ຊາວບ້ານທາຕຫລວງ ລໍຖ້າຄ່າຊົດເຊີຍ

ຊາວລາວ ບ້ານທາດຫລວງ ເໜືອ ກາງ ໃຕ້ ໃນນະຄອນຫລວງ ວຽງຈັນ ຍັງລໍຖ້າ ໃຫ້ທາງການ ກ່ຽວຂ້ອງ ມາມອບເງິນຄ່າ ຊົດເຊີຍ ໃນການໂຍກຍ້າຍ ໄປຢູ່ເຂດຫລັກ 21. ພາຍຫລັງ ທີ່ທາງການລາວ ໄດ້ສົ່ງເຈົ້າໜ້າທີ່ ໄປເຈຣະຈາ ແລະ ສໍາຣວດພື້ນທີ່ ທີ່ໄດ້ຮັບຜົລ ກະທົບ ເມື່ອເດືອນກຸມພາ ຜ່ານມາ ຈົນຮອດມື້ນີ້ ຍັງບໍ່ເຫັນ ເຈົ້າໜ້າທີ່ ດໍາເນີນໂຄງການ ນັ້ນ ຕໍ່ໄປແນວໃດເທື່ອ  ຂະນະທີ່ ເຫັນວ່າ ທາງການຈະໃຫ້ ປະຊາຊົນຍ້າຍອອກ ໃນທ້າຍເດືອນ ມິນາ 2010 ນີ້. ທ້າວ ສົມພອນ ມົງຄົນສາ ຊາວບ້ານ ທາດຫລວງໃຕ້ ເວົ້າວ່າ:

"ບໍ່ຮູ້ຄືກັນ ຖ້າຢູ່ ລໍຟັງວ່າ ເວົ້າແລ້ວ ກໍລໍເອົາເງິນ ເອົາຄໍາໃຫ້ ກໍຈະໄປ".

ປັຈຈຸບັນ ມີປະຊາຊົນ ໃນພື້ນທີ່ນັ້ນ ຫລາຍຄົນ ຈັບກຸ່ມລົມກັນ ເຖິງບັນຫາ ດັ່ງກ່າວຢ່າງຈິງຈັງ ເພາະວ່າ ໃນພື້ນທີ່ດັ່ງກ່າວ ມີຄົນຖານະດີ ຫລາຍຄອບຄົວ ຊຶ່ງຄາດວ່າ ຄອບຄົວທີ່ຮັ່ງມີ ອາຈມີເສັ້ນສາຍ ໄປຮອດຕົວແທນ ທີ່ກ່ຽວຂ້ອງ ຂອງຣັຖບານ ໃນການເຈຣະຈາ ເພື່ອຂໍໃຫ້ຣະງັບ ການໂຍກຍ້າຍບ້ານ ໄປຢູ່ເຂດຫລັກ 21  ອັນເຮັດໃຫ້ ມີການປ່ຽນແປງ ບໍ່ໃຫ້ຍ້າຍ ກໍອາດເປັນໄປໄດ້. ສໍາລັບຄອບຄົວ ທົ່ວໆໄປທີ່ມີ ຖານະປານກາງ ແລະທຸກຍາກນັ້ນ ກໍອາດຕ້ອງຖືກ ໂຍກຍ້າຍອອກໄປ ບໍ່ມີການ ປ່ຽນແປງ.

ເຖິງຢ່າງໃດກໍຕາມ ຣັຖບານລາວ ມີນະໂຍບາຍ ໃຫ້ປະຊາຊົນ ໃນພື້ນທີ່ນັ້ນ ຍ້າຍອອກ ໃຫ້ໄວທີ່ສຸດ ຍ້ອນໂຄງການຂຍາຍ ເດີ່ນພຣະທາດຫລວງ  ແລະຖນົນ 4 ເສັ້ນ ຈໍາເປັນຈະຕ້ອງ ໄດ້ຮັບການສ້ອມແປງ ໃຫ້ແລ້ວ ກ່ອນເດືອນ ພຶສຈິກາ ປີ 2010 ນີ້.