ຣົດໄຟ ລາວ,ວຽດນາມ ແມ່ນ ການເມືອງ: ນັກວິຊາການ

ແກ້​ຂໍ້​ມູນ​ ໃຫ້​ແຈ່ມ​ແຈ້ງ ເພີ່ມ​ຕື່ມ: 2019-03-10

ຫລັງຈາກທີ່ ລາວ ໄດ້ເຊັນຂໍ້ຕົກລົງໂຄງການທາງຣົດໄຟ ກັບ ວຽດນາມ ມູນຄ່າປະມານ 5 ຕື້ ໂດລາ ໃນເດືອນກຸມພາ, ນັກວິຊາການຕ່າງ ປະເທດ ໄດ້ໃຫ້ຄຳເຫັນວ່າ, ຍັງບໍ່ມີສະຖາບັນການເງິນໃດ ສົນໃຈລົງທຶນໃສ່ ໂຄງການນີ້ ຍ້ອນວ່າປະເທດລາວ ຈະບໍ່ສາມາດໃຊ້ໜີ້ຄືນໄດ້.

ທ່ານ Murray Hiebert ເຈົ້າໜ້າທີ່ໂຄງການສຶກສາ ເອເຊັຍຕາເວັນອອກສ່ຽງໃຕ້ ປະຈຳສູນສຶກສານາໆຊາດ ແລະຍຸທສາດ ຢູ່ສະຫະຣັຖ ອາເມຣິກາ ໄດ້ກ່າວ ຕໍ່ເອເຊັຽເສຣີ ວ່າ:

"ຂ້າພະເຈົ້າບໍ່ຄິດວ່າ ຈະມີສະຖາບັນການເງິນໃດ ໃຫ້ຄວາມສົນໃຈລົງທຶນໃສ່ໂຄງການນີ້, ແຕ່ ສະບັນການເງິນສະແດງຄວາມເປັນຫ່ວງ ນຳປະເທດລາວ, ວ່າຈະມີໜີ້ສິນເພີ້ມຂຶ້ນ ແລະ ເປັນການຍາກທີ່ປະເທດລາວ ຈະໃຊ້ໜີ້ຄືນໄດ້."

ໂຄງການທາງລົດໄຟ ລາວ-ວຽດນາມ ມີຄວາມຍາວ 555 ກິໂລແມັດ ເລີ້ມຈາກແຂວງຄຳມ່ວນ ໄປຫາ ທ່າເຮືອວູງອາງ ຂອງວຽດນາມ ໃນນັ້ນປະເທດລາວ ຈະຮັບຜິດຊອບສ້າງ 452 ກິໂລແມັດ ໃນຂນະທີ່ ວຽດນາມຮັບຜິດຊອບສ້າງ ຢູ່ໃນວຽດນາມ 103 ກິໂລແມັດ.

ມູນຄ່າຂອງໂຄງການຣົດໄຟປະມານ 5 ຕື້ ໃນນັ້ນ ປະເທດລາວ ຈະຕ້ອງໄດ້ຈ່າຍສ້າງມູນຄ່າ ເກືອບ 4.1 ຕື້ໂດລາ ໃນຄວາມຍາວ 452 ກິໂລແມັດ ໃນຂນະທີ່ ວຽດນາມຈະໃຊ້ຈ່າຍເງິນສ້າງພຽງແຕ່ ປະມານ 900 ໂດລາ ໃນຄວາມຍາວ 103 ກິໂລແມັດ.

ແຕ່ ທ່ານ Murray Hiebert ກ່າວວ່າ ເປັນພຽງໂຄງການ ທາງອຸດົມການ, ແຕ່ບໍ່ແມ່ນ ໂຄງການທີ່ຈະເກີດຂຶ້ນໃນໄວໆ ນີ້:

“ຂ້າພະເຈົ້າຄິດວ່າ ໂຄງການດັ່ງກ່າວ ມັນສຳລັບຄົນຫຸ່ນຕໍ່ໄປ, ຄົງຈະບໍ່ສາມາດເກີດຂຶ້ນໃນເວລາໄວໆ ນີ້ ແລະມັນກໍຍາກທີ່ປະເທດລາວ ຈະສາມາດເອົາເງິນມາສ້າງ ໂຄງການນີ້ໄດ້. ມັນເປັນໂຄງການທາງດ້ານອຸດົມການ ແຕ່ໃນຄວາມຈິງ ມັນເປັນໂຄງການ ທີ່ແພງ.”

