ທາງການ ກຽມຊ່ອຍເຫລືອ ດ້ານຢາປິ່ນປົວ ແລະ ນໍ້າສະອາດ
2008.08.14
ພັຍນໍ້າຖ້ວມ ທີ່ສົ່ງຜົນກະທົບ ໃນເຂດແຂວງຕ່າງໆ ນັບແຕ່ ພາກເໜືອ, ພາກກາງ ແລະ ພາກໃຕ້ ຢ່າງກ້ວາງຂວາງ ຢູ່ໃນເວລານີ້, ເຮັດໃຫ້ ຊາວບ້ານ ຈໍານວນຫລວງຫລາຍ ຕົກຢູ່ໃນສະພາບ ທີ່ທຸກຍາກ ກ່ວາເດີມ. ນອກຈາກນັ້ນ, ຂະເຈົ້າ ຍັງມີຄວາມສ່ຽງ ກັບໂຣກຣະບາດ ແລະ ຂາດແຫລ່ງນໍ້າ ສະອາດ ເພື່ອ ອຸປໂພກ ແລະ ບໍຣິໂພກ ອີກດ້ວຍ.
ກ່ຽວກັບ ບັນຫາ ດັ່ງກ່າວ, ທາງການລາວ ພວມກະກຽມ ມາຕການ ຕ່າງໆ ເພື່ອລົງແກ້ໄຂ, ດັ່ງ ດຣ. ນວນຕາ ມະນີພູໄສ, ຫົວໜ້າ ສູນອະນາໄມ ສິ່ງແວດລ້ອມ ແລະ ຈັດຫາ ນໍ້າສະອາດ ປະຈໍາ ກະຊວງສາທາຣະນະສຸກ ຂອງລາວ, ຊີ້ແຈງ ໃນຕອນນຶ່ງ ວ່າ:
“ສ່ວນຫລາຍ ກໍຖອກທ້ອງ ແລະ ກໍຜິວໜັງເປື່ອຍ ຫລື ວ່າ ຍ່ຽວໜູ, ກໍຕ້ອງ ໄດ້ເອົາໃຈໃສ່ ປ້ອງກັນ ຄືກັນ ເພີ້ມຕື່ມ ອີກອັນນຶ່ງ ພາຍຫລັງ ນໍ້າຖ້ວມ ຕ້ອງໄດ້ລົງໄປ ບູຣະນະ ບໍ່ນໍ້າຕ່າງໆ ທີ່ຖືກນໍ້າຖ້ວມ ຄືນ. ດຽວນີ້ ກໍກໍາລັງ ສເນີຫາ ອົງການ ຢູນີເຊັບ ທີ່ເປັນຄູ່ຮ່ວມງານ.”
ດຣ. ນວນຕາ ກ່າວເພີ້ມຕື່ມ ວ່າ ໂຣກຣະບາດດັ່ງກ່າວ ທີ່ອາດເກີດຂຶ້ນນັ້ນ, ທາງການ ຈໍາເປັນຕ້ອງ ລົງໂຄສະນາ ສຸຂສຶກສາ ແກ່ຊາວບ້ານ ໃນພື້ນທີ່ ທີ່ສ່ຽງ, ຄຽງຄູ່ ກັບການ ໃຫ້ການຊ່ອຍເຫລືອ ເບື້ອງຕົ້ນ ແກ່ຂະເຈົ້າ.
ນອກຈາກນັ້ນ, ຣະບົບນໍ້າສະອາດ ໃນທ້ອງຖິ່ນຕ່າງໆ, ເປັນຕົ້ນ ນໍ້າປະປາ, ນໍ້າສ້າງບາດານ, ຮວມໄປເຖິງ ສ້ວມຖ່າຍ ທີ່ຖືກທໍາລາຍ ຈາກພັຍນໍ້າຖ້ວມ, ກໍຈະຕ້ອງ ຖືກສ້ອມແປງຄືນໃໝ່. ພ້ອມກັບ ຂ້າເຊື້ອໂຣກຕ່າງໆ ເພື່ອຮັບປະກັນ ວ່າ ຊາວບ້ານ ທີ່ເດືອດຮ້ອນ ຈະສາມາດ ດໍາຣົງ ຊີວິດ ຢ່າງຖືກສຸຂອະນາໄມ ພາຍຫລັງ ທີ່ບັນຫາ ນໍ້າຖ້ວມ ໝົດໄປ.
ເຖິງ ຢ່າງໃດ ກໍຕາມ, ດຣ. ນວນຕາ ກ່າວວ່າ: ມາຕການ ຕ່າງໆ ທີ່ທາງການລາວ ພວມກະກຽມ ຂຶ້ນນີ້, ຈໍາເປັນ ຕ້ອງໄດ້ຂໍ ການຊ່ອຍເຫລືອ ແລະ ສນັບສນູນ ຈາກອົງການ ຈັດຕັ້ງສາກົນ ຕ່າງໆ, ໂດຍສະເພາະ ອົງການ ຢູນິເຊັບ, ຊຶ່ງມີບົດບາດ ສໍາຄັນ ໃນລະຍະຜ່ານມາ ກ່ຽວກັບ ວຽກງານ ສ້າງສານໍ້າສະອາດ ແລະ ອະນາມັຍ ສິ່ງແວດລ້ອມ ໃນລາວ.