ອາຈານສອນສາສນາ ຈໍາຄຸກ 1 ປີ ຄຳຕັດສິນບໍ່ມີ

ໃນວັນທີ 15 ມິນາ 2021 ນີ້, ຖືເປັນເວລາ 1 ປີເຕັມ ພາຍຫຼັງທີ່ ອາຈານ ສີທົນ ທິບພະວົງ, ຄຣູສອນສາສນາຄຣິສຕຽນ ທີ່ບ້ານ ກະລຶມວັງແຂ້, ເມືອງຊົນນະບູຣີ ແຂວງສວັນນະເຂດ ຖືກເຈົ້າໜ້າທີ່ຕຳຣວດ ເຂົ້າສະແດງໂຕ ເພື່ອຈັບອາຈານ ໃນວັນທີ 15 ມິນາ 2020 ຂນະທີ່ພວມກະຕຽມ ພິທີນະມັສການພຣະເຈົ້າ ປະຈຳສັປດາ ທີ່ເຂດບ້ານຂອງທ່ານ.

ອີງຕາມແຫຼ່ງຂ່າວ ຈາກຜູ້ເປັນລູກສິດ ຂອງ ອາຈານ ສີທົນ ທີ່ເປັນຊາວລາວຄຣິສຕຽນ ທີ່ບ້ານກະລຶມວັງແຂ້ ໄດ້ຢືນຢັນຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນມື້ວັນທີ 15 ມິນາ ນີ້ວ່າມາເຖິງ ປັດຈຸບັນ, ອາຈານ ສີທົນ ກໍຍັງຖືກຂັງຄຸກ ທີ່ຄ້າຍຄຸມຂັງດັດສ້າງຫຼັກ 6 ຫຼື ຄຸກຫຼັກ 6 ນະຄອນໄກສອນ ພົມວິຫານ ແຂວງສວັນນະເຂດ ນັ້ນຢູ່, ໂດຍທີ່ຍັງບໍ່ມີການອ່ານຄຳຕັດສິນ ຈາກສານ ແລ້ວແຈ້ງເປັນ ລາຍລັກອັກສອນ ຈາກພາກສ່ວນທີ່ກ່ຽວຂ້ອງ ສູ່ຄອບຄົວແຕ່ຢ່າງໃດເທື່ອ.

ຕໍ່ກັບສະຖານະພາບຫຼ້າສຸດນີ້, ສະມາຊິກຄອບຄົວ ແລະ ຍາດຕິພີ່ນ້ອງ, ໝູ່ເພື່ອນ ແລະ ລູກສິດອາຈານ ກໍຍັງມີຜັດປ່ຽນກັນໄປ ສົ່ງເຂົ້າສົ່ງນ້ຳ ໃຫ້ ອາຈານ ສີທົນ ຕາມປົກກະຕິ, ແຕ່ກໍຂາດໆເຂີນໆ ເນື່ອງຈາກຢູ່ຫ່າງໄກ ແລະຕ້ອງຂີ່ຣົດໂດຍສານເຂົ້າມາ ໃນເມືອງ, ເຊິ່ງຕ້ອງໃຊ້ເວລາໄປ-ກັບ ເສັຽເວລາ 1 ມື້ເຕັມ. ບາງເທື່ອ, ຜູ້ເປັນພັລຍາ ຂອງ ອາຈານ ສີທົນ ຕ້ອງໄດ້ເດີນທາງຈາກ ບ້ານກະລຶມວັງແຂ້ ເຂົ້າມາໃນໂຕເມືອງ ເພື່ອມາສົ່ງເຂົ້າສົ່ງນ້ຳ, ໂດຍທີ່ປະລູກນ້ອຍໄວ້ເຮືອນ ຈົນຕ້ອງໄດ້ພາກັນຂາດການຮ່ຳຮຽນ ຫຼືບໍ່ໄດ້ໄປໂຮງຮຽນ ຫຼາຍເທື່ອ.

ເຖິງຢ່າງໃດກໍຕາມ, ເມື່ອ 2 ສັປດາ ທີ່ຜ່ານມານີ້, ສະມາຊິກຄອບຄົວ ແລະ ຍາດຕິພີ່ນ້ອງ ຂອງອາຈານ ສີທົນ ກໍໄດ້ພາກັນຍື່ນ ຄຳຮ້ອງ ຂໍຄວາມເປັນທັມ ໃຫ້ພາກສ່ວນທີ່ ກ່ຽວຂ້ອງ ນັ້ນແລ້ວ ເພື່ອໃຫ້ມີການປ່ອຍ ອາຈານ ສີທົນ ໃນເງື່ອນໄຂການປ່ອຍພາງ ເພາະອາຈານ ສີທົນ ບໍ່ໄດ້ກະທຳຜິດຮ້າຍແຮງໃດໆ ທີ່ເປັນພັຍຕໍ່ສວັດດີພາບ ຂອງຄົນຮອບຂ້າງ ແລະ ບໍ່ມີພຶດຕິກັມ ທີ່ຈະຫຼົບໜີ.

