ເດັກນ້ອຍ ທຸກຈົນ ໄດ້ຮັບທຶນ ການສຶກສາ

• ຈະເຣີນສຸກ ຣາຍງາຍ
  2008-06-30

ເດັກດ້ອຍ​ໂອກາດ ທາງ​ການ​ສຶກສາ ​ແລະ ​ເດັກ​ທຸກ​ຈົນ ໃນ ສປປລາວ ຍັງ​ເປັນ​ບັນຫາ ທີ່​ບໍ່​ສາມາດ ​​ແກ້​ໄຂ​ ​ໃຫ້​ໝົດ​ໄປ​ໄດ້, ຊຶ່ງ​ກ່ຽວ​ກັບ ​ເຣື້ອງນີ້ ທາງ​ໂຮງຮຽນ​ສຶກສາ​ສິງ ​ແຂວງ​ໄຊ​ຍະ​ບູຣີ ​ມີ​ນະ​​ໂຍບາຍ ​ໃຫ້​ທຶນ ການ​ສຶກສາ ​ແກ່ ເດັກນ້ອຍ ທີ່​ທຸກ​ຈົນຫລາຍ.

ອາຈານສອນ ໂຮງຮຽນ ສຶກສາ​ສິງ ​ແຂວງ​ໄຊ​ຍະ​ບູຣີ ທ່ານ​ນຶ່ງ ກ່າວ ວ່າ:

“ມັນ​ມີ​ນະ​ໂຍບາຍ ຖ້າ​ຫາກ​ວ່າ ​ເດັກ​ທຸກ​ຈົນຫລາຍ ​ແຕ່​ວ່າ ກ່ອນ​ຈະ​ມີ​ ນະ​ໂຍບາຍ ກໍ​ຕ້ອງ ​ໄດ້​ຂໍ​ໃບ​ຢັ້ງຢືນ ຈາກ​ຄອບຄົວ ຫລື​ວ່າ ​ໃບ​ຢັ້ງຢືນ ຈາກ​ບ້ານ ທີ່​ຜູ້ກ່ຽວ ອາສັຍ​ຢູ່, ຖ້າ​ຫາກ​ວ່າ ​ຂະ​ເຈົ້າ ທຸກ​ຈົນ​ແທ້ ກໍ​ຖື​ວ່າ ​ເຮົາ ​ເຮັດນະ​ໂຍບາຍ ບໍ່​ຕ້ອງ​ເສັຍ​ຄ່າ​ຮຽນ.”

ການ​ທີ່​ ໂຮງຮຽນດັ່ງກ່າວ ມີ​ນະ​ໂຍບາຍນີ້ ຂຶ້ນ​ມາ ເພື່ອ​ສນັບ​ສນູນ ​ໃຫ້​ເດັກ ​ທີ່​ຂາດ​ໂອກາດ ​ໃນ​ການພັທນາ ດ້ານ​ການ​ສຶກສາ ມີ​ໂອກາດ ​ໄດ້​ຮຽນ​ໜັງສື ​ຄືກັນ​ກັບ ​ເດັກນ້ອຍ ທົ່ວ​ໄປ, ຊຶ່ງ​ການ​ໄດ້​ຮັບ​ການ​ສຶກສາ ຈະ​ເຮັດ​ໃຫ້ ​ເດັກນ້ອຍ ​ເຫລົ່າ​ນັ້ນ ມີຄວາມ​ຮັບ​ຮູ້ ຕໍ່​ການ​ປ່ຽນ​ແປງ ຂອງ​ສັງຄົມ ​ໃນ​ປັດຈຸບັນ.

​ໃນ​ເຣື້ອງ ການພັທນາ ຣະບົບສຶກສາ ຂອງ​ເດັກ​ນັກຮຽນ​ນັ້ນ ມີ​ການ​ພັທນາ ກວ່າ ​ແຕ່​ກ່ອນ ຢ່າງ​ຫລວງຫລາຍ, ຊຶ່ງ​ກ່ຽວ​ກັບ ​ເຣື້ອງນີ້ ອາຈານ ດັ່ງກ່າວ ​ເວົ້າ​ວ່າ:

“ສະພາບ​ການ ​ສຶກສາ ກໍ​ຖື​ວ່າ ມີ​ການພັທນາ​ຂຶ້ນ ມີ​ນັກຮຽນ​ຫລາຍ ການ​ຮຽນ ຖື​ວ່າ ຣະດັບ​ ຕັ້ງ​ແຕ່ ມ 1 ຈົນ​ຮອດ ມ. 6 ມີ​ນັກຮຽນ 2,500 ກ່ວາ​ຄົນ ​ແລະ ພະນັກງານ ຄຣູອາຈານ ທີ່ນີ້ 90 ກ່ວາ​ຄົນ.”