ເຈົ້າໜ້າທີ່ອົງການຈັດຕັ້ງພາກປະຊາສັງຄົມ ຜູ້ທີ່ເຮັດວຽກຕ້ານການຄ້າມະນຸສ ໄດ້ກ່າວຕໍ່ ວິທຍຸເອເຊັຽເສຣີ ວ່າ: [ກໍລະນີ້ຄົນງານລາວ ທີ່ໄປເຮັດວຽກ ແລະ ຖືກກັກຂັງຢູ່ໃນເຂດພິເສດສາມຫຼ່ຽມຄຳ ນັ້ນ] "ເປັນການຄ້າມະນຸສ."
ການປະຕິບັດຣະບຽບກົດໝາຍ ຢູ່ປະເທດລາວ ບໍ່ເຄັ່ງຄັດ ສະນັ້ນ ນາຍທຶນຈຶ່ງ ສວຍໃຊ້ຊ່ອງວ່າງນີ້ ເພື່ອດຳເນີນການກັກໂຕຄົນງານລາວ ບໍ່ໃຫ້ກັບບ້ານ ໃນຂະນະທີ່ເຈົ້າໜ້າທີ່ ທາງການລາວ ກໍບໍ່ສາມາດເຮັດຫຍັງໄດ້ເຕັມທີ່.
ເຈົ້າໜ້າທີ່ອົງການຈັດຕັ້ງ ພາກປະຊາສັງຄົມລາວ ອີກທ່ານນຶ່ງ ໄດ້ກ່າວຕໍ່ວິທຍຸເອເຊັຽເສຣີ ວ່າ:
" ເຖິງວ່າ ຣະ ບຽບຫຼັກການມີ ແຕ່ການຈັດຕັ້ງປະຕິບັດບໍ່ໄດ້ໜັກແໜ້ນ ສະນັ້ນແຫຼະ ມັນຈຶ່ງເປັນຊ່ອງວ່າງໃຫ້ນາຍທຶນຜູ້ທີ່ຈະໃຊ້ໂອກາດ ເພື່ອທີ່ຈະໃຫ້ເກີດຊ່ອງວ່າງ ໃນການດຳເນີນສິ່ງທີ່ມັນບໍ່ຖືກຕ້ອງ ໃຫ້ມັນຖືກຕ້ອງກໍມີ ກໍລະນີຢູ່ສາມຫຼ່ຽມຄຳທີ່ມັນເປັນຂ່າວມາຫັ້ນ."
ນັກທຸຣະກິຈຕ່າງປະເທດ ໝາຍເຖິງຜູ້ທີ່ຢູ່ບໍຣິຫານເຂດເສຖກິຈພິເສດ ສາມຫຼ່ຽມຄຳ ເຂົ້າຫາເຈົ້າແຂວງ ເຈົ້າເມືອງ ສະນັ້ນ ຈຶ່ງເຮັດໃຫ້ບັນຫາດັ່ງກ່າວ ບໍ່ໄດ້ຮັບການແກ້ໄຂ.
ເຈົ້າໜ້າທີ່ອົງການຈັດຕັ້ງ ພາກປະຊາສັງຄົມ ທ່ານນີ້ ກ່າວຕື່ມອີກວ່າ :
" ຄື ຈີນ ຫຼື ວຽດ ຈັ່ງຊີ້ ເຂົາຮູ້ພຶດຕິກຳຂອງເຈົ້າໜ້າທີ່ລາວ ເຂົາເຂົ້າຫາເຈົ້າເມືອງ ເຂົາເຂົ້າຫາເຈົ້າແຂວງ ເຂົາເຂົ້າຫາຣັຖມົນຕຣີໄດ້ ການດຳເນີນການທີ່ຈະບໍ່ຖືກ 100 ເປີເຊັນ ແຕ່ສາມາດເຮັດໃຫ້ມັນຖືກຕ້ອງ 100 ເປີເຊັນ ອັນນີ້ຄືປະສົບການຢູ່ລາວ ຍ້ອນວ່າ ບໍ່ມີຣະບຽບໃດທີ່ຊັດເຈນ."
