ຄວາມຮ່ວມມື ລະຫວ່າງແມ່ນ້ຳຂອງ-ແມ່ນ້ຳລ້ານຊ້າງ ເໜັ້ນໜັກສະເພາະ ດ້ານເສດຖະກິດ

ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ແລະລັດຖະມົນຕີກະຊວງການຕ່າງປະເທດ ສປປ ລາວ ເຂົ້າຮ່ວມກອງປະຊຸມ ວ່າດ້ວຍການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ເມື່ອວັນທີ່ 16 ສິງຫາ 2024 ທີ່ເມືອງຊຽງໃໝ່ ປະເທດໄທ. ຕໍ່ກອງປະຊຸມດັ່ງກ່າວ ເຈົ້າໜ້າທີ່ຈາກຫຼາຍພາກສ່ວນທັງໃນລາວແລະໄທ ເຫັນວ່າ ການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງນີ້ ເໜັ້ນໜັກໃສ່ການພັດທະນາເສດຖະກິດ ຫຼາຍກວ່າການປົກປັກຮັກສາ ສິ່ງແວດລ້ອມ ແລະຄວາມຍືນຍົງ ຂອງແມ່ນ້ຳຂອງ.

ໜຶ່ງໃນເຈົ້າໜ້າທີ່ນັ້ນ ກໍແມ່ນ ເຈົ້າໜ້າທີ່ກະຊວງອຸດສາຫະກຳ ແລະການຄ້າຂອງລາວ ທ່ານໜຶ່ງ ທີ່ບໍ່ປະສົງບອກຊື່ ແລະຕຳແໜ່ງ ກໍມີຄຳເຫັນໃນທຳນອງນັ້ນວ່າ ທຸກຄົນ ທຸກຝ່າຍຫຼືທຸກປະເທດ ກໍເຮັດເພື່ອຜົນປະໂຍດກຳໄລຂອງຕົນທັງນັ້ນ.

“ຈີນ ເຂົາກໍເຮັດເພື່ອຜົນກຳໄລຄືກັນ ຄົນເຈົ້າບໍ່ທັນ ຕ້ອງໄດ້ຍອມເສຍປຽບຄືວ່າຫັ້ນແຫຼະ. ເບິ່ງນັ້ນ ເບິ່ງນີ້ ປັບຕົວເອງໃຫ້ເຂົ້າກັບເງື່ອນໄຂ ຄຳວ່າ ທຸລະກິດມັນບໍ່ມີພີ່ ມີນ້ອງໃດ໋.”

ເຈົ້າໜ້າທີ່ ກະຊວງອຸດສາຫະກຳ ແລະການຄ້າຂອງລາວທ່ານນີ້ ອະທິບາຍໃຫ້ວິທະຍຸເອເຊັຽເສຣີ ຟັງໃນວັນທີ່ 19 ສິງຫາ 2024 ນີ້ຕື່ມວ່າ ຈິງຢູ່ ທີ່ວ່າ ກອງປະຊຸມວ່າດ້ວຍການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ຖືກຈັດຕັ້ງຂື້ນມາ ກໍເພື່ອສົ່ງເສີມການຮ່ວມມື ເປັນຕົ້ນການຮ່ວມມືເພື່ອຄວາມຍືນຍົງຂອງແມ່ນ້ຳຂອງແລະແມ່ນ້ຳລ້ານຊ້າງ. ອີກຈຸດປະສົງໜຶ່ງ ກໍແມ່ນ ເພື່ອຫຼຸດຜ່ອນຄວາມເລື່ອມລ້ຳ ທາງດ້ານການພັດທະນາລະຫວ່າງປະເທດໃນຂົງເຂດ. ແຕ່ໃນພາກປະຕິບັດຕົວຈິງແລ້ວ, ຜົນປະໂຫຍດສ່ວນຫຼາຍ ກໍຕົກໄປຢູ່ກັບປະເທດທີ່ມີອຳນາດຫຼາຍກວ່າ ຕົວຢ່າງ ຈີນ ທີ່ເປັນປະເທດມະຫາອຳນາດໃນພາກພື້ນ ພ້ອມທັງເປັນປະເທດຕົ້ນທາງ ໄດ້ສ້າງເຂື່ອນຫຼາຍໆແຫ່ງ ໃສ່ແມ່ນ້ຳລ້ານຊ້າງ ຊຶ່ງກໍເປັນແມ່ນ້ຳຂອງຕອນເໜືອ ຫຼືແມ່ນ້ຳຂອງໃນປະເທດຈີນ ແລະປະເທດຈີນ ກໍຮັບຜົນປະໂຫຍດຈາກການສ້າງເຂື່ອນຄິດໄລ່ເປັນເງິນມະຫາສານ; ແຕ່ໃນຂະນະດຽວກັນ ປະເທດນ້ອຍດ້ອຍພັດທະນາໃນພາກລຸ່ມ ຊໍ້າພັດໄດ້ຮັບຜົນກະທົບແລະຕົກຢູ່ໃນທ່າເສຍປຽບເກືອບທຸກດ້ານ ຕົວຢ່າງປະເທດລາວ ທີ່ມີອຳນາດໜ້ອຍໃນການຕໍ່ລອງ ກໍປະສົບກັບບັນຫາແມ່ນ້ຳຂອງບົກແຫ້ງ ນ້ຳຂື້ນໆລົງບໍ່ປົກກະຕິ ແລະປາກໍມີຈຳນວນຫຼຸດໜ້ອຍຖອຍລົງ.

