ຊາວນາ ເມືອງຫົງສາ ຍັງຕ້ອງການ ຄວາມຊ່ອຍເຫຼືອ ຈາກຣັຖ
2022.03.04
ຊາວນເຂດພາກເໜືອ ກຳລັງເລັ່ງເຮັດນາ
ນັກຂ່າວ ພົລເມືອງ
ໃນປີ 2021 ທີຜ່ານມາ ຊາວນາທີ່ເຮັດນາປີ ແລະ ເຂົ້າໄຮ່ ຢູ່ເມືອງຫົງສາ ແຂວງໄຊຍະບູລີ ໄດ້ຮັບຜົລກະທົບຈາກສັດຕູພືດ ແລະ ພັຍທັມຊາດ ເຮັດໃຫ້ນາເຂົ້າເສັຽຫາຍທັງໝົດປະມານ 100 ເຮັກຕ້າ.
ມາເຖິງປັດຈຸບັນ ຊາວນາ ຍັງຕ້ອງການຄວາມຊ່ວຍເຫຼືອ ຄື ຕ້ອງການ ໃຫ້ພາກສ່ວນກ່ຽວຂ້ອງ ຊອກຫາຢາເຄມີ ເພື່ອປ້ອງກັນສັດຕູພືດ ກ່ອນທີ່ສັດຕູພືດຈະບຸກທັມລາຍເຂົ້ານາ ແລະ ຕ້ອງການໃຫ້ພາກສ່ວນທີ່ກ່ຽວຂ້ອງ ຊ່ວຍເຫຼືອຢາເຄມີ ປາບສັດຕູພືດແບບບໍ່ເສັຍຄ່າໃຫ້ຊາວນາ.
ຊາວນາ ຢູ່ບ້ານວຽງແກ້ວ ເມືອງຫົງສາ ແຂວງໄຊຍະບູລີ ກ່າວຕໍ່ເອເຊັຽເສຣີ ໃນວັນທີ 4 ມີນາ ວ່າ:
“ມັນມີໂຕດ້ວງນ່າ ຢູ່ໃນຂໍ້ຂອງຕົ້ນເຂົ້າ ທີ່ຕ້ອງການຊ່ວຍເຫຼືອ ກໍມີແຕ່ ເອົາຢາປາບສັດຕູພືດໃຫ້ ຮອດຍາມກໍ ເຮັດໃບສເນີຫາເພິ່ນ ແຫຼະ ຄັນວ່າ ມັນເກີດຂຶ້ນ ເຮົາກໍສເນີ ໄປຫາເພິ່ນ ລົງມາກວດມາກາ.”
ໃນຂະນະທີ່ ຊາວນາ ຢູ່ບ້ານແທ່ນ ເມືອງຫົງສາ ຕ້ອງການໃຫ້ພາກສ່ວນທີ່ກ່ຽວຂ້ອງ ທົດແທນແນວພັນ ຫຼື ເຂົ້າສານ ຫຼື ເຄື່ອງຂອງອື່ນໆ ແທນຜົລເສັຽຫາຍທີ່ເສັຽຫາຍໄປຈາກພັຍທັມນ້ຳຖ້ວມ ຢ່າງທົ່ວເຖິງ ບໍ່ແມ່ນ ແຈກແຕ່ ເຂົ້າສານ 4-5 ໂລໃຫ້ແຕ່ລະ ຄອບຄົວທີ່ໄດ້ຮັບຜົລກະທົບ ເຊິ່ງເນື້ອທີ່ນາຢູ່ບ້ານແທ່ນເອງ ເສັຽຫາຍ 60-70 ເປີເຊັນ ຂອງເນື້ອທີ່ນາເຂົ້າ.
ຊາວບ້ານແທ່ນ ເມືອງຫົງສາ ກ່າວໃນມື້ດຽວກັນວ່າ:
“ເກັບກຳຂໍມູນວ່າ ຖືກເສັຽຫາຍເທົ່າໃດ ແຕ່ວ່າ ການທົດແທນນີ້ ກໍໃຫ້ມັນເຕັມແທ້ ກໍບໍ່ເຕັມແຫຼະ ວ່າ ຈັ່ງຊີ້ສາ ກໍໄດ້ ແຕ່ລະປີ ຫັກບໍ່ຫຼວງບໍ່ຫຼາຍ ເຂົ້າຜູ້ລະ 4-5 ໂລ 9 ໂລ 10 ໂລ ສົມມຸດວ່າ.”