ທ່ານ ກ່າວຕື່ມວ່າ: ການຈັດຕັ້ງເອງ ເຂົາເຈົ້າກະບໍ່ໄດ້ເຂັ້ມແຂງ ນຶ່ງເຂົາບໍ່ເຂັ້ມແຂວງ ສອງມາ ສື່ກາງຕ່າງໆ ກໍບໍ່ໄດ້ມີສ່ວນຊ່ອຍຫຍັງໃນເຣື່ອງນີ້ ຖ້າການຈັດຕັ້ງບໍ່ດຳເນີນການ ແລະ ສື່ບໍ່ໄດ້ຊ່ອຍຫຍັງ ມັນກະບໍ່ມີພລັງທີ່ຈະເຮັດໃຫ້ຂບວນການມັນຄືບຄານໄປໄວ. ທາງການລາວ ໃຫ້ສິດນັກລົງທຶນເກີນໄປຫຼາຍກວ່າຄົນລາວ ຈົນວ່າ ເຈົ້າໜ້າທີ່ທາງການລາວ ບໍ່ສາມາດໄປກວດກາໄດ້.
ປະຊາຊົນລາວ ທ່ານນຶ່ງ ໄດ້ກ່າວຕໍ່ເອເຊັຽເສຣີ ວ່າ:
“ແຕ່ບັດນີ້ລະໃຫ້ສິດເຂົາ ເອົາໄປມາ ໝາຍຄວາມວ່າ ມັນເປັນບ້ານຂອງເຂົາເລີຍລະ ເຮົາບໍ່ມີສິດໄປກ່ຽວຂ້ອງ ອັນນີ້ແຫຼະຈຸດອ່ອນຂອງເຮົາ ທຳມະດາລະ ຕ່າງປະເທດຢູ່ບ້ານ ເຮົາມັນຕ້ອງຢູ່ພາຍໃຕ້ກົດໝາຍຂອງລາວເຮົາລະເບາະ ລາວລະມີສິດກວດກະລະເບາະ ອັນນີ້ລະບໍ່ມີສິດ ເຂົາເຮັດຫຍັງກະໄດ້ຕາໃຈຂອງເຂົາ ໝາຍຄວາມວ່າ ໃຫ້ສິດເຂົາເໜືອກວ່າຄົນລາວ.”
ບັນຫາດັ່ງກ່າວ ມັນເປັນຈຸດອ່ອນຂອງທາງການລາວເອງ.
ປະຊາຊົນທ່ານນີ້ ກ່າວຕື່ມອີກວ່າ:
“ໝາຍຄວາມວ່າ ເຈົ້າໃຫ້ສິດອຳນາດເຂົາເໜືອ ກວ່າ ຄົນລາວ ເໜືອ ຣັຖບານລາວ ຣັຖບານລາວ ກະບໍ່ມີສິດເຂົ້າໄປກວດກາ ລະກະຄົນລາວເຮົາເຂົາໄປເຮັດ ກະສຸດແລ້ວແຕ່ເຂົາ ອັນນີ້ລະມັນຜິດລະເຣື່ອງຈຸດອ່ອນຂອງຄົນລາວເຮົາ.”
ນາຍຈ້າງທີ່ເປັນຄົນຈີນ ຈະສເນີ ໃຫ້ເງິນເດືອນສູງ ແກ່ຜູ້ທີ່ສມັກເຂົ້າໄປເຮັດວຽກ ຢູ່ເຂດເສຖກິຈພິເສດ ແລະ ນາຍຈ້າງຈີນຈະຮັບຜິດຊອບຄ່າໃຊ້ຈ່າຍທັງໝົດໃຫ້, ແຕ່ເວລາໄປຮອດແລ້ວ ຈະບໍ່ເປັນແນວນັ້ນ.
ນາຍຈ້າງຈີນ ຈະຄິດໄລ່ຄ່າໃຊ້ຈ່າຍໝົດທຸກຢ່າງ ຈົນເຮັດໃຫ້ຄົນລາວ ທີ່ໄປເຮັດວຽກນັ້ນຕົກເປັນໜີ້ ແລະ ບໍ່ສາມາດຍົກເລີກສັນຍາໄດ້.