ເຊັ່ນດຽວກັນ ທ່ານ ນິວັດ ຮ້ອຍແກ້ວ ປະທານກຸ່ມຮັກຊຽງຂອງ ທີ່ແຂວງຊຽງຮາຍຂອງໄທ ກໍມີຄຳເຫັນວ່າ ກອງປະຊຸມຄັ້ງນີ້ ໄດ້ຫາລືກັນກ່ຽວກັບການເຮັດທຸລະກິດຫຼາຍກວ່າ ເປັນຕົ້ນໄດ້ເວົ້າເຖິງການລົງທຶນເພື່ອຜະລິດພະລັງງານນ້ຳແລະການຂົນສົ່ງທາງນ້ຳ ຫຼາຍກວ່າ ການປົກຮັກສາສິ່ງແວດລ້ອມແລະຄວາມຍືນຍົງຂອງແມ່ນ້ຳຂອງ ໂດຍສະເພາະບໍ່ໄດ້ເວົ້າເຖິງການແກ້ໄຂຜົນກະທົບຈາກການສ້າງເຂື່ອນຕ່າງໆນັ້ນເລີຍ.

ທ່ານ ນິວັດ ຮ້ອຍແກ້ວ ອະທິບາຍຕື່ມວ່າ:

“ເຮົາເຫັນແມ່ນ້ຳຂອງ ຖືກທຳລາຍມາຕະຫຼອດ ແມ່ນ້ຳຂອງໃນປັດຈຸບັນ ມີບັນຫາຫຼາຍຢ່າງ ແຕ່ທີ່ຜ່ານມາ ກອງປະຊຸມມີແຕ່ເວົ້າເຖິງເລື່ອງເສດຖະກິດທັງນັ້ນ ພວກເຂົາເຫັນຄວາມສຳຄັນທາງດ້ານເສດຖະກິດ ຫຼາຍກວ່າຄວາມຍືນຍົງຄົງຢູ່ຂອງແມ່ນ້ຳຂອງ.”

