ບ້ານມັນຈີ ມີມົລພິດ ແທນທີ່ ການພັທນາ

ໂຮງງານເຈັ້ຍຊັນເປເປີຂອງຈີນ ຢູ່ບ້ານມັນຈີ ເມືອງເຊໂປນ ແຂວງສະຫວັນນະເຂດ ຍັງບໍ່ມີໂຄງການພັທນາບ້ານດັ່ງກ່າວ ຕາມທີ່ບໍຣິສັດ ໄດ້ຮັບປາກໄວ້ ກັບປະຊາຊົນ ໂດຍທີ່ທາງຄນະ ບໍຣິຫານໂຮງງານ ມີບົດບັນທຶກ ກັບຊາວບ້ານໄວ້ ກ່ອນທີ່ຈະເປີດ ໂຮງງານ ເປັນຕົ້ນ; ຖນົນ, ໄຟຟ້າ ແລະນໍ້າປະປາ. ຕາມຄໍາເວົ້າຂອງ ເຈົ້າໜ້າທີ່ ເມືອງເຊໂປນ ທ່ານນຶ່ງ ຕໍ່ວິທຍຸເອເຊັຍເສຣີ ໃນມື້ວັນທີ 20 ສິງຫາ ນີ້:

"ມັນເວົ້າເຣຶ່ອງຕອບສນອງຂອງບ້ານນີ້ນະ ເຄຶ່ອງລວມອິ່ຫຍັງບໍ່ທັນໄດ້ ທາງບ້ານບໍ່ໄດ້ມີຫຍັງເລີຍນະ ກ່ຽວກັບເຮັດບົດບັນທຶກຈາກ ຈີນ ນະມັນມີຫ້ອງການ ມີນໍ້າປະປາ ມີໄຟຟ້າໃຊ້ ມີຫົນທາງເວົ້າຫັ້ນນະ ຢູ່ໃນບົດບັນທຶກຫັ້ນມີ ແຕ່ສເນີແລ້ວ ດຽວນີ້ມັນກໍາລັງ ຊັ່ງຊາ."

ທ່ານກ່າວຕື່ມວ່າ ນອກຈາກຈະບໍ່ປະຕິບັດຕາມເນື້ອໃນບັນທຶກ ທີ່ໄດ້ໃຫ້ໄວ້ນັ້ນແລ້ວ ບໍຣິສັດຜລິດເຈັ້ຍຊັນເປເປີ ຂອງຈີນ ຍັງເຮັດໃຫ້ເກີດ ກິ່ນເໝັນ ແລະນໍ້າເສັຍທີ່ສົ່ງຜົລກະທົບໃສ່ຊາວບ້ານ ແລະຍັງມີແຜນທີ່ຈະເອົາດິນປະຊາຊົນ ບ້ານມັນຈີ ນັ້ນຕື່ມອີກ 11 ຄອບຄົວໃນເນື້ອທີ່ 40 ເຮັກຕາ ເພື່ອຂຍາຍໂຮງງານອອກໄປຕື່ມ ຂນະທີ່ປະຊາຊົນບໍ່ຢາກເສັຍດິນໃຫ້ບໍຣິສັດ ນັ້ນຕື່ມອີກ ຈົນກວ່າວ່າທາງບໍຣິສັດ ຈະຍິນຍອມ ປະຕິບັດໂຄງການ ທີ່ໄດ້ຕົກລົງກັບປະຊາຊົນໄວ້ກ່ອນໜ້ານັ້ນ.

ເມື່ອປີ 2008 ບໍຣິສັດຜລິດເຈັ້ຍຂອງຈີນ ເອົາດິນຂອງປະຊາຊົນໄປແລ້ວປະມານ 22 ເຮັກຕາ ແລະເອົາຕື່ມອີກ 152 ເຮັກຕາ ໃນປີ 2010 ເພື່ອກໍ່ສ້າງໂຮງງານ ຜລິດເຈັ້ຍ ຊັນເປເປີນັ້ນ.

ກ່ຽວກັບບັນຫາທີ່ວ່ານີ້ ວິທຍຸເອເຊັຍເສຣີ ພຍາຍາມຕິດຕໍ່ໄປຍັງຜູ້ບໍຣິຫານ ບໍຣິສັດດັ່ງກ່າວ ແຕ່ຍັງບໍ່ສາມາດຕິດຕໍ່ໄດ້. ໃນຂນະດຽວກັນ ກໍໄດ້ຕິດຕໍ່ໄປຍັງ ຫ້ອງການປົກຄອງ ເມືອງເຊໂປນ ເພື່ອຂໍຮູ້ຣາຍລະອຽດ ກ່ຽວກັບເຣຶ່ອງນີ້ ແຕ່ເຈົ້າໜ້າທີ່ຕອບວ່າ ກໍາລັງ ປຶກສາຫາລືກັນຢູ່ ບໍ່ສະດວກທີ່ຈະໃຫ້ສໍາພາດ.