ນາຍຈ້າງຈີນຈະບໍ່ອະນຸຍາດໃຫ້ກັບບ້ານໄດ້ ຖ້າບໍ່ມີເງິນມາຈ່າຍໜີ້ ຊຶ່ງບັນຫາດັ່ງກ່າວ ກໍເຮັດໃຫ້ຄົນງານລາວຫຼາຍຄົນຕ້ອງພາກັນລັກໜີ ແລະ ບາງຄົນກໍໃຫ້ຄອບຄົວເອົາເງິນມາໃຊ້ໜີ້ນາຍຈ້າງຈີນ ຈຶ່ງສາມາດກັບບ້ານໄດ້ ໃນຂະນະທີ່ຄົນງານລາວຫຼາຍຄົນ ກໍຍັງບໍ່ສາມາດກັບບ້ານໄດ້.
ຄົນງານຄົນນຶ່ງ ຜູ້ທີ່ສາມາດໜີອອກຈາກເຂດເສຖກິຈພິເສດສາມຫຼ່ຽມຄຳ ໄດ້ໃຫ້ສຳພາດຕໍ່ເອເຊັຽເສຣີ ວ່າ.
ນັກຂ່າວ: ທຳອິດນີ້ ເຮົາເຂົ້າໄປເຮັດວຽກຈັ່ງໃດນີ້?
ຄົນງານລາວ:
"ເຂົາບອກວ່າ ຈະມີບໍຣິສັດ ທີ່ຢູ່ຊັງຈ້ຽງຫັ້ນນ່າ ຄຸ້ມຄອງ ທີ່ຈິງໂຕເຮົາກໍຮູ້ຢູ່ແລ້ວວ່າ ຢູ່ທາງໃນຫັ້ນມັນລຳບາກຊ່ຳໃດ. ແຕ່ວ່າ ຕອນແລກກໍຄືຕິດຕໍ່ກັນຢູ່ຊັງຈຽງ ລະເຂົາກະຮັບປະກັນມາວ່າ ເອີຖ້າສົມມຸດວ່າ ມີບັນຫາອີ່ຫຍັງຫັ້ນນ່າ ເຂົາຈະດຶງກັບໃຫ້ ເຮົາກະເລີຍໝັ້ນໃຈ.
ລະ ບາດນີ້ ເຮົາໄປແລ້ວປະມານອາທິດແລກ ເຮົາແຊັດຫາໃຜບໍ່ໄດ້ເລີຍ ແຈ້ງຫາກະຄືວ່າ ບໍຣິສັດທີ່ຢູ່ຊັງຈຽງນີ້ ຖືວ່າ ແຊັດຫາໄດ້ແຕ່ຜູ້ດຽວ ແລະ ເຮົາກະບອກວ່າ ໃຫ້ຢູ່."
ນັກຂ່າວ: ທຳອິດເຂົາໄດ້ເວົ້າກັບເຈົ້າບໍ່ວ່າ ທຸກຢ່າງ ແມ່ນຄ່າໃຊ້ຈ່າຍ ບໍຣິສັດ ຮັບຜິດຊອບໝົດ?
ຄົນງານລາວ: "ຂະເຈົ້າເປັນຄົນເວົ້າວ່າ ຟີໝົດທຸກຢ່າງ ເຮົາກະຖາມຢ້ຳອີກເທື່ອນຶ່ງວ່າ ແມ່ນເຮົາບໍ່ໄດ້ເຮັດວຽກໃຊ້ໜີ້ແມ່ນບໍ່, ຂະເຈົ້າກະວ່າບໍ່ ທຸກຢ່າງຄື ບໍຣິສັດອອກໃຫ້ເອງຟີໝົດ."
ນັກຂ່າວ: ຕອນໃດ ທີ່ໄປສມັກນີ້?
ຄົນງານລາວ:
“ປະມານເດືອນ 2 ນີ້ລະອ້າຍ. ວັນທີ 10 ນີ້ລະ ໄປສມັກລະ ລະວັນທີ 16 ເດືອນທາງໄປ.”
ນັກຂ່າວ: ໄດ້ລົມກັນບໍ່ວ່າ ເງິນເດືອນທໍ່ໃດ? ການເຮັດວຽກຈັກໂມງຫາຈັກໂມງ? ໄດ້ລົງລາຍລະອຽດກັນບໍ່?