ທ່ານ ກ່າວຕື່ມວ່າ ຢູ່ບ້ານແທ່ນ ເມືອງຫົງສາ ກໍເກີດນ້ຳຖ້ວມນາເຂົ້າທຸກປີ ສະເລັ໋ຽ 10 ເຮັກຕ້າຕໍ່ປີ, ໃນປີ 2021 ກໍມີນ້ຳປ່າໄຫຼຊຸ ໃນຂະນະທີ່ເຂົ້າກຳລັງມານ ກໍໄດ້ຮັບຄວາມເສັຽຫາຍຈາກນ້ຳຖ້ວມ.
ສຳລັບຊາວນາ ຢູ່ ບ້ານສີບຸນເຮືອງ ເມືອງຫົງສາ ຕ້ອງການໃຫ້ພາກສ່ວນກ່ຽວຂ້ອງ ທົດແທນເຂົ້າສາອາຫານແຫ້ງ ຫຼື ເຄື່ອງໃຊ້ອຸປະໂພກ ບໍລິໂພກ ຢ່າງໄວ ເປັນປີ ຕໍ່ ປີ ພາຍຫຼັງ ເຈົ້າໜ້າທີ່ ທີ່ກ່ຽວຂ້ອງ ລົງມາເກັບກຳຂໍ້ມູນຄວາມເສັຽພາຍຈາກບ້ານ ແຕ່ບໍ່ແມ່ນການທົດແທນເຂົ້າສານອາຫານແຫ້ງ ຫຼື ເຄື່ອງອຸປະໂພກ ບໍລິໂພກ ໃນປີຖັດໄປ ມັນເຮັດໃຫ້ຊາວນາທີ່ໄດ້ຮັບຜົລກະທົບ ລໍຖ້າການຊ່ວຍເຫຼືອດົນ.
ຊາວບ້ານ ສີບຸນເຮືອງ ເມືອງຫົງສາ ໄດ້ກ່າວໃນມື້ດຽວກັນວ່າ:
“ນັບຈາກຜົລກະທົບ ເຊັ່ນວ່າ ຜົລກະທົບ ພັຍທັມຊາດ ນ້ຳຖ້ວມບໍ່ ຈັ່ງຊີ້ເນາະ ພັຍແລ້ງ ບໍ່ໄດ້ກັບກ່ຽວບໍ່ ຈັ່ງຊີ້ ເພິ່ນກໍຊ່ວຍ ແຕ່ວ່າ ກະຊັກຊ້າ ເພາະວ່າ ເອົາຂໍ້ມູນປີນີ້ ປີໜ້າ ຈັ່ງມາຊ່ວຍ ເພາະວ່າ ສເນີ ຮອດແຂວງ ແຂວງສເນີຕໍ່ສູນກາງ.”
ທີ່ຜ່ານມາ ພາກສ່ວນກ່ຽວຂ້ອງ ໄດ້ຈັດຕັ້ງພະນັກງານໄປປະຈຳຢູ່ຕາມແຕ່ລະບ້ານທີ່ມີເນື້ອທີ່ມີເນື້ອທີ່ນາ ພ້ອມຝຶກອົບຮົມ ໃຫ້ຄວາມຮູ້ ກ່ຽວກັບວິທີປ້ອງກັນ ບໍ່ໃຫ້ສັດຕູພືດທຳລາຍເຂົ້ານາ, ແຕ່ ຕໍ່ມາ ການຝຶກອົບຮົມດັ່ງກ່າວ ກໍໄດ້ຢຸດໄປ.
ເຈົ້າໜ້າທີ່ກ່ຽວຂ້ອງ ແຂວງໄຊຍະບູລີ ໄດ້ກ່າວວ່າ:
ໄລຍະທີ່ຜ່ານມາ ນີ້ ພວກເຮົາໄດ້ມີ ໄດ້ຕັ້ງຄົນປ້ອງກັນພືດ ຢູ່ຂັ້ນບ້ານ ຂັ້ນເມືອງ ລົງຕິດຕາມຊຸກຍູ້ ຊ່ວຍເຫຼືອພໍ່ແມ່ປະຊາຊົນ ທາງດ້ານການຜລິດເປັນປົກຕິ ສະນັ້ນ ມັນຣະບາດມາ ສ່ວນໃດສ່ວນນຶ່ງ ເຂົາເຈົ້າກໍຈະ ຮີບຮ້ອນ ລາຍງານ ຂໍຄວາມຊ່ວຍເຫຼືອ ທາງວິຊາການ ເຂົ້າຊ່ວຍ ການຕອບໂຕ້ດັ່ງກ່າວ ນັ້ນ ມັນກໍຮັບມືທ່ວງທັນ ຕາມໄລຍະເວລາທີ່ມັນຣະບາດຫັ້ນນ່າ.