ປັດຈຸບັນນີ້, ທາງຄອບຄົວ ກໍຍັງພາກັນລໍຖ້າຟັງວ່າ ເພິ່ນຈະໃຫ້ມີການປ່ອຍໂຕ ຫຼືບໍ່ ເພາະຍັງບໍ່ໄດ້ຮັບຄຳຕອບໃດໆ ພາຍຫຼັງທີ່ຍື່ນ ຄຳຮ້ອງຂໍຄວາມເປັນທັມນັ້ນໄປ ເມື່ອ 2 ສັປດາ ທີ່ຜ່ານມານັ້ນ, ແຕ່ຄອບຄົວ ແລະ ຍາດຕິພີ່ນ້ອງ ກໍຍັງເຊື່ອໝັ້ນໃນຂະບວນການ ຍຸຕິທັມ ຂອງທາງການທ້ອງຖິ່ນ ແລະ ຫວັງວ່າ ຈະມີການປ່ອຍ ອາຈານ ສີທົນ ໃນມໍ່ໆນີ້ດ້ວຍ.

ຕໍ່ບັນຫາດັ່ງກ່າວ, ໃນຕອນບ່າຍຂອງວັນທີ 15 ມິນາ ນີ້, ຜູ້ສື່ຂ່າວວິທຍຸເອເຊັຽເສຣີ ໄດ້ຕິດຕໍ່ສອບຖາມໄປຍັງ ຫ້ອງການສັນຕິບານ ຜແນກປ້ອງກັນຄວາມສງົບ ແຂວງສວັນນະເຂດ ວ່າຈະມີການແກ້ໄຂບັນຫາຂອງ ອາຈານ ສີທົນ ແນວໃດ, ແຕ່ເຈົ້າໜ້າທີ່ກ່ຽວຂ້ອງ ບໍ່ສາມາດໃຫ້ຄວາມເຫັນໄດ້ ແລະ ໃຫ້ເຂົ້າໄປພົວພັນ ຢູ່ຫ້ອງການ.

ກ່ຽວກັບສາເຫດການຈັບ ອາຈານ ສີທົນ ທິບພະວົງ ນັ້ນໃນຕອນເຊົ້າເວລາ 7 ໂມງ 30 ຂອງມື້ວັນທີ 15 ມີນາ 2020 ຫຼື ເມື່ອປີ ກາຍ, ອາຈານ ສີທົນ ທິບພະວົງ ໄດ້ຖືກເຈົ້າໜ້າທີ່ ຕຳຣວດ ກຸ່ມກະລຶມວັງແຂ້ ເມືອງຊົນນະບູຣີ ແຂວງສວັນນະເຂດ ຈຳນວນ 7 ຄົນ ລົງມາຕິດຕາມ ແລະ ບັງຄັບໃຫ້ ອາຈານ ສີທົນ ເຊັນຮັບຮູ້ ເພື່ອໃຫ້ປະລະການເຊື່ອຖື ແລະ ຍຸຕິພິທີ ນະມັສການພຣະເຈົ້າ ປະຈຳສັປດາ ໂດຍປາສຈາກ ການແຈ້ງເຕືອນໃດໆ, ແຕ່ອາຈານ ສີທົນ ບໍ່ຍອມເຊັນ ຈຶ່ງຖືກເຈົ້າໜ້າທີ່ ຈັບໄປຂັງຄຸກ ໃນເວລາ 12 ໂມງ ຂອງມື້ດັ່ງກ່າວ ແລະ ຍັງຖືກຂັງຄຸກ ຈົນມາເຖິງທຸກມື້ນີ້, ໂດຍທີ່ບໍ່ເຄີຍແຈ້ງໃຫ້ທາງຄອບຄົວ, ຍາດຕິພີ່ນ້ອງ ແລະສະມາຊິກ ໂບດຂອງອາຈານ ສີທົນ ໃຫ້ຮັບຮູ້ ຢ່າງເປັນລາຍລັກອັກສອນວ່າ ອາຈານ ສີທົນ ຖືກຈັບໄປຂັງຄຸກ ໃນຂໍ້ຫາກະທຳຜິດຫຍັງ ແລະ ຈະຖືກສານຕັດສິນມື້ໃດ.

ອາຈານ ສີທົນ ທິບພະວົງ, ເປັນຊາວລາວ ສັນຊາຕລາວ ຊົນເຜົ່າບຣູ່ ຫຼືຊົນເຜົ່າກະຕ່າງ ອາຍຸ 34 ປີ, ເກີດ ແລະ ເຕີບໃຫຍ່ ທີ່ບ້ານກະລຶມວັງແຂ້, ເມືອງຊົນນະບູຣີ ແຂວງສວັນນະເຂດ ແລະ ໄດ້ເຣີ່ມເປັນຄຣູສອນ ສາສນາຄຣິສຕຽນ ນັບຕັ້ງແຕ່ປີ 2011 ເປັນຕົ້ນມາ, ໂດຍໄດ້ຖືໄປອະນຸຍາດ ເລຂທີ 915/ຄຂລ ຈາກສູນລວມຄຣິສຕະຈັກ ຂ່າວປະເສີດ ສປປລາວ ເມື່ອປີ 2019.