ຄົນງານລາວ:
"ກະຄືມີແຕ່ລົມກັນທາງວອດແອບ ບໍ່ໄດ້ລົງລາຍລະອຽດຫຍັງເລີຍ ມີແຕ່ລົມກັນທາງວອດແອບລະກະໂທລົມແດ່. ເບື້ອງຕົ້ນເຂົາເວົ້າວ່າ ເຮັດວຽກນີ້ ໄດ້ 12 ຊົ່ວໂມງ ເງິນເດືອນ 4,000 ຢວນ ເທົ່າກັບ 4 ລ້ານປາຍກີບ."
ນັກຂ່າວ: ຄ່າໃຊ້ຈ່າຍນີ້ ເຂົາບອກບໍ່ວ່າ ມັນມີຄ່າໃຊ້ຈ່າຍຫຍັງແດ່ ໃນເວລາທີ່ໄປຮອດລະ?
ຄົນງານລາວ:
“ທຸກຢ່າງເລີຍອ້າຍ ຕັ້ງແຕ່ຄ່ານ້ຳຄ່າໄຟ ເຂົາໄລ່ໝົດເລີຍ ທີ່ເປັນຂອງເຂົາ ເຂົາໄລ່ໝົດເລີຍ ເຮົາກິນເຂົ້າ ເຂົາກະເອົາ ເຮົາໃຊ້ຫຍັງເຂົາກະເອົານຳ.”
ນັກຂ່າວ: ຕົກເປັນມື້ນຶ່ງເທົ່າໃດ ຄ່າໃຊ້ຈ່າຍ?
ຄົນງານລາວ:
“ໂຕນີ້ ເຮົາໄດ້ຂໍລາຍລະອຽດໄປນຳ ຜູ້ທີ່ເກັບເງິນນຳເຮົາແລ້ວ ຄ້າຍໆ ແບບລາວ ເວົ້າອອກມາຊື່ໆ ຫັ້ນນ່າ. ແຕ່ວ່າ ເຮົາຂໍລາຍລະອຽດເອີ ຄ່ານີ້ທໍ່ໃດ ເປັນບິນຫັ້ນນ່າ ເປັນລາຍລັກອັກສອນຫັ້ນນ່າ ເຂົາກະບໍ່ເຮັດໃຫ້ເຮົາ.”
ນັກຂ່າວ: ສັນຍົງສັນຍາ ແຮງງານທີ່ ເຮົາໄດ້ເຊັນກັບເຂົາເດ້?
ຄົນງານລາວ:
“ແມ່ນມັນຄາດເຄື່ອນ ຈາກທີ່ຕົກລົງກັນໄວ້ກ່ອນທີ່ເຮົາຈະໄປ ມັນຄາດເຄື່ອນຫຼາຍ ມັນຕ່າງກັນແບບຄືພິກມືເລີຍອ້າຍ ລະນາທີນັ້ນຄືປະຕິເສດບໍ່ໄດ້. ປະຕິເສດຄືຈ່າຍເງິນຢ່າງດຽວ.”
ນັກຂ່າວ: ໃນສ່ວນຂອງເຈົ້າຕົກເປັນໜີ້ທໍ່ໃດ?
ຄົນງານລາວ:
“15,000 ຢວນ. ທຸກຄົນໄປ ຈະເປັນໜີ້ໝົດເລີຍ. ໄປຄາຊິໂນ ແມ່ນເປັນໜີ້ເລີຍ.”
ນັກຂ່າວ: ເຮັດໄດ້ດົນປານໃດ?
ຄົນງານລາວ:
“ຂອງເຮົາຫັ້ນ ແມ່ນ 2 ອາທິດ. ຄວາມຮູ້ສຶກວ່າ ເຮົາຖືກຕົວະລະ. ບໍ່ໄດ້ລະ ນອນກະບໍ່ໄດ້ນອນລະ. ເຂົາລົມນຳເຮົາເນາ 12 ຊົ່ວໂມງເຮັດວຽກ ແຕ່ທີ່ໄລ່ໆ ນີ້ ມັນບໍ່ແມ່ນ ມັນກາຍ 12 ຊົ່ວໂມງ ມັນ 14-15 ຊົ່ວໂມງ. ລະມັນຍາກບ່ອນໄປໃສກະບໍ່ໄດ້ ເຮັດຫຍັງແບບຊີວິດຂອງຕົວເອງບໍ່ມີເລີຍ. ຄືຖືກຄວບຄຸມໂດຍເຂົາເຈົ້າເລີຍຫັ້ນນ່າ.”
