ປະຕິກິຣິຍາ ຊາວລາວ ຕໍ່ກັບການປັບປຸງ ປະຕູໄຊ

ຊາວລາວຈໍານວນນຶ່ງ ບໍ່ເຫັນດີກັບການປັບປຸງອານຸສາວະລີ ຫຼື ປະຕູໄຊ ໃນຮູບໃໝ່ ດ້ວຍການຕັດຕົ້ນໄມ້ອອກບາງສ່ວນ ແລະ ມີການປະດັບດ້ວຍຫີນຕ່າງໆ ຍ້ອນວ່າ ຈະເຮັດໃຫ້ອາກາດຮ້ອນ ໃນຕອນກາງເວັນ.

ຊາວລາວ ທ່ານນຶ່ງ ໄດ້ກ່າວຕໍ່ວິທຍຸ ເອເຊັຽເສຣີ ໃນວັນທີ 12 ມົກກະຣາ ວ່າ:

“ເພິ່ນກະມີການປັບປຸງປະຕູໄຊ ເປັນຕົ້ນໄມ້ບໍ່ມີແລ້ວ ເພາະວ່າ ເພິ່ນເອົາຕົ້ນໄມ້ໃຫຍ່ອອກ ເພິ່ນເອົາຕົ້ນສົນອອກ ແລ້ວປູກແບບຕົ້ນໄມ້ເລັກໆໃສ່. ອາກາດມັນກະຕອນກາງເວັນກະຮ້ອນ ເຈົ້າ.”

ສ່ວນບາງຄົນເຫັນວ່າ ຮູບແບບໃໝ່ ເຮັດໃຫ້ມີຄວາມສວຍງາມ ສະເພາະຕອນກາງຄືນເທົ່ານັ້ນ ເພາະມີການເປີດໄຟ ປະດັບຕ່າງໆ ແຕ່ຕອນກາງເວັນ ບໍ່ເປັນຕາໄປທ່ຽວ ເພາະວ່າ ອາກາດຮ້ອນຫຼາຍ.

ຊາວລາວອີກທ່ານນຶ່ງ ກ່າວວ່າ:

“ຕົ້ນໄມ້ເພິ່ນເອົາອອກ ແລ້ວເພິ່ນປູກຫຍ້າອີ່ຫຍັງໃສ່ຕື່ມ ແລ້ວກໍປູກຕົ້ນໄມ້ຕື່ມປະດັບປະດາ ອິຫຍັງຕື່ມ ແຕ່ວ່າ ມັນກະຍັງບໍ່ທັນໄດ້ໃຫຍ່ນ່າ. ຕົ້ນໄມ້ ມັນກະດີ ມັນກະງາມຂຶ້ນ ມັນກະງາມຫຼາຍ ແຕ່ວ່າ ຄິດວ່າ ຕອນແລງ ມັນກະງາມກວ່າ. ຖ້າຈະໄປປະຕູໄຊ ກວ່າຕອນເວັນ.​”

ສ່ວນງົບປະມານ ທີ່ໃຊ້ໃນການປັບປຸງ ປະຕູໄຊໃນຄັ້ງນີ້, ທາງການລາວລາວ ຍັງບໍ່ມີການເປີດເຜີຍອອກມາ, ແຕ່ເຖິງຢ່າງໃດກໍຕາມ, ຊາວລາວ ຈໍານວນນຶ່ງ ເຫັນດີກັບການປັບປຸງປະຕູໄຊ ໃນຮູບແບບໃໝ່ ເພື່ອຄວາມທັນສໄມ ແລະ ດຶງດູດນັກທ່ອງທ່ຽວ.

