ຈີນໃຫ້ລາວຢືມເງິນ ເພື່ອຂຍາຍສນາມບີນ

ຣັຖບານຈີນ ໄດ້ອະນຸມັດ ເງິນກູ້ ແບບດອກເບັ້ຽຕ່ຳ ແກ່ຣັຖບານລາວ ເພື່ອຂຍາຍສນາມບິນ ນານາຊາດ ຫລວງພຣະບາງ ໃຫ້ໄດ້ມາຕຖານ ເພື່ອຮອງຮັບ ນັກທ່ອງທ່ຽວ ໃນເຂດເມືອງ ມໍຣະດົກໂລກ ທີ່ເພີ້ມຂຶ້ນ ໃນແຕ່ລະປີ ອີງຕາມການລາຍງານ ຈາກຫນັງສືພິມ ພາກຣັຖ ຂອງມື້ວັນ ອັງຄານ.

ຫນັງສືພິມ ວຽງຈັນທາຍ ລາຍງານວ່າ ງົບປະມານໃນ ການຂຍາຍສນາມບິນ ດັ່ງກ່າວ ຫລາຍກວ່າ 86 ລ້ານໂດລາ ຈະໃຊ້ເວລາໃນ ການຂຍາຍ 52 ເດືອນ ຈຶ່ງຈະສຳເຣັດ ແລະວ່າ ບໍຣິສັດກໍ່ສ້າງ CAMCE ຂອງຈີນ ຈະເປັນຜູ້ດຳເນີນ ວຽກງານການຂຍາຍ.

ໃນພິທີລົງນາມ ການຂຍາຍສນາມບິນ ຢ່າງເປັນທາງການ ວ່າງທ້າຍອາທິດນີ້ ຮອງອະທິບໍດີ ກົມການບິນພົລເຮືອນ ທ່ານ ວັນເພັງ ຈັນທະພອນ ກ່າວວ່າ ການປັບປຸງ ສນາມບີນ ຫລວງພຣະບາງ ເພື່ອຈະໃຫ້ເຄື່ອງບິນ ໂບອີງ 737 ແລະ Airbus 320 ລົງໄດ້ ຈະປະກອບດ້ວຍ ການປູຄອນກຣີດ ເສັ້ນທາງແລ່ນຂອງ ເຄື່ອງບິນທີ່ມີ ຣະຍະທາງຍາວ ປະມານ 2,900 ແມັດ ແລະກວ້າງປະມານ 45 ແມັດ ຮ່ວມດ້ວຍຫໍຮັບ ຜູ້ໂດຍສານຂນາດ 9,800 ແມດມົນທົນ.

ສນາມບິນຫລວງພຣະບາງ ທີ່ມີຢູ່ໃນ ປັດຈຸບັນ ສາມາດຮອງຮັບ ແຕ່ເຄື່ອງບີນ ATR ຊນິດ 72 ແລະ 60 ທີ່ນັ່ງ ແລະ ທາງແລ່ນຂອງ ສນາມບິນ ກໍ່ມີຄວາມຍາວ ພຽງແຕ່ 2,200 ແມັດເທົ່ານັ້ນ.