ສານໄທຍ ຈະພິພາກສາຄະດີ ເຂື່ອນໄຊຍະບູຣີ
2022.08.04
ເຄື່ອຂ່າຍປະຊາຊົນໄທຍ 8 ແຂວງລຸ່ມນໍ້າຂອງ ຟ້ອງຮ້ອງການໄຟຟ້າ ຝ່າຍຜລິດ ແຫ່ງປະເທດໄທຍ ແລະໜ່ວຍງານທີ່ກ່ຽວຂ້ອງ ໃຫ້ຖອນສັນຍາຊື້-ຂາຍໄຟຟ້າ ຈາກເຂື່ອນໄຊຍະບູຣີ.
RFA
ສານປົກຄອງສູງສຸດ ຂອງໄທຍ ນັດຟັງຄຳພິພາກສາ ກໍຣະນີ ອົງການພາກປະຊາສັງຄົມໄທຍ ທີ່ເປັນເຄື່ອຂ່າຍປະຊາຊົນໄທຍ 8 ແຂວງ ລຸ່ມແມ່ນ້ຳຂອງ ໄດ້ຟ້ອງຮ້ອງການໄຟຟ້າຝ່າຍຜລິຕ ແຫ່ງປະເທດໄທຍ ແລະ ໜ່ວຍງານທີ່ກ່ຽວຂ້ອງ ໃຫ້ເພີກຖອນສັນຍາ ຊື້-ຂາຍ ໄຟຟ້າຈາກເຂື່ອນໄຊຍະບູຣີ ໂດຍໄດ້ກຳນົດຟັງ ຄຳພິພາກສາ ໃນວັນທີ 17 ສິງຫາ 2022.
ຍານາງ ອ້ອມບຸນ ທິບສຸນາ ທີ່ເປັນນຶ່ງໃນແທນໂຕແທນ ອົງການພາກປະຊາສັງຄົມໄທຍ ໃນຖານະເປັນຜູ້ຟ້ອງລຳດັບທີ 4 ຂອງຄະດີນີ້ ກ່າວຕໍ່ວິທຍຸເອເຊັຽເສຣີ ໃນວັນທີ 4 ສິງຫາ ວ່າ:
“ເດົາໃຈບໍ່ຖືກວ່າ ສານຈະຕັດສິນອອກມາແນວໃດ ຍັງຕ້ອງລໍຖ້າລຸ້ນ ຢ່າງດຽວ ເຊິ່ງທາງເຄືອຂ່າຍ ຈະປຶກສາຫາລື ກັນໃນມື້ວັນທີ 4 ສິງຫານີ້ ບໍ່ວ່າ ຈະເສັຽ ຫຼື ຊະນະ ຈະຍົກຟ້ອງ ຫຼື ບໍ່ຍົກຟ້ອງ ພວກເຮົາກໍຄົງ ຕ້ອງໄປຮັບຟັງຄຳພິພາກສາ ເພື່ອໃຫ້ເຫັນວ່າ ປະເດັນນີ້ ມັນເປັນບັນຫາ ແມ່ນໄດ້ເກີດຜົລກະທົບຂຶ້ນແລ້ວ ແລະ ເຣື່ອງອະທິປະໄຕ ແຕ່ລະປະເທດ ທີ່ໃຊ້ແມ່ນ້ຳຂອງຮ່ວມກັນ.”
ເຂື່ອນໄຊຍະບູຣີ ທີ່ສ້າງໃສ່ແມ່ນ້ຳຂອງ ມັນເປັນຜົລກະທົບ ຂ້າມຊາຍແດນ. ທ່ານ ຈິຣະສັກ ອິນທະຍົດ ຜູ້ປະສານງານ ເຄື່ອຂ່າຍກຸ່ມຮັກຊຽງຂອງ ແຂວງຊຽງຮາຍ ທີ່ເປັນອົງການ ພາກປະຊາສັງຄົມໄທຍ ໄດ້ກ່າວວ່າ:
“ກະລໍຖ້າຟັງ ຢູ່ຄືກັນ ຊາວບ້ານ ກໍໄດ້ແຕ່ຫວັງວ່າ ສານຈະໃຫ້ຄວາມເມດຕາ ພວກເຮົາ ກໍຄິດວ່າ ສານຈະຕ້ອງເຮັດໜ້າທີ່ ແຕ່ກໍຫວັງວ່າ ຊາວບ້ານ ຈະໄດ້ຮັບການປົກປ້ອງ ເພາະວ່າ ມັນເປັນຜົລກະທົບ ຂ້າມຊາຍແດນ ເຊິ່ງຖ້າເບິ່ງຈຸດນີ້ ກໍຈະເຫັນເຣື່ອງສິ່ງທີ່ຈະຕາມມາ ວ່າສະຖານການແມ່ນ້ຳຂອງ ຈະເປັນແນວໃດ.”
