ໄຟໄໝ້ສນາມຂີ້ເຫຍື້ອ ຫຼັກ 32

ເມື່ອວັນທີ 5 ມີນາ ຜ່ານມາ ຫ້ອງການຄຸ້ມຄອງ ແລະບໍຣິຫານຕົວເມືອງ ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງ ປະຊຸມດ່ວນ ເພື່ອຫາທາງແກ້ໄຂບັນຫາຄວັນຜິດ ທີ່ເກີດຈາກກອງໄຟໄໝ້ ສນາມຂີ້ເຫຍື້ອຫຼັກ 32 ບ້ານາຜາສຸກ ເມືອງໄຊທານີ ນະຄອນຫຼວງວຽງຈັນ ໃນວັນທີ 4 ມີນາ ຜ່ານມາ. ໂດຍສັ່ງໃຫ້ ຄ ບ ຕ ແລະໜ່ວຍກູ້ພັຍ ນະຄອນຫຼວງວຽງຈັນ ນຳຣົດສີດນໍ້າ ກວ່າ 10 ຄັນ ໄປສີດນໍ້າດັບຄວັນ ແລະ ເຝົ້າລະວັງຢ່າງໃກ້ຊິດ. ດັ່ງເຈົ້າໜ້າທີ່ ຫ້ອງການຄູ້ມຄອງ ແລະ ບໍຣິຫານ ຕົວເມືອງ ນະຄອນຫຼວງ ວຽງຈັນ ກ່າວຕໍ່ ວິທຍຸເອເຊັຽເສຣີ ເມື່ອວັນທີ 05 ມີນາ ນີ້ວ່າ:

"ໂດຍພື້ນຖານແລ້ວ ພວກເຮົາກໍ່ສາມາດດັບມອດໄດ້ແລ້ວເນາະ ແຕ່ວ່າປັດຈຸບັນນີ້ມັນຍັງຄວັນ ມັນຄວັນຫັ້ນດຽວນີ້ ໄທເຮົາຍັງ ປະຊຸມກັນຢູ່ ໂດຍທ່ານ ຮອງເຈົ້າແຂວງ ເພິ່ນມາຈັດກອງປະຊຸມ ປຶກສາຫາລືເນາະຮ່ວມກັບຫຼາຍພາກສ່ວນ ກໍ່ຍັງບໍ່ໄດ້ ຮັບການຣາຍງານເທື່ອເນາະ ເພາະວ່າພວກເຮົາ ກໍ່ຍັງປຶກສາຄົ້ນຄວ້າກັນຢູ່ ແລ້ວກໍ່ຍັງບໍ່ໄດ້ ຮັບການຣາຍງານ ຈາກເຂດນອກເຂົ້າມາເທື່ອເນາະ."

ທ່ານ ກ່າວຕື່ມວ່າພາຍຫຼັງທີ່ຮູ້ວ່າໄຟໄໝ້ສນາມຂີ້ເຫຍື້ອຫຼັກ 32 ເຈົ້າໜ້າທີ່ ຄ ບ ຕ ກໍ່ໄດ້ນຳຣົດສີດນໍ້າໄປດັບ ຊຶ່ງໃຊ້ເວລາຫຼາຍຊົ່ວໂມງ ກວ່າໄຟຈະມອດ ແຕ່ວ່າຍັງເຫຼືອຄວັນໄຟ ທີ່ເປັນຄວັນພິດ ທີ່ເກີດຈາກການສະສົມ ຂອງຂີ້ເຫຍື້ອມາດົນນານ ແລະ ຊຶ່ງເປັນອັນຕະລາຍ ຕໍ່ກັບສຸຂພາບຮ່າງກາຍ. ເນື່ອງຈາກຄວັນພິດ ໄດ້ລອຍກະຈາຍໄປຕາມລົມ ແລະ ສົ່ງກິ່ນເໝັນໄປທົ່ວບໍຣິເວນນັ້ນ.

