ລ້ານຊ້າງມີນເນໂຣນ ຈຳຕ້ອງລົດ ຄົນງານຕື່ມອີກ

ບໍຣິສັດ ລ້ານຊ້າງ ມີນເນໂຣນ ຈໍາກັດ ຊື່ງເປັນເຈົ້າຂອງ ເໝືອງຄໍາເຊໂປນ ຢູ່ເມືອງ ວີຣະບູຣີ ແຂວງ ສວັນະເຂດ ໄດ້ເອົາ ຄົນງານອອກ 67 ຄົນຕື່ມອີກ ໃນລະຍະ 3 ເດືອນມານີ້ຍ້ອນ ໄດ້ຮັບຜົນ ກະທົບຈາກ ວິກິດການ ເສຖະກິດໂລກ ອັນເຮັດໃຫ້ ຣາຄາທອງແດງ ຕົກຕໍ່າລົງ. ຕາມລາຍງານ ຂອງອົງການ ຂ່າວລາວ. ລາຍງານວ່າ ໃນຈໍານວນຄົນ ງານ 67 ຄົນທີ່ເສັຽ ວຽກນັ້ນ ເປັນຄົນງານ ຕ່າງດ້າວ 40 ຄົນ, ຄົນງານລາວ ໃນທ້ອງຖິ່ນ ທີ່ເຮັດວຽກ ແບບຊົ່ວຄາວ ແລະຄົນງານ ປະຈໍາ ທັງໝົດ 27 ຄົນ. ໃນພາວະ ເສຖະກິດ ໂລກຕົກຕໍ່ານີ້ ຄວາມຕ້ອງການ ຄໍາແລະທອງແດງ ໃນຕະລາດໂລກ ມີນ້ອຍລົງ ເຮັດໃຫ້ຣາຄາ ຄໍາແລະທອງແດງ ຕົກຕໍ່າ, ບໍຣິສັດ ລ້ານຊ້າງ ມີເນໂຣນ ຊື່ງເປັນບໍຣິສັດ ຕາງໜ້າຂອງ ບໍຣິສັດ ໂອເຊັຽອານາ ຈາກໂອສະຕະເຣເລັຽ ຈໍາເປັນຕ້ອງ ປັບຫລືຈັດສັນ ໜ້າວຽກຂອງ ຄົນງານໃໝ່.

ອີກປະການນື່ງ ບໍຣິສັດ ໂອເຊັຽອານາ ຕ້ອງໄດ້ເລື່ອນ ແຜນການ ຂະຫຍາຍ ໂຮງງານຜລິດ ທອງແດງ ຊື່ງມີມູນຄ່າເຖິງ 200 ລ້ານໂດລາ ສະຫະຣັຖ ອອກໄປຈາກປີນີ້. ໃນປີ 2008 ຜ່ານມາ ບໍ່ຄໍາເຊໂປນ ສມາດຜລິດຄໍາ ໄດ້ 93,000 ອອນກ່ວາໆ ຫືລປະມານ 2,551.500 kg. ສໍາລັບການ ຜລິດທອງແດງ ໃນປີ 2009 ນີ້ ທາງ ບໍຣິສັດ ມີແຜນວ່າ ຈະຜລິດພຽງແຕ່ 67,000 ໂຕນເທົ່ານັ້ນ ຊື່ງເປັນ ປະຣິມານ ທີ່ເໝາະສົມ ກັບຄວາມຕ້ອງ ການຂອງ ຕະລາດໃນ ພູມີພາກ. ເມື່ອຕົ້ນປີ 2007 ຣາຄາທອງແດງ ໃນຕະລາດໂລກ ໂຕນນື່ງ 8,000 usd, ຕົກມາ ຮອດທ້າຍປີ 2008 ຣາຄາທອງແດງ ໂຕນນື່ງມີແຕ່ 2,000 usd ເທົ່ານັ້ນ.

ໃນເມື່ອ ການຜລິດຄໍາ ແລະທອງແດງ ຕົກຕໍ່າລົງ ລາຍໄດ້ຂອງ ບໍຮິສັດ ກໍຕົກຕໍ່າລົງ ອັນເຮັດໃຫ້ ລາຍໄດ້ຂອງ ຣັຖະບານລາວ ດ້ານຄ່າ ຝາກຫລວງ ຄ່າພາສີ ແລະ ສ່ວນແບ່ງຕາມ ສິດທິຕ່າງໆ ຫລຸດລົງ ຕຣອດຮອດ ການຊ່ວຍເຫລືອ ແກ່ຄົນໃນ ທ້ອງຖິ່ນ ກໍຈະຫລຸດ ລົງເຊັ່ນກັນ.