ກອງປະຊຸມສຸດຍອດອາຊຽນ ເປີດແລ້ວ

ກອງປະຊຸມ ສຸດຍອດ ອາຊຽນ ຄັ້ງທີ 28 ແລະ 29 ເປີດຂຶ້ນແລ້ວ ຢ່າງເປັນ ທາງການ ເມື່ອ ຕອນບ່າຍ ຂອງ ວັນທີ 6 ກັນຍາ ປີ 2016 ນີ້ ທີ່ ຫໍປະຊຸມ ແຫ່ງຊາດລາວ ນະຄອນຫຼວງ ວຽງຈັນ. ທ່ານ ບຸນຍັງ ວໍຣະຈິດ ປະທານ ປະເທດ ສປປລາວ ປະກາດ ເປີດ ກອງປະຊຸມ ຕອນນຶ່ງວ່າ:

“ໃນໂອກາດ ເລີກງາມຍາມດີນີ້ ຂ້າພະເຈົ້າ ຂໍປະກາດ ເປີດ ກອງປະຊຸມ ສຸດຍອດ ອາຊຽນ ຄັ້ງທີ 28 ແລະ 29 ແລະ ກອງປະຊຸມ ສຸດຍອດ ທີ່ກ່ຽວຂ້ອງ ຢ່າງ ເປັນທາງການ ແລະ ຂໍອວຍພອນ ໃຫ້ ກອງປະຊຸມ ສຸດຍອດ ຄັ້ງນີ້ ຈົ່ງປະສົບ ຜົນສຳເຣັດ ຢ່າງ ຈົບງາມ ຂໍຂອບໃຈ.”

ປະທານ ບຸນຍັງ ວໍຣະຈິດ ກ່າວອີກ ຕອນນຶ່ງວ່າ ອາຊຽນ ເປັນອົງການ ນຶ່ງ ທີ່ສໍາຄັນ ໃນພາກພື້ນ ທີ່ໄດ້ຜ່ານຜ່າ ບັນຫາ ທ້າທາຍ ຫຼາຍຢ່າງ ແຕ່ກໍປະສົບ ຄວາມສຳເຣັດ ໃນຫຼາຍດ້ານ ຈົນສາມາດ ກາຍເປັນ ປະຊາຄົມ ອາຊຽນ ໄດ້ ເມື່ອທ້າຍປີ 2015 ເປັນຕົ້ນມາ.

ສ່ວນທ່ານ ທອງລຸນ ສີສຸລິດ ນາຍົກ ຣັຖມົນຕຣີ ສປປລາວ ໄດ້ກ່າວ ຂອບໃຈ ປະເທດ ອາຊຽນ ຄູ່ເຈຣະຈາ ປະເທດ ເພື່ອນມິດ ແລະ ອົງການ ຈັດຕັ້ງສາກົນ ທີ່ໄດ້ໃຫ້ ການຮ່ວມມື ແລະ ການຊ່ວຍເຫລືອ ແກ່ ສປປລາວ ໃນການ ເປັນປະທານ ອາຊຽນ ປີ 2016 ນີ້.

ນອກຈາກ ຜູ້ນຳລາວ ທັງສອງ ເຂົ້າຮ່ວມ ພິທີເປີດ ກອງປະຊຸມ ສຸດຍອດ ອາຊຽນ ຄັ້ງນີ້ ກໍຍັງມີ ປະມຸກຣັດ ຫົວໜ້າ ຣັຖບານ ຣັຖມົນຕຣີ ການຕ່າງ ປະເທດ ອາຊຽນ ແລະ ເລຂາທິການ ໃຫຍ່ ອາຊຽນ.

ອາວະຣີ ອາຣແອຟເອ ຣາຍງານ ຈາກ ນະຄອນຫຼວງ ວຽງຈັນ