ນັກຂ່າວ: ເປັນຫຍັງເຂົາເຈົ້າຈັ່ງຄ່ອຍເຮັດຈັ່ງຊີ້ກັບເຮົາ ໄດ້ຖາມເຂົາເຈົ້າບໍ່?
ຄົນງານລາວ:
“ບໍ່ໄດ້ຖາມ ເພາະຕອນນັ້ນ ໂຕ້ຖຽງອີ່ຫຍັງກະບໍ່ກ້າ ຖິ່ນເຂົາເຈົ້າ ບໍ່ສາມາດຕໍ່ລອງເຂົາເຈົ້າໄດ້.”
ນັກຂ່າວ: ຫ້ອງນຶ່ງ ຢູ່ບ່ອນພັກ ມີນໍາກັນຈັກຄົນ?
ຄົນງານລາວ:
“ຫ້ອງນຶ່ງ 8 ຄົນ ບາງຫ້ອງກະ 9 ຄົນ ບາງຫ້ອງກະ 10 ຄົນ.”
ນັກຂ່າວ: ມີຄົນລາວພັກນຳກັນຫຼາຍປານໃດ ເທົ່າທີ່ເຮົາຮູ້?
ຄົນງານລາວ:
“ສ່ວນຫຼາຍມີແຕ່ຄົນລາວ 80 ເປີເຊັນ ມີແຕ່ຄົນລາວ.”
ນັກຂ່າວ: ມີຫຼາຍບໍ່ ນັບເປັນໂຕເລກໄດ້ບໍ່?
ຄົນງານລາວ:
“200-300 ຄົນນີ້ແຫຼະ.”
ນັກຂ່າວ: ຢູ່ຈັ່ງໃດຊັ້ນນະ?
ຄົນງານລາວ:
“ເພິ່ນວ່າ ດິ້ນຣົນເລີຍນະ. ດິ້ນຣົນສິດຊີວິດເລີຍ. ດິ້ນຣົນເລີຍ ສົມມຸດວ່າໄປວຽກ ບາງຄົນຕ້ອງຕື່ນແຕ່ 7 ໂມງ ຫຼືວ່າ 8 ໂມງ. ທັງໆທີ່ເວລານອນນີ້ກະ 1-2 ໂມງລະ. 7-8 ໂມງຕື່ນ ເພາະວ່າ ຫ້ອງນ້ຳມີຫ້ອງດຽວ ເຮົາກະຕ້ອງຕຣຽມຕົວຈັດເວລາໃຫ້ດີເນາະ. ໄປໃຫ້ຮອດບ່ອນເຮັດວຽກຫັ້ນ 10 ໂມງ ເປະເປະເລີຍ. ກາຍນຶ່ງນາທີ ລະແມ່ນເຂົາຈະຫັກ 100 ຢວນ, ເທື່ອທີ 2 ລະແມ່ນ 200 ຢວນ ເທື່ອທີ 3 ລະແມ່ນຖືກໄລ່ອອກ ລະກະຈະໄດ້ໃຊ້ໜີຫັ້ນນ່າ.”
ນັກຂ່າວ: ເຈົ້າໄດ້ຕິດຕໍ່ຫາໜ່ວຍງານທີ່ກ່ຽວຂ້ອງບໍ່?
ຄົນງານລາວ:
“ຕິດຕໍ່ ໜ່ວຍສະເພາະກິຈ ທັງຢູ່ໃນ ລະກະຢູ່ນອກເລີຍ ຕິດຕໍ່ທຸກຢ່າງທີ່ເຮົາສາມາດຕິດຕໍ່ໄດ້ ໃນເວລານັ້ນ ທັງກົມແຮງງານອີ່ຫຍັງເຂົາກະວ່າ ແຕ່ກົມແຮງງານ ເຂົາເຈົ້າບອກວ່າ ບໍ່ສາມາດຊ່ອຍໄດ້ ເພາະວ່າ ມັນຕິດສັນຍາເນາະ ແຕ່ເຮົາ ໂຊກດີທີ່ວ່າເຮົາລອດມາໄດ້.”
