ນໍ້າຖ້ວມພາກໃຕ້ເສັຽຫາຍກວ່າ 60 ລ້ານໂດລາ

ສື່ມວລຊົນພາກຣັຖສປປລາວ ເປີດເຜີຍໃນວັນອັງຄານ ເຖິງຄວາມເສັຽຫາຍຈາກພັຍນໍ້າຖ້ວມໃນເຂດພາກໃຕ້ຂອງລາວ ວ່າງເດືອນທີ່ຜ່ານມາ ມີມູນຄ່າເຖີງ 482 ຕື້ກີບຫລືປະມານ 61 ລ້ານໂດລາສະຫະຣັຖ. ລົມພາຍຸໂຊນຮ້ອນທີ່ເຮັດໃຫ້ຝົນຕົກຫນັກດິນເຈື່ອນ ໃນວັນທີ 17 ກັນຍາ ຜ່ານມາ ໃນເຂດພາກໃຕ້ ເຮັດໃຫ້ຄົນເສັຽຊີວີດ 4 ຄົນ ຖນົນຫົນທາງ ຂົວ ໂຮງຮຽນ ໂຮງຫມໍຫລາຍແຫ່ງ ຖືກທໍາລາຍ.

ແຂວງທີ່ໄດ້ຮັບຄວາມເສັຽຫາຍຫລາຍກວ່າຫມູ່ ກໍແມ່ນ ແຂວງສາຣະວັນ ຜົນເສັຽຫາຍ ປະມານ 333 ຕື້ກີບຫລືປະມານ 42.41 ລ້ານໂດລາ ສະຫະຣັຖ ເຮືອນຊານປະຊາຊົນກວ່າ 200 ຫລັງແລະພື້ນທີ່ການກະເສດກວ່າ 24 ພັນເຮັກຕາ ໄດ້ຮັບຜົລກະທົບ. ລອງລົງມາແມ່ນ ແຂວງ ຈຳປາສັກ ອີງຕາມການລາຍງານ ໃນປັດຈຸບັນ 28 ຫມູ່ບ້ານຍັງຖືກຕັດຂາດຈາກ ເຄືອຂ່າຍໄຟຟ້າ ຂອງຣັຖຢູ່ ໄດ້ພົບເຫັນຊາກສົບ ທີ່ເມືອງ ປາກຊ່ອງ 4 ຄົນ ໂຮງຮຽນກວ່າ 1 ຮ້ອຍຫລັງ ຖນົນຫົນທາງຫລາຍສາຍໃນທົ່ວແຂວງ. ມີ 200 ຫມູ່ບ້ານ ແລະພື້ນທີ່ການກະເສດ ປະມານ 13 ພັນເຮັກຕາ ໄດ້ຮັບຄວາມເສັຽຫາຍ.

ປັດຈຸບັນເຈົ້າຫນ້າທີ່ແຂວງໄດ້ເຮັດວຽກຢ່າງບໍ່ອິດເມື່ອຍເພື່ອເຮັດໃຫ້ສະພາບການຄືນມາເປັນປົກກະຕິ ແລະຮັກສາຄວາມປອດພັຍ ໃນເຂດທີ່ ມີຄວາມສ່ຽງ.