ທ່ານ Murray Hiebert ກ່າວຕື່ມອີກວ່າ:

"ສິ່ງທີ່ລາວກຳລັງເຮັດຢູ່ນີ້ ກໍເພື່ອສະແດງໃຫ້ວຽດນາມ ເຫັນວ່າ, ຍັງເປັນປະເທດເພື່ອນມິດກັນຢູ່, ແລະ ສະເພາະໂຄງການນີ້ ເປັນພຽງແຕ່ ທາງການທູດ ເທົ່ານັ້ນ, ແຕ່ບໍ່ແມ່ນໂຄງການທາງດ້ານເສຖກິດ."

ອົງການຮ່ວມມືສາກົນ ຂອງເກົາຫລີໃຕ້ ຫລື KOICA ເປັນຜູ້ເຮັດການສຶກສາ ຄວາມເປັນໄປໄດ້, ແຕ່ ກໍຍັງບໍ່ມີການເຜີຍແຜ່ ຂໍ້ມູລຣາຍລະອຽດເລື້ອງນີ້ ໃຫ້​ສາ​ທາ​ຣະ​ນະ​ຊົນ ໄດ້​ຮັບ​ຮູ້. ເຖິງ​ຢ່າງ​ໃດ ກໍ​ດີ, ອົງ​ການ​ດັ່ງ​ກ່າວ ໄດ້​ໃຫ້ ຂໍ້​ມູນ​ພື້ນ​ຖານ ຂອງ​ການ​ສຶກ​ສາ ຕໍ່ ວິ​ທ​ຍຸ ເອ​ເຊັຽ ເສ​ຣີ ເມື່ອ​ວັນ​ທີ 4 ມີ​ນາ, ແລະ ວ່າ ຣາຍ​ລະ​ອຽດ​ປີກ​ຍ່ອຍ​ ໃນ​ການ​ສຶກ​ສາ ນັ້ນ, ກົມ​ຄຸ້ມ​ຄອງ​ທາງ​ຣົດ​ໄຟ​, ກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ ເປັນ​ພາກ​ສ່ວນ​ທີ່​ຈະ​ໃຫ້​ຂໍ້​ມູນ​ໄດ້.

ດຣ Keith Barney ອາຈານສອນ ຢູ່ມະຫາວິທຍາໄລແຫ່ງຊາດ ອອດສເຕຣເລັຽ ໄດ້ກ່າວຕໍ່ເອເຊັຍເສຣີວ່າ: ເປັນທີ່ໜ້າເສັຍດາຍທີ່ພວກ ເຮົາບໍ່ສາມາດເຂົ້າເຖິງຂໍ້ມູນ ບົດວິພາກທາງເສຖກິດທີ່ອົງການ KOICA ເປັນຜູ້ເຮັດມັນເປັນເລື້ອງຍາກທີ່ຈະເວົ້າວ່າ ໂຄງການທາງຣົດໄຟ ສາຍນີ້ ມັນຈະໃຫ້ຜົນຕອບຮັບ ທາງດ້ານການເງິນ ແລະເສຖກິດ, ແຕ່ມັນມີຄວາມສ່ຽງ ທີ່ຈະເກີດຄວາມບໍ່ໂປ່ງໃສ ແລະ ການຂາດຄວາມ ຮັບຜິດຊອບ ຢູ່ໃນໂຄງການດັ່ງກ່າວ.

ດຣ Keith Barney ຍັງກ່າວຕື່ມີອີກວ່າ: ເປັນທີ່ຈະແຈ້ງແລ້ວວ່າ ຍັງບໍ່ມີການເຊື່ອມຕໍ່ ໃສ່ລະຫວ່າງ ແຂວງຄຳມ່ວນ ຂອງລາວ ກັບ ແຂວງນະຄອນພະນົມ ຂອງໄທ ຊຶ່ງ ດຣ Keith Barney ກໍຍັງມີ ຄຳຖາມວ່າ ມັນຈະກຸ້ມຄ່າສຳລັບ ປະເທດລາວ ທີ່ຈະເຮັດ ໂຄງການ ດັ່ງກ່າວ ທີ່ມີລາຄາແພງກັບວຽດນາມ ທີ່ບໍ່ມີໂຄງການເຊື່ອມຈອດກັບປະເທດໄທ.