ຊາວລາວອີກທ່ານນຶ່ງ ໄດ້ກ່າວວ່າ:

“ເພິ່ນກະເລີ່ມຈະປູກຕົ້ນໄມ້ ທົດແທນໃສ່ຕື່ມຫັ້ນນ່າ ເພິ່ນມີແຜນຈະປູກ ຈະອັນນັ້ນ ຕົກແຕ່ງໃຫ້ຕື່ມຫັ້ນນ່າ ເພິ່ນມີການປັບປຸງ ແບບໃຫ້ມັນດີຂຶ້ນຫັ້ນນ່າ ງາມຕາຣົ້ມຣື້ນ ແຕ່ເພິ່ນກະມີແຜນປູກຕົ້ນໄມ້ທົດແທນໃສ່ຕື່ມຫັ້ນນ່າ.”

ສ່ວນຊາວລາວອີກທ່ານ ກ່າວວ່າ ການປັບປຸງປະຕູໄຊ ເພື່ອຄວາມທັນສໄມ:

“ມັນກໍວ່າຕາມເຟສບຸກຄ໌ທີ່ວ່າ ບາງຄົນຊື່ໆ ດອກ ເພາະວ່າ ທີ່ຈິງມັນກະປັບປຸງຖືວ່າ ພັທນາຫັ້ນແຫຼະ ປັບປຸງກະສ່ວນວ່າ ຫຼາຍກະມີແຕ່ເອົາຕົ້ນໄມ້ຫັ້ນອອກຊື່ໆ ແລ້ວກະເປີດຈາກນັ້ນກະຮູບໂສມເກົ່າໝົດທຸກຢ່າງ ຕົ້ນໄມ້ບໍ່ມີແລ້ວ ມີແຕ່ວ່າ ເຂົາເປີດແສງສີ ເປັນໄຟໃຫ້.”

ທາງການລາວ ມີການປັບປຸງເຂດປະຕູໄຊ ຍ້ອນວ່າ ລາວເປັນເຈົ້າພາບ ຈັດກອງປະຊຸມອາຊ້ຽນ ແລະ ເປີດປີທ່ອງທ່ຽວ ນໍາອີກ.

ອະດີດເຈົ້າໜ້າທີ່ ຂແນງການທ່ອງທ່ຽວ ທ່ານນຶ່ງ ໄດ້ກ່າວວ່າ:

“ເບື້ອງຄົນກະມີຫາງສຽງຫັ້ນແລ້ວ ຫາງສຽງແນວນັ້ນແນວນີ້ແລ້ວ ວ່າ ມັນເອົາກົກໄມ້ ກົກຕອກອອກ ມັນແປງມັນຫຍັງຫັ້ນນ່າ ແຕ່ວ່າ ບາດເຮົາມາເປີດການນໍາໃຊ້ແລ້ວ ມັນຈະບໍ່ແມ່ນຢູ່ໃນລັກສະນະເກົ່າ ຂອງເຮົາຮັບການພັທນາ ມັນກະຕ້ອງມີອັນໃດປູກເພິ່ມຂຶ້ນຕື່ມ ຂຶ້ນໃໝ່ ພໍດີກັບເຮົາເປັນເຈົ້າພາບອາຊ້ຽນ ເປີດປີທ່ອງທ່ຽວ.”

ສໍາລັບການປັບປຸງປະຕູໄຊ ໄດ້ເຣີ່ມຂຶ້ນ ແຕ່ເດືອນມິຖຸນາ ຫາ ທ້າຍເດືອນ ສິງຫາ 2023 ໂດຍມີການປັບປຸງສວນຫຍ້າ, ສວນດອກໄມ້ ແລະ ສິ່ງອໍານວຍຄວາມສະດວກອື່ນໆ ເພື່ອຕ້ອນຮັບການເປັນເຈົ້າພາບຈັດກອງປະຊຸຸມອາຊ້ຽນ ປີ 2024 ແລະ ມີການປັບປຸງເຂດປະຕູໄຊ ເພື່ອໃຫ້ນັກທ່ອງທ່ຽວມາທົ່ວຊົມພາຍໃນປະຕູໄຊ ຊັ້ນ 2 ແລະ ຊັ້ນ 3 ແລະ ມີການເກັບຄ່າບໍຣິການ ຄັ້ງລະ 30,000 ກີບ ຕໍ່ຄົນ.