ເກີດອຸບັດຕິເຫດ ຣົດໂດຍສານ ສາຍຊຽງຂວາງ-ວຽງຈັນ ຂ້ວາມຢູ່ເທິງ ຖນົນຫລວງ ໝາຍເລກ13 ເຂດພື້ນທີ່ຕອນເໜືອ ເມືອງໂພນໂຮງ ແຂວງວຽງຈັນ ໃນຕອນເຊົ້າມືດ ຂອງວັນອັງຄານ ທີ14ຕຸລານີ້ ເມື່ອເວລາ ປະມານ 2 ໂມງ ເຮັດໃຫ້ຜູ້ໂດຍສານ ເສັຽຊີວິດໄປ 4 ຄົນ ຈາກທັງໝົດ 40 ກວ່າຄົນ ທີ່ຢູ່ໃນ ຣົດ ແລະ ບາດເຈັບອີກ ສິບກວ່າຄົນ. ໃນນັ້ນ ມີບາງຄົນ ຢູ່ໃນສະພາບສາຫັດ ໂດຍທັງໝົດ ຖືກນໍາສົ່ງໂຮງໝໍ ແຂວງວຽງຈັນ ທີ່ຕັ້ງຢູ່ ບໍ່ຫ່າງໄກ ກັບບ່ອນເກີດເຫດ, ຕາມຄໍາເວົ້າ ຂອງ ຊາວນະຄອນຫລວງວຽງຈັນ ທ່ານນຶ່ງ.
ຣົດໂດຍສານ ຄັນດັ່ງກ່າວ ແລ່ນອອກຈາກ ຊຽງຂວາງ ເວລາ 8 ໂມງແລງ ເພື່ອທີ່ ຈະມາເຖິງນະຄອນຫລວງ ວຽງຈັນ ປະມານ 4 ໂມງເຊົ້າ ຊຶ່ງຈະໃຊ້ ເວລາແລ່ນ ປະມານ 8 ຊົ່ວໂມງ. ເສັ້ນທາງ ໝາຍເລກ 13 ຊ່ວງເໜືອ ຂອງເມືອງໂພນໂຮງ ເປັນເສັ້ນທາງ ລຽບພໍສົມຄວນ; ຣົດບໍ່ນ່າ ເກີດອຸບັຕິເຫດເລີຍ ແລະ ຄິດວ່າ ຄົງເກີດຈາກ ການຫລັບໃນ ຂອງຜູ້ຂັບ ຈຶ່ງເຮັດໃຫ້ຣົດ ເສັຽຫລັກ ແລ່ນເຈີດອອກນອກເສັ້ນທາງ ແລ້ວພິກຂ້ວາມ.
ໃນເດືອນດຽວກັນນີ້ ໄດ້ເກີດ ອຸບັດຕິເຫດ ຣົດໂດຍສານ ສາຍທາງໄກ ຂ້ວາມ 2 ເທື່ອແລ້ວ ເທິງ ເສັ້ນທາງ ໝາຍເລກທີ 13 ເທື່ອນີ້ ເປັນເທື່ອ ທີ 2. ເທື່ອທີ 1 ນັ້ນ ເກີດ ເມື່ອວັນທີ 6 ຕຸລາ ຢູ່ເຂດເມືອງ ທ່າພະບາດ ແຂວງບໍຣິຄໍາໄຊ, ມີຜູ້ໄດ້ຮັບ ບາດເຈັບສາຫັດ 4 ຄົນ ແຕ່ໂຊກດີ-ບໍ່ມີຜູ້ ເສັຽຊີວິດ.