍ່ສາມາດ ໃຫ້ຄໍາຕອບ ໄດ້ເທຶ່ອວ່າ ນໍ້າຖ້ວມ ທີ່ເມືອງໂພນໂຮງ ນີ້ ຈະຫລຸດຣະດັບ ເຂົ້າສູ່ ປົກກຕິ ເມື່ອໃດ. ດັ່ງເຈົ້າໜ້າທີ່ ກ່ຽວຂ້ອງ ກ່າວ ໃນຕອນນຶ່ງ ວ່າ:
“ໂອ໋ວ! ຍັງກໍານົດ ບໍ່ໄດ້ ເພາະດຽວນີ້ ຝົນ ຍັງຕົກຢູ່. ດຽວນີ້ ຕົກບໍ່ແຮງ ປານໃດ ແຕ່ຕົກ ບໍ່ຂາດ ປະມານ ເກືອບເດືອນແລ້ວເດ້, ປ່ອຍລົງມານີ້.”
ສະຖານະການ ນໍ້າຖ້ວມ ໃນລາວ ຍັງຄົງ ເປັນບັນຫາໃຫຍ່ ທີ່ສົ່ງຜົນກະທົບ ໃນຫລາຍເມືອງ ແລະ ສົ່ງຜົນກະທົບ ພື້ນທີ່ ກະສິກັມ ຂອງປະຊາຊົນ, ແລະ ປັດຈຸບັນ ທາງເຈົ້າໜ້າທີ່ ກ່ຽວຂ້ອງ ພວມຮີບໂຮມ ຂໍ້ມູນ ຄວາມເສັຍຫາຍ ກ່ອນທີ່ ຈະໃຫ້ການຊ່ອຍເຫລືອ ຢ່າງແທ້ຈິງ.