ແຂວງບໍລິຄໍາໄຊ ຄວບຄຸມ ຣາຄາ ສິນຄ້າ
2008.08.14
ການສວຍໂອກາດ ຂຶ້ນຣາຄາ ສິນຄ້າຕ່າງໆ ຍາມເກີດພັຍພິບັດນີ້, ມັກມີຂຶ້ນ ຢູ່ສເມີ, ດັ່ງນັ້ນ ແຂວງບໍຣິຄໍາໄຊ ຈຶ່ງເອົາໃຈໃສ່ ຕິດຕາມ ການສວຍໂອກາດ ຂຶ້ນຣາຄາ ຂອງພໍ່ຄ້າຊາວຂາຍ ຕ່າງໆ ເພື່ອບໍ່ໃຫ້ ຊາວບ້ານ ຜູ້ເດືອດຮ້ອນ ຢູ່ແລ້ວ ຖືກເອົາປຽບຕື່ມອີກ.
ທ່ານ ບຸນມາ ບຸຈະເຣີນ, ຫົວໜ້າ ຜແນກ ແຜນການ ແລະ ການລົງທຶນ ແຂວງບໍຣິຄໍາໄຊ, ກ່າວວ່າ:
“ຕໍ່ບັນຫານີ້, ກໍຍັງ ບໍ່ມີບັນຫາ ຫຍັງດອກ ເພາະວ່າ ໄທເຮົາ ກໍພະຍາຍາມ ຄວບຄຸມ ເຣື້ອງ ສະພາບຣາຄາ ສິນຄ້າ ເຣື້ອງການອຸປໂພກ-ບໍຣິໂພກ ທົ່ວໄປ, ກໍຍັງບໍ່ທັນ ກະທົບຫລາຍເທົ່າໃດ ຍັງສະພາບປົກກະຕິ ດີ.”
ທ່ານ ກ່າວເພີ້ມຕື່ມ ວ່າ: ໃນເວລານີ້ ສະພາບສິນຄ້າ ແລະ ອາຫານຕ່າງໆ ຍັງບໍ່ທັນເໜັງຕີງ ຂຶ້ນເທື່ອ, ແຕ່ ຖ້າຫາກ ພົບວ່າ ພາກສ່ວນໃດ ມີການກັກຕຸນ ຫລື ສວຍໂອກາດ ຂຶ້ນຣາຄາ, ທາງການກ່ຽວຂ້ອງ, ໂດຍສະເພາະ ໃນຊ່ວງເວລາ ເກີດພັຍພິບັດ ເຊັ່ນນີ້, ກໍຈະໃຊ້ມາຕການ ຢ່າງເຂັ້ມງວດ.
ຢ່າງໃດ ກໍຕາມ, ໃນເວລານີ້ ຖືວ່າ 3 ໂຕເມືອງ ລຽບແຄມແມ່ນໍ້າຂອງ ຄື ເມືອງປາກຊັນ, ປາກກະດິງ ແລະ ທ່າພຣະບາດ ໃນແຂວງບໍຣິຄໍາໄຊ, ຖືກນໍ້າຖ້ວມ ເສັຍຫາຍ ຢ່າງໜັກ, ຮວມທັງໝົດ ປະມານ 20 ພັນເຮັກຕາຣ ແລ້ວ, ໃນນັ້ນ ສ່ວນຫລາຍ ແມ່ນພື້ນທີ່ ປູກເຂົ້າ ຂອງປະຊາຊົນ. ດັ່ງນັ້ນ, ທາງການ ຈຶ່ງຈໍາເປັນຕ້ອງ ໄດ້ຮວບຮວມ ຄວາມເສັຍຫາຍ ທັງໝົດ ໃຫ້ໄດ້ ໂດຍໄວ ເພື່ອຂຶ້ນແຜນ ຊ່ອຍເຫລືອ ຂະເຈົ້າ.
“ກະວ່າ ຈະໄດ້ສືບຕໍ່ ກວດກາ ປະເມີນ ຜົນເສັຍຫາຍ ວ່າ ຜົນເສັຍຫາຍ ຈະຢູ່ໃນ ຣະດັບໃດ ແຕ່ລະເມືອງ, ເພາະວ່າ ຈໍານວນນຶ່ງ ກໍຢາກໝົດເນື້ອໝົດໂຕ ເພາະວ່າ ທົ່ງນາ ປ່າເຂົ້າ ກໍຍາກໝົດ.”
ແຂວງບໍຣິຄໍາໄຊ ພວມວາງແຜນ ຊຸກຍູ້ ປະຊາຊົນ ກ່ຽວກັບ ການຜລິດກະສິກັມ ຄືນໃໝ່ ພາຍຫລັງ ທີ່ນໍ້າຖ້ວມ ໝົດໄປແລ້ວ, ເພາະ 3 ໂຕເມືອງ ແຄມແມ່ນໍ້າຂອງ ທີ່ເສັຍຫາຍໄປນັ້ນ, ຖືເປັນ ອູ່ເຂົ້າອູ່ນໍ້າ ທີ່ສໍາຄັນ. ພ້ອມດຽວກັນນັ້ນ, ຍັງຕ້ອງ ກະກຽມ ເຂົ້າຈໍານວນນຶ່ງ ເພື່ອສນອງ ແກ່ຊາວບ້ານ. ໃນເວລານີ້ ການຊ່ອຍເຫລືອ ຕ່າງໆ ຈາກສູນກາງ ແລະ ພາຍນອກ, ກໍາລັງ ເຣີ້ມທະຍອຍ ເຂົ້າໄປ ໃນແຂວງດັງກ່າວ, ຊຶ່ງຄາດວ່າ ຈະສາມາດ ສນອງຕອບ ແກ່ຊາວບ້ານ ທີ່ກໍາລັງເດືອດຮ້ອນ ເວລານີ້ ໄດ້ດີ ພໍສົມຄວນ.