1 ປີເຄິ່ງທີ່ທ່ານສົມບັດຫາຍໄປ

ວັນເວລາ ຜ່ານໄປ 1 ປີເຄິ່ງ ແລ້ວ ທ່ານ ສົມບັດ ສົມພອນ ຢູ່ໃສ? ຢູ່ລາວ ຄໍາຖາມ ງ່າຍໆນັ້ນ ຖືກກີດກັ້ນ ດ້ວຍກໍາແພງ ຂອງ ຄວາມ ງຽບ. ນັ້ນເປັນຫົວຂໍ້ ໃນ ບົດຄວາມ ຂອງ ທ່ານ ຟຽວ ໂຣເບິດເສິນ ຈາກ ອົງການ ສິດທິມະນຸດ Human Rights Watch ທີ່ອອກ ຜ່ານ ໜັງສືພິມ The Nation. ວັນທີ 15 ມີຖຸນາ 2014 ເປັນວັນ ຄົບຮອບ 1 ປີ ກັບ 6 ເດືອນ ທີ່ ທ່ານ ສົມບັດ ສົມພອນ ຫາຍ ສາບສູນໄປ. ນັບແຕ່ນັ້ນມາ ຣັຖບານ ລາວ ກໍລົ້ມເຫລວ ໃນການ ສືບສວນ ສອບສວນ ຫາຕົວທ່ານ.

ຄໍາສເນີ ຂອງ ຣັຖບານ ປະເທດ ຕ່າງໆ ຮວມທັງ ສະຫະຣັຖ ອະເມຣິກາ ທີ່ຢາກໃຫ້ ການ ຊ່ວຍເຫລືອ ດ້ານແທັກນິກ ແກ່ ທາງການ ລາວ ເພື່ອວິເຄາະ ຮູປພາບ ໃນ ວີດີໂອ ທີ່ ໄດ້ບັນທຶກ ການຈັບຕົວ ທ່ານ ສົມບັດ ໄປນັ້ນ ຖືກປະເສດ ມາໂດຍຕລອດ. ແລະມາເຖິງ ຈຸດນຶ່ງ ມີນາຍ ຕໍາຫຣວດ ທີ່ ສືບສວນ ສອບສວນນັ້ນ ໄດ້ເປີດເຜີຍ ວ່າ ການສືບສວນ ສອບສວນ ໄດ້ ຍຸຕິ ລົງ ຊົ່ວຄາວ ຊຶ່ງ ເປັນຄໍາເວົ້າ ທີ່ ຂັດແຍ້ງ ກັບ ເຈົ້າໜ້າທີ່ ຂັ້ນສູງ ຂອງລາວ ພາຍຫລັງ ນາໆຊາດ ຮຽກຮ້ອງ.

ບົດຄວາມ ເວົ້າຕື່ມວ່າ ໝູ່ຄູ່ ແລະ ເພື່ອນ ຮ່ວມງານ ຂອງ ທ່ານ ສົມບັດ ຫລາຍຄົນ ຍັງສົງໄສ ຢູ່ວ່າ ການກະທໍາ ແນວໃດ ຂອງ ສົມບັດ ທີ່ເຮັດໃຫ້ ທາງການລາວ ບັງຄັບ ໃຫ້ທ່ານ ຫາຍສາບສູນ. ສິ່ງທີ່ເຫັນ ໄດ້ຈະແຈ້ງ ກໍຄືຜົລງານ ຂອງ ທ່ານສົມບັດ ໃນການ ພັທນາເຂດ ຊົນນະບົດ ຊຶ່ງ ເປັນທີ່ ນິຍົມ ຊົມຊອບ ແລະ ໄດ້ຮັບການ ສນັບສນູນ ຈາກ ທົ່ວໂລກ. ຣັຖບານລາວ ຄວນຮັບວ່າ ທ່ານ ສົມບັດ ເປັນທີ່ຮູ້ ກັນດີ ແລະ ນັບຖືກັນ ຫລາຍເກີນກວ່າ ທີ່ ຣັຖບານ ປະເທດຕ່າງໆ ທີ່ກ່ຽວຂ້ອງ ຈະຖອຍ ຫລັງ ແລະ ລືມ ທ່ານ ໄປໄດ້.

ຣັຖບານລາວ ຈະປະເຊີນກັບ ບັນຫາ ນີ້ ໃນແຕ່ລະ ມື້ ຫາກບໍ່ ຍອມອອກມາ ໃຫ້ ຂ່າວຄາວ ກ່ຽວກັບ ຊະຕາກັມ ຂອງ ທ່ານສົມບັດ. ແລະ ກໍາແພງ ຂອງ ຄວາມງຽບ ກ່ຽວກັບ ສົມບັດ ສົມພອນ ຈະບໍ່ສາມາດ ມີຢູ່ຕໍ່ໄປ. ຊາວໂລກ ຈະບໍ່ ຫລົງລືມ ເຣື້ອງຣາວ ທີ່ ເກີດຂຶ້ນ ກັບ ພົລເມືອງ ທີ່ມີສື່ສຽງ ທີ່ສຸດ ຂອງລາວ ຜູ້ນີ້. ແລະ ຈະຮຽກຮ້ອງ ທວງ ການກັບມາ ຂອງທ່ານ.