ທ່ານ ກ່າວຕື່ມວ່າ ປີນີ້ ສຳລັບຄ່າທົດແທນ ເປັນແນວພັນພືດ ເພື່ອທົດແທນ ຜົລເສັຽຫາຍ ທີ່ຊາວນາ ທີ່ໄດ້ຮັບຜົລກະທົບ ຈະທົດແທນໃຫ່ແກ່ຊາວນາຜູ້ທີ່ໄດ້ຮັບຜົລກະທົບກາຍ 60-70 ເປີເຊັນ ຂອງເນື້ອທີ່ນາທັງໝົດ ຕາມແຜນການບັນເທົາທຸກຂອງແຂວງ, ສ່ວນຊາວນາ ທີ່ໄດ້ຮັບຜົລເສັຽຫາຍບໍ່ຫຼາຍ ກໍຈະໄດ້ເຂົ້າສານອາຫານແຫ້ງຈຳນວນນຶ່ງ.
ໃນປີນີ້ ເຈົ້າໜ້າທີ່ພາກສ່ວນກ່ຽວຂ້ອງ ໄດ້ຮັບຢາປາບສັດຕູພືດ ທີ່ໄດ້ຮັບການຊ່ວຍເຫຼືອຈາກພາກເອກຊົນ ເພື່ອໃຫ້ສາມາດຊ່ວຍເຫຼືອຊາວບ້ານທັນເວລາ ຖ້າເກີດສັດຕູພືດ.
ເຈົ້າໜ້າທີ່ກ່ຽວຂ້ອງ ແຂວງໄຊຍະບູລີ ໄດ້ກ່າວວ່າ:
“ໄລຍະຜ່ານມາ ພວກເຮົາ ກໍມີຄັງແຮ ເກັບມ້ຽນສານເຄມີ ນີ້ມ້ຽນໄວ້ ເພື່ອຮັບຮັບສະພາບການຊິເກີດຂັ້ນໃນຕໍ່ນ້າ ເປັນຕົ້ນອຸປະກອນ ບັງສັດ ອີ່ຫຍັງຕ່າງໆ ພວກເຮົາ ກໍເກັບພ້ອມ ຕລອດເວລາ ຫັ້ນແຫຼະ.”
ທ່ານ ກ່າວຕືມວ່າ ສຳລັບຄວາມລ່າຊ້າໃນການຈັດຫາແນວພັນເຂົ້າທົດແທນ ຜົລເສັຽຫາຍຈາກພັຍທັມຊາດ ແລະ ສັດຕູພືດນັ້ນ ແມ່ນຊາວນາກໍຕ້ອງໄດ້ລໍຖ້າການຊ່ວຍເຫຼືອ ເນື່ອງຈາກເປັນໄປຕາມຂັ້ນຕອນຂອງພາກສ່ວນກ່ຽວຂ້ອງ ທີ່ຈະຕ້ອງຜ່ານຫຼາຍຂແນງການ ແລະ ລໍຖ້າ ກະຊວງກິສິກັມ ແລະ ປ່າໄມ້ ຊອກຫາງົບປະມານ ເພື່ອຊື້ແນວພັນເຂົ້າມາທົດແທນຊາວນາພາຍໃນແຂວງໄດ້.
ປະຊາຊົນ ເມືອງຫົງສາ ແຂວງໄຊຍະບູລີ ສ່ວນຫຼາຍ ເຮັດນາປີ ເປັນອາຊີບຫຼັກ ໃນເນື້ອທີ່ປະມານ 1,500 ເຮັກຕ້າ ຈາກເນື້ອທີ່ນາທັງໝົດ 2,600 ເຮັກຕ້າ ອີງຕາມຂໍ້ມູນຈາກກອງປະຊຸມສລຸບການຈັດຕັ້ງປະຕິບັດວຽກງານປະຈຳປີ 2021 ແລະ ແຜນການປີ 2022 ໃນວັນທີ 15 ກຸມພາ ທີ່ຜ່ານມາ ແລະ ອີງຕາມຂໍ້ມູນຈາກຫ້ອງການກະສິກັມ ແລະ ປ່າໄມ້ ເມືອງ ຫົງສາ.