ນັກຂ່າວ: ຢູ່ໃນຫັ້ນວຽກທີ່ເຈົ້າເຮັດແມ່ນຫຍັງ?
ຄົນງານລາວ:
“ເປັນການປອມໂຕ ປອມເຟສ ປອມລາຍ ປອມທຸກຢ່າງ. ເຮົາຈະເອົາໂຕລະຄອນ ເອົາຮູບຈາກຄົນອື່ນທີ່ວ່າ ຢູ່ໃນອິນສະຕາແກຼມນະ ແລະ ກະມາສ້າງໂຕລະຄອນ ປັ້ນໂຕລະຄອນ ຢູ່ໃນເຟສ ຢູ່ໃນລາຍ ຈັ່ງຊີ້ນະ. ລະກະແຊັດຫາຄົນໄທຍ ສ່ວນຫຼາຍແມ່ນຄົນໄທຍ.”
ນັກຂ່າວ: ແຊັດວ່າ ຈັ່ງໃດລະ?
ຄົນງານລາວ:
“ກະຄ້າຍໆ ແບບຊູ້ສາວ ລົມເຣື່ອງຊູ້ສາວແລ້ວລະກະ ຊັກຊວນມາລົງທຶນໃນບິດຄອຍຈັ່ງຊີ້ນ່າ ແຕ່ ພໍເຂົາເຈົ້າລົງທຶນລະກະຖອນຍາກ ຖອນບໍ່ໄດ້ ບາງຄົນກະເປັນ ແສນ, ສອງແສນ.”
ນັກຂ່າວ: ຈັກຄົນລະ ທີ່ສາມາດຕິດຕໍ່ໄດ້?
ຄົນງານລາວ:
“ຂອງເຮົາບໍ່ໄດ້ ແຕ່ວ່າ ອັນເທົ່າທີ່ເຫັນລະແມ່ນຫຼາຍຢູ່ ຫຼາຍເຕີບຢູ່ ມື້ນຶ່ງລວມໆ ຢູ່ປະມານ 4-5 ລ້ານບາດ. ເຂົາຈະສ້າງແອບຂຶ້ນມາຄ້າຍໆ ໄອຄິວອອຟຊັ້ນນະ ແຕ່ວ່າ ໂຕນັ້ນ ເຂົາຈະຄວບຄຸມເອງເລີຍ.”
ເຈົ້າໜ້າທີ່ກະຊວງແຮງງານ ແລະ ສວັດດີການສັງຄົມ ຍັງບໍ່ທັນມີມາຕການ ຊ່ວຍເຫຼືອຄົນງານລາວທີ່ຕິດຄ້າງ ແລະ ຖືກກັກຂັງໜ່ວງໜ່ຽວ ຢູ່ໃນເຂດເສຖ ກິຈ ພິເສດສາມຫຼ່ຽມຄຳ.
ເອເຊັຽເສຣີ ພະຍາຍາມຕິດຕໍ່ຫາເຈົ້າໜ້າທີ່ ກົມຄຸ້ມຄອງແຮງງານ ກະຊວງແຮງງານ ແລະ ສວັດດີການສັງຄົມ ກ່ຽວກັບມາຕການຊ່ວຍເຫຼືອຄົນງານລາວ, ແຕ່ ເຈົ້າໜ້າທີ່ຜູ້ຮັບໂທລະສັບ ປະຕິເສດທີ່ຈະໃຫ້ຄຳເຫັນກ່ຽວກັບເຣື່ອງນີ້ ໂດຍເວົ້າພຽງແຕ່ວ່າ "ໃຫ້ເຮັດໃບສເນີມາ".
ນອກຈາກນີ້ ຍັງມີຄົນໄທຍຈຳນວນນຶ່ງ ທີ່ເຂົ້າມາເຮັດວຽກຢູ່ເຂດເສຖກິຈພິເສດສາມຫຼ່ຽມຄຳ ແລະ ກໍຕົກຢູ່ໃນຊາຕາກຳແບບຄົນງານລາວ.
