ການຕັດສິນຄະດີທີ່ດິນ ຂາດຄວາມໂປ່ງໃສ

ໃນກອງປະຊຸມ ສະພາແຫ່ງຊາດ ສມັຍສາມັນ ຄັ້ງທີ່ 9 ຊຸດທີ່ 6 ໃນມື້ວັນທີ່ 22 ມີຖຸນາ ນີ້ນັ້ນ ສະມາຊິກສະພາ ໄດ້ທວງຖາມ ຫາຂໍ້ຄວາມຈິງ ກ່ຽວກັບເຣື່ອງ ຄະດີ ຄວາມຂອງກາຣ ອະນຸມັຕ ທີ່ດິນຊ້ຳຊ້ອນ ຫລາຍໆຄະດີ ທີ່ວ່າມີກາຣ ພິຈາຣະນາ ແລະຍັງຄ້າງຄາຢູ່ ຍ້ອນທາງເຈົ້າໜ້າທີ່ ບໍ່ມີຄວາມໂປ່ງໃສ:

“ສາເຫຕທີ່ພາໃຫ້ ກາຣພິຈາຣະນາ ຄະດີ ແຕກຕ່າງກັນຢູ່ ໃນນັ້ນ ຂ້າພະເຈົ້າ ກໍມາເຫັນວ່າ ຄວາມບໍ່ໂປ່ງໃສ ຂອງພນັກງານ ຈຳນວນໜຶ່ງ ໃນຂະບວນກາຣ ຍຸຕິທັມ ຊ້ຳວ່າບໍ່ເຫັນ ເວົ້າແຈ້ງໝົດນັ້ນນ໋ະ ມັນແມ່ນຫຍັງແທ້? ຈະດີບໍ ຖ້າເຮົາຄວນ ເວົ້າໝົດ”.

ພ້ອມດຽວກັນນີ້ ຍານາງກໍວ່າ ບັນຫາ ສືບສວນສອບສວນ ໃນກາຣດຳເນີນ ຄະດີອາຍາ ບັນຫາກາຣຊື້ຂາຍ ສິທທິນຳໃຊ້ທີ່ດິນ ນັ້ນມີຫລາຍ ກໍຣະນີ ບໍ່ປະຕິບັຕ ຕາມຂັ້ນຕອນ ກົດໝາຍ ເຮັດໃຫ້ມີຂໍ້ ຫຍຸ້ງຍາກສັບສົນ ເພາະວ່າເຈົ້າໜ້າທີ່ ບໍ່ປະຕິບັຕງານ ບໍ່ມີກາຣຈົດ ບັນທຶກ ເປັນລາຍລັກອັກສອນ ຊຶ່ງສະທ້ອນໃຫ້ ເຫັນວ່າ ບໍ່ມີຄວາມໂປ່ງໃສ ໃນກາຣ ປະບັຕງານ ຈົນເປັນເຫຕໃຫ້ ມີກາຣຟ້ອງຮ້ອງ ກັນໃນດ້ານສິທທິ ສັມປະທານ ທີ່ດິນຕລອດມາ.

ສະນັ້ນຍານາງ ຈຶ່ງຢາກໃຫ້ທາງ ພາຄສ່ວນກ່ຽວຂ້ອງ ຄວນທີ່ຈະໃຫ້ ກາຣຊີ້ແຈງ ແລະຫາວິທີທາງ ແກ້ໄຂໃຫ້ໄດ້ ໃນອະນາຄົຕ ອັນໃກ້ໆນີ້.