ປານ້ຳຂອງ ກໍເຣີ່ມຫາຍາກຂຶ້ນກວ່າເກົ່າ ຍ້ອນມີຈຳນວນລົດລົງ. ທ່ານ ຊານນະຣົງ ວົງລາ ຜູ້ຕາງໜ້າກຸ່ມຮັກຊຽງຄານ ແຂວງເລີຍ ປະເທດໄທຍ ໄດ້ກ່າວວ່າ:
“ຄັນເວົ້າເຖິງຄາມຮູ້ສຶກ ໃນເວລານີ້ ກໍບໍ່ແຕກຕ່າງຫຍັງ ຈາກທີ່ຜ່ານໆມາ ຄື ມີຄວາມຮູ້ສຶກເສີຍໆ ຄືກັນ ກັບທີ່ຜ່ານມາ ເຊິ່ງຕອນນີ້ ຍົກໂຕຢ່າງ ເປັນຕົ້ນ ເວລານັກທ່ອງທ່ຽວ ມາທ່ຽວ ເມືອງຊຽງຄານ ພວກເຮົາ ບໍ່ສາມາດຈັດຫາປາ ໃນແມ່ນ້ຳຂອງ ເພື່ອມາຕຣຽມເປັນອາຫານ ໃຫ້ແກ່ນັກທ່ອງທ່ຽວໄດ້ ເພາະວ່າ ປານ້ຳຂອງຫາຍາກຂຶ້ນຫຼາຍເຕີບ.”
ຊາວບ້ານເອງ ກໍຫວັງວ່າ ຈະໄດ້ຮັບຄວາມເປັນທັມ ໃນກໍຣະນີດັ່ງກ່າວ. ຍານາງ ສອນ ຈຳປາດອກ ຊາວປະມົງພື້ນບ້ານ ແຂວງອຸບົນຣາຊທານີ ໃນຖານະຜູ້ຟ້ອງລຳດັບທີ 37 ຂອງຄະດີນີ້ ໄດ້ກ່າວວ່າ:
“ກະຢາກໃຫ້ຄວາມເປັນທັມກັບປາ ຫຼືວ່າ ກັບຊຸມຊົນບ້ານ. ໂອ! ດຽວນີ້ຫາປາ ໜ້ອຍລົງ ຊຸມຊົນນີ້ກະຫາແຕ່ບໍ່ໄດ້ກິນ. ກະເຄີຍໄດ້ຫຼາຍກະບໍ່ໄດ້ຫັ້ນນ່າ ດຽວນີ້ ກະລົງຫາຄືເກົ່າ ແຕ່ມັນກະບໍ່ໄດ້ ບາດຣາຍໄດ້ຫຼາຍຢູ່ຊູ່ມື້ນີ້.”
ສຳລັບຄະດີຟ້ອງຮ້ອງ ກ່ຽວກັບເຂື່ອນໄຊຍະບູຣີ ໄດ້ມີຂຶ້ນນັບແຕ່ວັນທີ 7 ສິງຫາ ປີ 2012 ໂດຍແມ່ນ ໂຕແທນ ອົງການພາກປະຊາສັງຄົມ ທີ່ເປັນເຄືອຂ່າຍປະຊາຊົນ 8 ແຂວງ ລຸ່ມແມ່ນ້ຳຂອງຈຳນວນ 37 ຄົນ ໄດ້ຍື່ນຟ້ອງຄະດີ ຕໍ່ສານປົກຄງກາງຂອງໄທຍ ກ່ອນທີ່ຈະມີການກໍ່ສ້າງເຂື່ອນ ໄຊຍະບູຣີ.
ມາຮອດວັນທີ 25 ທັນວາ 2015 ສານປົກຄອງກາງຂອງໄທຍ ກໍໄດ້ມີຄຳສັ່ງຍົກຟ້ອງຄະດີ ດັ່ງກ່າວ, ແຕ່ ຜູ້ຟ້ອງຮ້ອງຄະດີດັ່ງກ່າວ ກໍຄື ອົງການພາກປະຊາສັງຄົມໄທຍ ໄດ້ຍື່ນອຸທອນ ຕໍ່ສານປົກຄອງສູງສຸດຂອງໄທຍ ແລະ ຄະດີດັ່ງກ່າວກໍແກ່ຍາວ ມາເຖິງປັດຈຸບັນ.