ສ່ວນສາເຫດ ທີ່ເຮັດໃຫ້ເກີດໄຟໄໝ້ ເຈົ້າໜ້າທີ່ບອກວ່າເປັນເພາະປະຊາຊົນ ໃນເຂດນັ້ນເຜົາຂີ້ເຫຍື້ອ ເຮັດໃຫ້ໄຟລຸກລາມ ເຂົ້າມາໃນ ສນາມຂີ້ເຫຍື້ອ ຢ່າງວ່ອງໄວ ປະກອບກັບບໍຣິເວນນັ້ນ ມີແຕ່ຫຍ້າແຫ້ງ ເຮັດໃຫ້ໄຟຕິດໄຟງ່າຍ. ໄຟໃໝ້ເທື່ອນີ້ຖືວ່າ ຮ້າຍແຮງ. ທາງດ້ານ ເຈົ້າໜ້າທີ່ ຜແນກອຸດສາຫະກັມການຄ້າ ເມືອງໄຊທານີ ກ່າວຕໍ່ວິທຍຸ ເອເຊັຍເສຣີ ໃນວັນທີ 05 ມີນາ ນີ້ວ່າ, ເຫດໄຟໄໝ້ຄັ້ງນີ້ ບໍ່ໄດ້ມີ ຜົນກະທົບ ຕໍ່ເຂດອຸດສາຫະກັມ ແຕ່ຢ່າງໃດ ເນື່ອງຈາກຢູ່ໄກກັນ ພໍສົມຄວນ.

"ແຕ່ວ່າຕົວນີ້ຍັງບໍ່ທັນໄດ້ຮັບ ເພາະວ່າທັມມະດາຜັງເມືອງຕ້ ອງລົງມາແລ້ວ ຄັນວ່າມີສະພາບຫັ້ນ ແຕ່ວ່າບໍ່ໄດ້ຮັບ ຕົວກອງຂີ້ເຫຍື້ອຫັ້ນ ປົກກະຕິ ດອກ ແຕ່ລະປີຍາມຮ້ອນຫັ້ນແຫຼະ ເຂົາຈູດປ່າແລ້ວມັນມາ ແລ້ວລະໄໝ້ ເອີຫຍ້າມັນກໍ່ແຫ້ງເດ້."

ເຈົ້າໜ້າທີ່ ຫ້ອງການຄຸ້ມຄອງ ແລະ ບໍຣິຫານຕົວເມືອງວຽງຈັນ ກ່າວຕື່ມວ່າ ເພື່ອຄວາມປອດພັຍ ຂອງປະຊາຊົນ ທີ່ອາສັຍຢູ່ເຂດບ້ານ ນາຜາສຸກ ແລະບ້ານໃກ້ຄຽງ ໃນ ລະຍະປະມານ 10 ກິໂລແມັດ ຂໍໃຫ້ປະຊາຊົນ ເອົາໃຈໃສ່ໃນການປ້ອງກັນ ການສູດດົມຄວັນ ໂດຍ ໃຫ້ໜ້າກາກ ອານາມັຍ ເພື່ອປ້ອງກັນ ຄວັນ ຫາກມີໃຜສູດດົມເຂົ້າໄປຈະເຮັດໃຫ້ຮາກ ແລະ ຊ່ຽງຕໍ່ກາຍເປັນພຍາດໃນປອດ.

ປັດຈຸບັນ ສນາມຂີ້ເຫຍື້ອຫຼັກ 32 ບ້ານນາຜາສຸກ ຖືເປັນພື້ນທີ່ຖີ້ມຂີ້ເຫຍື້ອ ທຸກປະເພດຂອງເມືອງ ໄຊທານີ ແລະ ເມືອງປາກງື່ມ ຊຶ່ງມີ ຂີ້ເຫຍື້ອ ຈາກໂຮງງານ ອຸດສາຫະກັມ ໃນເມືອງໄຊທານີ ໄປຈົນເຖິງຂີ້ເຫຍື້ອ ໃນຄົວເຮືອນ ສນາມຂີ້ເຫຍື້ອແຫ່ງນີ້ ຍັງບໍ່ທັນມີການຈັດການ ຢ່າງເປັນລະບົບ ຍັງຖິ້ມແບບຊະຊາຍ ຍ້ອນວ່າ ບໍ່ມີເຕົາເຜົາ ບໍ່ມີບ່ອນແຍກຂີ້ເຫຍື້ອປຽກ ຂີ້ເຫຍື້ອແຫ້ງ ແລະ ຂີ້ເຫຍື້ອທີ່ເປັນອັນຕະລາຍ.