ດິນຢູ່ວຽງຈັນຣາຄາແພງ ເລີຍເກີດການຂັຕແຍ່ງ

ທີ່ດິນຢູ່ເຂດຕລາດເຊົ້າ ນະຄອນຫລວງວຽງຈັນ ມີຣາຄາແພງຂື້ນ ປະມານ 3,500,000ກີບ ຕໍ່1ແມັດມົນທົນ ເຮັດໃຫ້ມີການ ຂັດແຍ່ງກັນຫລາຍຂື້ນ. ຣາຄາດິນທີ່ວ່ານີ້ ເປັນຣາຄາທີ່ ອົງການຄຸ້ມຄອງທີ່ດິນ ນະຄອນຫລວງວຽງຈັນ ໃຊ້ໃນການຄິດໄລ່ ເກັບຄ່າໂອນກັມມະສິດ ທີ່ດິນ ໃນເຂດດັ່ງກ່າວ.

ຖັດຈາກເຂດ ຕລາດເຊົ້າແລ້ວ ດິນຢູ່ເຂດບ້ານຫາຍໂສກ ບໍຣິເວນອ້ອມແອ້ມ ວັດອິນແປງ ແລະວັດອົງຕື້ ເມືອງຈັນທະບູລີ ໃຈກາງ ນະຄອນຫລວງວຽງຈັນ ກໍມີຣາຄາແພງ ຄືປະມານ 2,700,000ກີບ ຕໍ່1ແມັດມົນທົນ. ສຳລັບດິນ ຢູ່ເຂດໜອງດ້ວງ ຕລາດຂາຍສິນຄ້າຈີນ ຊັງຈ່ຽງ ໃນເຂດເມືອງ ສີໂຄດຕະບອງ ມີຣາຄາປະມານ 2,000,000ກີບ ຕໍ່1ແມັດມົນທົນ.

ສ່ວນວ່າຣາຄາດິນ ຢູ່ເຂດນອກເມືອງແດ່ ກໍມີຣາຄາຖືກລົງ ເຊັ່ນ: ຢູ່ເຂດບ້ານໂພນຕ້ອງ ແລະ ເຂດທົ່ງປົ່ງ ມີຣາຄາປະມານ 500,000ກີບ ຕໍ່1ແມັດມົນທົນ.
ດິນຢູ່ທຸກຕົວເມືອງ ໃນເຂດ ນະຄອນຫລວງວຽງຈັນ ໄດ້ຖືກທາງການລາວ ກຳນົດຣາຄາເອົາໄວ້ ຍົກເວັ້ນເມືອງປາກງື່ມ.

ບໍ່ພຽງເທົ່ານັ້ນ ທາງການລາວ ຍັງໄດ້ກຳນົດ ຄ່າຊົດເຊີຍທີ່ດິນ ຂອງປະຊາຊົນ ທີ່ຖືກໂຄງການ ຂອງຣັຖບານກວມເອົາ ໃນຣາຄາຕ່ຳທີ່ສຸດ. ຕົວຢ່າງ: ໃນການເວນຄືນ ທີ່ດິນຂອງປະຊາຊົນ ທຸກປະເພດ ຕາມແລວທາງຣົດໄຟ ໃນເຂດດົງໂພສີ ເມືອງຫາດຊາຍຟອງ ຈຳນວນ 10,890ແມັດມົນທົນ ທາງການລາວໄດ້ ນົດຣາຄາໃຫ້ພຽງ 20,000ກີບ ຕໍ່1ແມັດມົນທົນ ເທົ່ານັ້ນ.

ປະຊາຊົນເຫັນວ່າ ຣາຄາທີ່ທາງການລາວ ບົ່ງໃຫ້ນັ້ນ ແມ່ນບໍ່ເໝາະສົມ ແລະຕ່ຳເກີນໄປ ເພາະວ່າດິນ ໃນບໍຣິເວນນັ້ນ ມີຫລາຍປະເພດ: ເປັນດິນນາ, ດິນສວນ ແລະ ດິນທີ່ຍັງບໍ່ທັນ ບຸກເບີກ.

ເຖິງວ່າປະຊາຊົນ ມີຄວາມຂັດຂ້ອງກໍຕາມ ແຕ່ທາງການລາວ ກໍວ່າ ດິນ ເປັນສົມບັດຂອງຣັດ ດັ່ງທ່ານ ສົມບັດ ເຢັຍລິເຮີ ເຈົ້າຄອງນະຄອນ ຫລວງວຽງຈັນ ໄດ້ກ່າວວ່າ ຣັຖບານມີສິດ ໃຊ້ດິນຕອນໃດກໍໄດ້ ເພາະມັນເປັນຊັບສົມບັດ ຂອງວົງຄະນະຍາດ ແຫ່ງຊາດລາວ ຕາມທີ່ໄດ້ລະບຸໄວ້ ໃນມາດຕາ 17 ຂອງຣັຖທັມມະນູນ          ແຫ່ງສປປລ ແລະ ມາດຕາ 3 ຂອງກົດໝາຍ ວ່າດ້ວຍທີ່ດິນ.