ທາງດ້ານເຈົ້າໜ້າທີ່ທະນາຄານພັດທະນາອາຊີຫຼື ADB ກ່າວວ່າ ເທົ່າທີ່ຜ່ານມາ ການຮ່ວມມືລະຫວ່າງປະເທດແມ່ນ້ຳຂອງແລະປະເທດແມ່ນ້ຳລ້ານຊ້າງ ກໍຄືຈີນ ຍັງບໍ່ໄດ້ຮັບຜົນສຳ ເລັດພໍເທົ່າໃດ. ຄວາມຈິງແລ້ວ ການຮ່ວມມືດັ່ງກ່າວ ມີຈຸດປະສົງເພື່ອການເຊື່ອມໂຍງ ເພື່ອພັດທະນາເສດຖະກິດ ການຜະລິດ ການກະເສດ ພັດທະນາຊັບພະຍາກອນນ້ຳ ແລະກໍເພື່ອຫຼຸດຜ່ອນຄວາມທຸກຍາກ; ແຕ່ໃນພາກປະຕິບັດຕົວຈິງ ຜ່ານມາ ກອງປະຊຸມການຮ່ວມມືດັ່ງກ່າວ ມີແຕ່ເວົ້າເຖິງການລົງທຶນເພື່ອສ້າງເຂື່ອນໄຟຟ້າໃສ່ແມ່ນ້ຳຂອງຫຼາຍກວ່າ ທັງໆທີ່ເຂື່ອນໄດ້ສົ່ງຜົນກະທົບຕໍ່ສິ່ງແວດລ້ອມແລະຊີວິດການເປັນຢູ່ຂອງປະຊາຊົນໃນພາກລຸ່ມຢ່າງແຮງ. ເຈົ້າໜ້າທີ່ ເອດີບີ່ຜູ້ນີ້ ກ່າວອີກວ່າ:

“ຕາມການຮ່ວມມືຂອງນ້ຳຂອງ ກະຖືວ່າມັນກະເປັນຄວາມຮ່ວມມືອັນໃດອັນໜຶ່ງ ຊິຍັງບໍ່ເປັນຮູບປະທຳຫຼາຍເທົ່າໃດ ກະອີງໃສ່ວ່າ ທາງດ້ານໄຟຟ້າຈາກພະລັງງານນ້ຳນີ້ນຳ ກະຊິຜະລິດໃຫ້ໃຜ.”

ເຖິງຢ່າງໃດກໍຕາມ ເຈົ້າໜ້າທີ່ຜະແນກພະລັງງານແລະບໍ່ແຮ່ຂອງແຂວງໄຊຍະບຸລີທ່ານໜຶ່ງ ກໍເຊື່ອວ່າ ການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ເປັນການຮ່ວມມືທີ່ເປັນປະໂຫຍດສຳລັບທຸກປະເທດ ເປັນຕົ້ນສຳລັບສປປລາວແລະປະຊາຊົນລາວ ດັ່ງທ່ານໄດ້ກ່າວວ່າ:

“ກະຊວງການຕ່າງປະເທດ ມີຈຸດປະສົງເປົ້າໝາຍ ທີ່ມັນຕິດພັນກັບຜົນປະໂຫຍດລວມແທ້ໆ; ຕອນລຸ່ມແມ່ນ້ຳຂອງນີ້ ມັນມີບົດບາດເນາະ ມັນເປັນການຕິດພັນກັບເລື່ອງຊຸມຊົນ ກັບຊາວບ້ານນີ້ ເພິ່ນໃຫ້ຄວາມສຳຄັນຫຼາຍ.”

ທ່ານ ສະເຫຼີມໄຊ ກົມມະສິດ ຕາງໜ້າຄະນະຜູ້ແທນລາວ ກ່າວໃນກອງປະຊຸມວ່າດ້ວຍການຮ່ວມມືລະຫວ່າງປະເທດແມ່ນ້ຳຂອງແລະປະເທດແມ່ນ້ຳລ້ານຊ້າງເທື່ອນີ້ວ່າ ຕະຫຼອດໄລຍະເວລາແປດປີທີ່ຜ່ານມາ ປະເທດຈີນ ໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດລາວ ເປັນຕົ້ນໄດ້ພັດທະນາຊັບພະຍາກອນມະນຸດ ພັດທະນາຂະແໜງກະສິກຳ ພະລັງງານແລະການທ່ອງທ່ຽວໃນລາວ.

ນອກຈາກເລື່ອງທຸລະກິດແລ້ວ ກອງປະຊຸມເທື່ອນີ້ ຍັງໄດ້ຫາລືກັນກ່ຽວກັບການແກ້ໄຂບັນຫາຂ້າມຊາດຫຼາຍຢ່າງ ເປັນຕົ້ນບັນຫາມົນລະພິດທາງອາກາດ ບັນຫາອາດຊະຍາກຳ ແລະການຄ້າຢາເສບຕິດ.