ການລົງທຶນ ໃນບໍ່ແຮ່ ບໍ່ເປັນໄປຕາມ ຣະບຽບ ທີ່ທາງຣັຖ ໄດ້ວາງອອກ

ການພັທນາແລະການ ຄຸ້ມຄອງຂະແໜງການບໍ່ແຮ່ ຂອງຣັຖບານລາວ ປະຊີນກັບບັນຫາ ຫຍູ້ງຍາກສັບສົນ ໃນນັ້ນກໍມີທັງບັນຫາ ນັກລົງທຶນ ບໍ່ມີທຶນຮອນ ບໍ່ມີເຕັກນິກ ວິຊາການດ້ານບໍ່ແຮ່ ປະຕິບັດໂຄງການ ການຂຸດຄົ້ນບໍ່ດໍາເນີນ ຕາມຂັ້ນຕອນຣະບຽບການ ທາງດ້ານເຕັກ.  ບາງບໍຣິສັດ ເມື່ອສໍາຣວດຫລື ໄດ້ໂຄງການແລ້ວ ຈຶ່ງໄປຊອກຫາຜູ້ອຶ່ນ ມາຮ່ວມທຶນນໍາຕົນ ຕາມບົດສລຸບຣາຍງານ ວຽກງານການພັທນາ ດ້ານພລັງງານ ທໍຣະນີສາດ ແລະບໍ່ແຮ່ ສປປລາວ.

ບັນຫາຕ່າງໆເລົ່ານັ້ນ ເຮັດໃຫ້ເກີດກໍຣະນີ ຟ້ອງຮ້ອງເກີດຜົນກະທົບ ບໍ່ດີຕໍ່ສພາບ ແວດລ້ອມທັມຊາດ ແລະສັງຄົມ ມີການທໍາລາຍ ປ່າໄມ້ຊີວະນາໆພັນ ກໍ່ໃຫ້ເກີດ ສະພາບມົລພິດ ຕ່າງໆ.

ນອກຈາກນີ້ການຄຸ້ມຄອງ ຂອງຣັຖຮວມໄປເຖິງ ຣະບົບກົດໝາຍ ກໍບໍ່ຄົບຖ້ວນ ບໍ່ເຂັ້ມງວດພ້ອມທັງ ຍັງມີຂໍ້ຈໍາກັດ ຫລາຍດ້ານເປັນຕົ້ນ ດ້ານທຶນຮອນ, ອຸປະກອນ ການຜລິດ, ພະນັກງານມີໜ້ອຍ ແລະດ້ອຍປສົປການ ອີກດ້ວຍ.

ຈາກສະພາບດັ່ງກ່າວ ມີຫາງສຽງວ່າ ທາງການລາວບໍ່ຄວນ ເປີດກ້ວາງໃຫ້ມີ ການຂຸດຄົ້ນແຮ່ທາດ ຫລາຍເກີນໄປ ຫາກຄວນ ເລັ່ງໃສ່ການສົ່ງເສີມ ການຜລິດສີນຄ້າ ສົ່ງອອກຂອງປະຊາຊົນ ເປັນຕົ້ນຕໍ.

ແຕ່ຣັຖບານລາວ ພັດມີນະໂຍບາຍ ຊຸກຍູ້ໃຫ້ມີການ ຂຸດຄົ້ນບໍ່ແຮ່ເພີ່ມຂຶ້ນ 18 ເປີເຊັນກວ່າ ໃນປີ 2009 ນີ້ ເພາະເຫັນວ່າເປັນ ແຫລ່ງນຶ່ງທີ່ນໍາຣາຍ ໄດ້ທີ່ສໍາຄັນເຂົ້າຣັດ.

ມາເຖິງປັດຈຸບັນນີ້ ຣັຖບານລາວ ໄດ້ອະນຸຍາດ ໃຫ້ມີການ ລົງທຶນໃນຂແໜງ ບໍ່ແຮ່ທັງໝົດ 127 ບໍຣິສັດ.  ໃນນັ້ນເປັນບໍຣິສັດ ພາຍໃນ 42 ບໍຣິສັດ ຊຶ່ງມາຮອດ ເດືອນພຶສຈິກາ ປີກາຍມີພຽງ 11 ບໍຣິສັດ ເທົ່ານັ້ນ.