ແຂວງອຸດົມໄຊ ທໍາລາຍ ສວນປູກຝີ່ນ

ໃນປີນີ້ເຈົ້າໜ້າທີ່ ຜແນກສະກັດກັ້ນ ແລະຕ້ານຢາເສບຕິດ ແຂວງອຸດົມໄຊ ໄດ້ລົງກວດກາ ພື້ນທີ່ເປົ້າໝາຍ 19 ບ້ານ ແລະຍັງພົບເຫັນ ປະຊາຊົນລັກປູກຝີ່ນປະມານ 279 ເຮັກຕາ ສ່ວນຫຼາຍຈະປູກຢູ່ຈຸດເນື້ອທີ່ ຣະຫວ່າງຊາຍແດນຕິດກັບ ເມືອງອ້ອມຂ້າງ. ດັ່ງເຈົ້າໜ້າທີ່ ສະກັດກັ້ນ ແລະຄວບຄຸມຢາເສບຕິດ ຂອງແຂວງ ອຸດົມໄຊ ກ່າວວ່າ:

"ເປົ້າໝາຍຫຼັກໆ ຈຸດທີ່ວ່າເຄີຍປູກຝີ່ນມັນຈະມີ 2 ຈຸດເນາະ ຈຸດທີ່ 1 ຢູ່ກຸ່ມຫົວນໍ້າບາກ ພຸ້ນ ຈຸດ 1 ກໍຢູ່ຫົວນໍ້າງາ ມັນເປັນຊາຍແດນ ຫນ໋າ ຣະວ່າງຊາຍແດນ ເມືອງຕໍ່ເມືອງ ແລະ ກໍແຂວງຕໍ່ແຂວງ ເຫັນຢູ່ສວນຝີ່ນ ເຂົາກໍວ່າຄົນຢູ່ເມືອງນັ້ນເຮັດ ເຮົາກໍຈັບບໍ່ໄດ້ ຄາທີ່ຫນ໋າ; ໂອ້ຍ ຫຍຸ້ງຍາກຫຼາຍ ອັນທີ 1 ມາ ມັນເຂດພູດອຍເນາະ ຫ່າງໄກສອກຫຼີກ ກວ່າຈະໄປເຖິງໝົດທຸກຈອກທຸກແຈໄດ້ ພາຫະນະກໍບໍ່ດີ ຫັ້ນນ່າ ບາງບ້ານກໍໜີ, ລົງບາງບ້ານກໍມາລົງສ້າງບົດບັນທຶຶກ."

ທ່ານກ່າວຕື່ມວ່າ ເມື່ອເຖິງໄລະຍະທ້າຍປີນີ້ ເຈົ້າໜ້າທີ່ຈະລົງກວດກາ ອີກຄັ້ງນຶ່ງຜ່ານມາພົບເຫັນ ກໍໄດ້ທຳລາຍຖີ້ມແລ້ວ, ສຳລັບມາຕຖານ ການແກ້ໄຂນັ້ນ ເຈົ້າໜ້າທີ່ພວມເລັ່ງ ປັບປຸງຣະບຽບການຕ່າງໆ ໃຫ້ຮັດກຸມຄວບຄຸມຂຶ້ນຕື່ມ.

ນອກຈາກຢາເສບຕິດປະເພດຝີ່ນແລ້ວ ຜ່ານມາພາຍໃນແຂວງ ຍັງສາມາດກວດພົບຢາບ້າແລະຢາອີ ອີງຕາມຂໍ້ມູນຂອງຜແນກສະກັດກັ້ນ ແລະ ຕ້ານຢາເສບຕິດ ໃນໄລຍະ 1 ປີຜ່ານມາ ທົ່ວແຂວງອຸດົມໄຊ ມີຈຳນວນຜູ້ຕິດຢາເສບຕິດ ປະມານ 2,500 ປາຍຄົນ ແລະ ໃນນັ້ນ ມີຜູ້ຕິດຝີ່ນ 385 ຄົນ ສະເລັ່ຍປະມານ 20-30 ຄົນ ຕໍ່ປີທີ່ເຂົ້າມາບໍາບັດ ຢູ່ສູນປີ່ນປົວ.

ທັງນີ້ແລະທັງນັ້ນ ໃນປີ 2015 ສຳນັກງານຢາເສພຕິດ ແລະອາຊຍາກັມ ສະຫະປະຊາຊາດ (UNODC) ປະເມີນວ່າຣາຄາ ຜົລຜລິດຝີ່ນ ສູງເປັນ 19 ເທົ່າ ຂອງຣາຄາເຂົ້າ ແລະຜົລຜລິດທາງການກະເສດ ອື່ນໆ.