ເຈົ້າໜ້າທີ່ ຂາດພາຫະນະ ສົ່ງສິ່ງຂອງ ຊ່ອຍເຫລືອ
2008.08.15
ໃນຂະນະທີ່ ຣະດັບນໍ້າ ສູງຂຶ້ນ ຢ່າງຕໍ່ເນື່ອງ, ເຈົ້າໜ້າທີ່ ກ່ຽວຂ້ອງ ກໍໄດ້ນໍາເອົາ ຖົງດິນຊາຍ ມາປ້ານນໍ້າ
ໃນຕລອດ ສັປດາ ທີ່ຜ່ານມາ, ແຂວງວຽງຈັນ ເປັນແຂວງນຶ່ງ ທີ່ໄດ້ຮັບຜົນກະທົບ ຈາກພັຍນໍ້າຖ້ວມ ຢ່າງໜັກ, ແລະ ເຖິງແມ່ນວ່າ ທາງການ ຈະກະກຽມ ເຂົ້າຂອງ ເຄື່ອງໃຊ້ ທີ່ຈໍາເປັນ ໄວ້ຊ່ອຍເຫລືອຊາວບ້ານ ທີ່ເດືອດຮ້ອນ ເປັນທີ່ຮຽບຮ້ອຍແລ້ວ ກໍຕາມ, ແຕ່ ການສົ່ງມອບ ເຄື່ອງຊ່ອຍເຫລືອ ດັ່ງກ່າວ ຍັງເປັນໄປ ດ້ວຍຄວາມລໍາບາກ ເນື່ອງຈາກວ່າ ພາຫະນະ ບໍ່ພຽງພໍ, ອີງຕາມ ການເປີດເຜີຍ ຂອງເຈົ້າໜ້າທີ່ ທີ່ກ່ຽວຂ້ອງ:
“ເພາະມັນຂາດເຄື່ອງ ປະເພດເຮືອ ເຮືອໄປຫາ ແຕ່ລະບ້ານ ມັນໄປບໍ່ໄດ້ ເຮົາກໍໄດ້ກຽມໝົດແລ້ວ, ເປັນເຄື່ອງບໍຣິໂພກ ຫຍັງຕ່າງໆ, ນໍ້າ ຍັງບໍ່ທັນຫລຸດລົງ ກໍຊິຍາກໜ່ອຍນຶ່ງ.”
ທ່ານ ກ່າວຕື່ມວ່າ ເຖິງແມ່ນວ່າ ສະຖານະການ ນໍ້າຖ້ວມ ໃນບາງພື້ນທີ່ ຈະຫລຸດລົງແດ່ແລ້ວ ກໍຕາມ, ແຕ່ໃນບາງເຂດ ຣະດັບນໍ້າ ຍັງສູງຢູ່, ເປັນຕົ້ນ ເມືອງທຸຣະຄົມ ແລະ ເມືອງກາສີ, ຊຶ່ງເຮັດໃຫ້ ການເດີນທາງ ເຂົ້າໄປ ເພື່ອຊ່ອຍຊາວບ້ານ ປະຕິບັດໄດ້ ບໍ່ເຕັມທີ່, ຍ້ອນ ບໍ່ມີເຮືອ ໄວ້ຮັບໃຊ້ ຢ່າງພຽງພໍ. ດັ່ງນັ້ນ, ຍັງມີຊາວບ້ານ ຫລາຍພໍສົມຄວນ ທີ່ລໍຖ້າ ການຊ່ອຍເຫລືອຢູ່, ໂດຍສະເພາະ ຄວາມຕ້ອງການ ເຂົ້າສານ, ອາຫານແຫ້ງ ແລະ ນໍ້າສະອາດ ໄວ້ກິນ ໄວ້ໃຊ້. ກ່ຽວກັບ ເຣື້ອງນີ້ ທາງການ ກ່ຽວຂ້ອງ ກໍາລັງຄົ້ນຄ້ວາ ວິທີແກ້ໄຂ ບັນຫາດັ່ງກ່າວ ເພື່ອບໍ່ໃຫ້ຊາວບ້ານ ທີ່ເດືອດຮ້ອນ ທຸກຍາກຫລາຍກ່ວານີ້.
ຢ່າງໃດ ກໍດີ, ໃນສ່ວນພື້ນທີ່ ປູກຝັງ ຂອງແຂວງວຽງຈັນ ທີ່ເສັຍຫາຍ ຍ້ອນ ພັຍນໍ້າຖ້ວມ ປະມານ 2,000 ເຮັກຕາຣ ນັ້ນ, ກໍເປັນບັນຫາ ສໍາຄັນ ຕໍ່ມາ ທີ່ທາງການ ຈະຕ້ອງ ຮີບເລັ່ງໃຫ້ ການຊ່ອຍເຫລືອ ແກ່ຊາວບ້ານ ປູກພືດ ຕ່າງໆ ທົດແທນຜົນຜລິດ ທີ່ເສັຍຫາຍໄປ, ຄຽງຄູ ກັບການເຝົ້າຣະວັງ ໂຣກຣະບາດຕ່າງໆ ທີ່ອາດຕາມມາ ຫລັງນໍ້າຖ້ວມ.