ລາວ-ໄທສັນຍາຮ່ວມມືພັທນາ

ຣັຖບານ ລາວ-ໄທ ໄດ້ ລົງນາມ ໃນ ຂໍ້ຕົກລົງ 3 ສະບັບ ເພື່ອເສີມ ຂຍາຍ ການ ພົວພັນ ແລະ ຮ່ວມມື ຣະຫວ່າງ ກັນ. ຕາມຣາຍງານ ຂ່າວ KPL. ການ ລົງນາມ ມີຂຶ້ນ ເມື່ອ ວັນທີ 26 ພຶສຈິກາ 2014 ທີ່ ນະຄອນ ຫລວງ ວຽງຈັນ ໃນ ຣະຫວ່າງ ທີ່ ນາຍົກ ຣັຖມົນຕຣີ ໄທ ປຣະຢຸດ ຈັນໂອຊາ ຢ້ຽມຢາມ ລາວ ຢ່າງ ເປັນ ທາງການ 2 ວັນ 26 ຫາ 27 ພຶສຈິກາ 2014.

ໃນນັ້ນ ມີບັນທຶກ ຄວາມ ເຂົ້າໃຈ ກ່ຽວກັບ ໂຄງການ ພັທນາ ໂຮງ ພຍາບານ ແຂວງ ບໍ່ແກ້ວ ຣະຍະ 2. ບັນທຶກ ຄວາມ ເຂົ້າໃຈ ກ່ຽວ ກັບ ການ ຮ່ວມມື ໃນຂແນງ ວິທຍາສາດ ເທັກໂນໂລຈີ ແລະ ວິວັທນາການ ແລະ ຂໍ້ຕົກລົງ ກ່ຽວກັບ ການ ສັນຫາ ເງິນທຶນ ສໍາລັບ ໂຄງການ ສ້າງທາງ ຈາກ ເມືອງ ຫົງສາ ແຂວງ ໄຊຍະບູລີ ໄປຫາ ບ້ານ ຊຽງແມນ ແຂວງ ຫລວງ ພຣະບາງ.

ກ່ອນພິທີ ລົງນາມ ໄດ້ ມີການ ປຶກສາ ຫາຣື ກັນ ຣະຫວ່າງ ນາຍົກ ຣັຖມົນຕຣີ ລາວ-ໄທ ແລະ ໄດ້ຕົກລົງ ກັນວ່່າ ຈະຂຍາຍ ຄວາມ ສັມພັນ ແລະ ຮ່ວມມື ໃຫ້ ເລິກເຊິ່ງ ຂຶ້ນ ຕື່ມ ໃນການ ກະກຽມ ເຂົ້າຮ່ວມ ປະຊາຄົມ ເສຖກິດ ອາຊຽນ ໃນ ປີໜ້າ.

ພ້ອມດຽວກັນ ນັ້ນ ກໍເຫັນ ພ້ອມນໍາກັນ ວ່າ ຈະ ສໍາຣວດ ແລະ ປັກຫລັກ ໝາຍ ຊາຍແດນ ແລະ ປາບປາມ ການຄ້າ ຢາເສບຕິດ ຮວມ ເຖິງ ການຮັກສາ ຄວາມ ປອດພັຍ ຕາມແນວ ຊາຍແດນ ຂອງ ສອງ ປະເທດ ນໍາດ້ວຍ.

ເວົ້າ ສະເພາະ ການຮ່ວມມື ເຣື່ອງ ແຮງງານ ຣັຖບານ ໄທ ຈະຂຶ້ນ ທະບຽນ ແລະ ຄຸ້ມຄອງ ຄົນງານ ລາວ ຕໍ່ໄປ. ໃນ ຣະຫວ່າງ ການ ຢ້ຽມຢາມ ຍັງມີ ພິທີ ມອບ-ຮັບ ເງິນ ແລະ ອຸປກອນ ການ ສຶກສາ ມູລຄ່າ 2 ລ້ານ ໂດລາ ສະຫະຣັຖ ສໍາລັບ ວິທຍາລັຍ ການຊ່າງ 4 ແຫ່ງ ໃນແຂວງ ຫລວງ ພຣະບາງ ວຽງຈັນ ສວັນນະເຂດ ແລະ ໂຮງ ຮຽນ ເທັກນິກ ກະສິກັມ ດົງ ຄໍາຊ້າງ ໃນ ນະຄອນ ຫຼວງວຽງຈັນ ນໍາດ້ວຍ.