ກ່ຽວກັບເລື້ອງນີ້ ໃນວັນທີ 6 ມີນາ ເອເຊັຽເສຣີ ໄດ້ໂທຫາ ທ່ານ ແສງສີວິໄຊ ວ່າການຫົວໜ້າກົມທາງຣົດໄຟກະຊວງໂຍທາທິການ ແລະ ຂົນສົ່ງ, ແຕ່ທ່ານປະຕິເສດ ທີ່ຈະໃຫ້ຄຳເຫັນໃນເລື້ອງນີ້. ແຕ່ໜັງສືພິມວຽງຈັນທາມ ຂອງລາວ ໄດ້ລາຍງານໃນວັນທີ 25 ກຸມພາ ວ່າ ໂຄງການທາງລົດໄຟ ລາວ-ວຽດນາມ ຈະເປັນການປະກອບສ່ວນຫລວງຫລາຍ ຕໍ່ຄວາມພຍາຍາມຂອງຣັຖບານລາວ ທີ່ຈະຫັນປ່ຽນ ປະເທດລາວ ຈາກປະເທດບໍ່ມີ ທາງອອກສູ່ທະເລ ໃຫ້ກາຍເປັນປະເທດ ເຊື່ອມຈອດດ້ວຍເສັ້ນທາງ.

ເຖີງຢ່າງໃດກໍຕາມ ທີ່ຜ່ານມາສະຖາບັນການເງິນສາກົນ ຫລື IMF ກໍສະແດງຄວາມເຫັນ ຫ່ວງກ່ຽວກັບໜີ້ສິນ ຂອງປະເທດລາວ ໃນປີ 2017 ທີ່ກວມເອົາປະມານ 60 ເປີເຊັນຂອງ ລວມຍອດຜລິຕພັນພາຍໃນ ຂອງລາວ ທີ່ມີມູນຄ່າ 17 ຕື້ໂດລາ. ແຕ່ຖ້າມີ ໂຄງການທາງ ຣົດໄຟ ລາວ-ວຽດນາມ ສາຍນີ້ເກີດຂຶ້ນ ຍິ່ງຈະເຮັດໃຫ້ປະເທດລາວ ຕົກເປັນໜີ້ຢ່າງມະຫາສານ.

ແກ້​ຂໍ້​ມູນ ໃຫ້​ແຈ່ມ​ແຈ້ງ​ເພີ່ມ​ຕື່ມ: ອົງການຮ່ວມມືສາກົນ ຂອງເກົາຫລີໃຕ້ ຫລື KOICA ເປັນຜູ້ເຮັດການສຶກສາ ຄວາມເປັນໄປໄດ້, ແຕ່ ກໍຍັງບໍ່ມີການເຜີຍແຜ່ ຂໍ້ມູລຣາຍລະອຽດເລື້ອງນີ້ ໃຫ້​ສາ​ທາ​ຣະ​ນະ​ຊົນ ໄດ້​ຮັບ​ຮູ້. ເຖິງ​ຢ່າງ​ໃດ ກໍ​ດີ, ອົງ​ການ​ດັ່ງ​ກ່າວ ໄດ້​ໃຫ້ ຂໍ້​ມູນ​ພື້ນ​ຖານ ຂອງ​ການ​ສຶກ​ສາ ຕໍ່ ວິ​ທ​ຍຸ ເອ​ເຊັຽ ເສ​ຣີ ເມື່ອ​ວັນ​ທີ 4 ມີ​ນາ, ແລະ ວ່າ ຣາຍ​ລະ​ອຽດ​ປີກ​ຍ່ອຍ​ ໃນ​ການ​ສຶກ​ສາ ນັ້ນ, ກົມ​ຄຸ້ມ​ຄອງ​ທາງ​ຣົດ​ໄຟ​, ກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ ເປັນ​ພາກ​ສ່ວນ​ທີ່​ຈະ​ໃຫ້​ຂໍ້​ມູນ​ໄດ້