ໃນວັນທີ 10 ມີນາ ທີ່ຜ່ານມາ, ສະຖານເອອັກຂ້າຣາຊທູດໄທຍ ປະຈຳລາວ ໄດ້ອອກແຈ້ງເຕືອນ ໃຫ້ຮູ້ວ່າ: ໃນໄລຍະທີ່ຜ່ານມາ ທາງສະຖານທູດ ໄດ້ຮັບລາຍງານວ່າ ມີຂະບວນການຕົວະຍົວະຄົນໄທຍ ແລະ ຊາວຕ່າງຊາດ ໃຫ້ເຂົ້າໄປເຮັດວຽກໃນພື້ນທີ່ ເຂດເສດຖະກິດພິເສດ ສາມຫຼ່ຽມຄຳ ແຂວງ ບໍ່ແກ້ວ, ປະເທດລາວ ໂດຍການຮັບສະໝັກທາງສື່ອອນລາຍ ຫຼື ໄດ້ຮັບການຊັກຊວນຈາກນາຍໜ້າທີ່ເປັນຄົນໄທຍ ໂດຍອ້າງວ່າມີລາຍຮັບ ແລະ ຄ່າຕອບແທນສູງ.
ທີ່ຜ່ານມາ ມີຄົນໄທຍ ຖືກຕົວະມາເຮັດວຽກຢູ່ເຂດພິເສດສາມຫຼ່ຽມຄຳ 24 ຄົນ ແລະ ໄດ້ຖືກທາງການໄທຍຊ່ວຍເຫຼືອ ກັບຄືນປະເທດແລ້ວ ໃນວັນທີ10-17 ມີນາ ທີ່ຜ່ານມາ.
ນອກຈານີ້ ໃນວັນທີ 21 ກຸມພາ ທີ່ຜ່ານມາ, ຫົວໜ້າຄະນະຄຸ້ມຄອງ ເຂດເສຖກິຈພິເສດ ແຂວງບໍ່ແກ້ວ ໄດ້ອອກແຈ້ງການ ເຖິງອຳນວຍການບໍຣິສັດ, ນັກທຸຣະກິດ, ຜູ້ປະກອບການ ແລະ ຜູ້ອອກແຮງງານພາຍໃນເຂດເສຖກິຈພິເສດ ສາມຫຼ່ຽມຄຳ ກ່ຽວກັບການຄຸ້ມຄອງແຮງງານ ແລະ ນຳໃຊ້ແຮງງານ ໃນເຂດ ເສຖກິຈພິເສດສາມຫຼ່ຽມຄຳ.
ແຈ້ງການ ຫົວໜ້າຄະນະຄຸ້ມຄອງ ເຂດເສຖກິຈພິເສດ ແຂວງບໍ່ແກ້ວ ໄດ້ລະບຸ ຕອນນຶ່ງວ່າ: ທຸກຫົວໜ່ວຍນຳໃຊ້ແຮງງານ, ຜູ້ອອກແຮງງານຫາກມີເຈຕນາຫຼົບຫຼີກ ຫຼື ສ້າງຄວາມຫຍຸ້ງຍາກໃນການ ເຮັດສັນຍາຄຸ້ມຄອງ ແລະ ນຳໃຊ້ແຮງງານ ເຊັນສັນຍາແຮງງານທີ່ບໍ່ຖືກຕ້ອງ ຕາມຣະບຽບການ ຫຼືໃຊ້ແຮງງານທີ່ບໍ່ມີສັນຍາແຮງງານ ແລະ ຣະບຽບຄຸ້ມຄອງແຮງງານທີ່ຢູ່ໃນເຂດ ເສຖກິຈພິເສດ ສາມຫຼ່ຽມຄຳຢ່າງເຂັ້ມງວດ ແລະ ຜູ້ນຳໃຊ້ແຮງງານຈະເປັນຜູ້ຮັບຜິດຊອບທັງໝົດ ຕໍ່ຄ່າເສັຽຫາຍທີ່ເກີດຂຶ້ນໃນກໍລະນີ ທີ່ມີການຂັດແຍ່ງກັນ.