ຊາວລາວ ເລົ່າປະສົພການ ແຜ່ນດິນໄຫວ
2019.11.29
ແຜ່ນດິນໄຫວ ຢູ່ ມ.ຫົງສາ ຂ.ໄຊຍະບູຣີ ຊຶ່ງມີອາຄານ ທີ່ເປັນຊິເມັນ ກໍແຕກແຫງເລັກນ້ອຍ ແລະ ບ້ານເຮືອນ ຂອງປະຊາຊົນ ກໍບໍ່ເຖິງ ຂັ້ນຍຸບລົງ ຫຼື ເພພັງໝົດຫຼັງ
ຮູບພາບຈາກ : ນັກຂ່າວພົລເມືອງ
ເມື່ອຕອນເຊົ້າຂ້ອນແຈ້ງ ຂອງວັນທີ 21 ພຶສຈິກາ ນັບແຕ່ເວລາ 4 ໂມງເຊົ້າ ທີ່ຜ່ານມາ ໄດ້ເກີດເຫຕແຜ່ນດິນໄຫວຫຼາຍຄັ້ງ ທີ່ມີສູນກາງໃນເຂດເມືອງຫົງສາ ແຂວງໄຊຍະບູຣີ, ເຊິ່ງແຮງສັ່ນສະເທືອນສູງສຸດ ທີ່ສາມາດວັດແທກໄດ້ ແມ່ນ 6,4 ຣິກເຕີ້. ຈາກນັ້ນ, ກໍເກີດມີການສັ່ນສະເທືອນອີກຫຼາຍຄັ້ງ ຫຼື After Shock ທີ່ນັບໄດ້ເຖິງ 157 ຄັ້ງ ທີ່ສັ່ນຕໍ່ເນື່ອງ ຈົນມາເຖິງວັນທີ 25 ພຶສຈິກາ, ອີງຕາມການຕິດຕາມ ແລະ ຣາຍງານຈາກທາງການລາວ. ແຜ່ນດິນໄຫວເທື່ອນີ້, ສາມາດຮູ້ສຶກໄດ້ ໄປເຖິງຫຼາຍແຂວງຂອງລາວ ເປັນຕົ້ນ ແຂວງບໍ່ແກ້ວ, ຫຼວງພຣະບາງ, ແຂວງວຽງຈັນ ແລະ ນະຄອນຫຼວງວຽງຈັນ.
ນອກຈາກນັ້ນ, ກໍຍັງມີບາງແຂວງຂອງໄທຍ ແລະ ພະມ້າ ທີ່ສາມາດຮັບຮູ້ເຖິງແຮງສັ່ນສະເທືອນທີ່ຮຸນແຮງ ແລະ ໄດ້ຮັບຜົລກະທົບສ່ວນນຶ່ງໃນບາງແຂວງເຊັ່ນກັນ.
ກ່ຽວກັບເຫຕການແຜ່ນດິນໄຫວຄັ້ງນີ້, ຂພຈ ໄດ້ມີໂອກາດ ສັມພາດຊາວລາວຫຼາຍທ່ານ ທີ່ອາໃສຢູ່ໃນເຂດຕ່າງໆ ທີ່ໄດ້ປະສົພພົບພໍ້ເຫຕການດັ່ງກ່າວ.
ຊາວບ້ານໃນເຂດເມືອງຫົງສາ ທ່ານນຶ່ງ ໄດ້ເລົ່າເຫຕການມື້ເກີດແຜ່ນດິນໄຫວ ສູ່ຟັງ ໃນມື້ວັນທີ 27 ພຶສຈິກາ ວ່າ ໃນເຂດບ້ານທ່ານ ກໍເກີດຄວາມເສັຽຫາຍພໍສົມຄວນ.
ສຽງ1: “ສຽງຊາວບ້ານ ໃນເຂດເມືອງຫົງສາ ແຂວງໄຊຍະບູຣີ”
ພຣະອາຈານ ອົງນຶ່ງ ປະຈຳວັດສີມຸງຄຸນຊັຍຣາມ ບ້ານນາບວມ, ເມືອງພຽງ ແຂວງໄຊຍະບູຣີ ກໍໄດ້ກ່າວຕໍ່ ຂພຈ ໃນມື້ດຽວກັນວ່າ ໃນເຂດເມືອງພຽງ ກໍໄດ້ຮັບຮູ້ເຖິງແຮງສັ່ນສະເທືອນທີ່ຮຸນແຮງພໍສົມຄວນ ເຮັດໃຫ້ພຣະສົງສາມະເນນ ແຕກຕື່ນ ຈົນຕ້ອງໜີຈາກກຸຕິວັດ.
ສຽງ2: “ສຽງພຣະອາຈານ ວັດໄຊຍະມົງຄຸນ ເມືອງພຽງ ແຂວງໄຊຍະບູຣີ”
ເຈົ້າໜ້າທີ່ອາສາກູ້ພັຍ ເມືອງໄຊຍະບູຣີ ກໍໄດ້ໃຫ້ສັມພາດແກ່ ຂພຈ ວ່າ ແຮງສັ່ນສະເທືອນຂອງແຜ່ນດິນໄຫວ ໄດ້ສ້າງຄວາມເສັຽຫາຍໃນເຂດເມືອງຫົງສາ ທີ່ເປັນຈຸດສູນກາງ, ແຕ່ກໍບໍ່ມີໃຜເສັຽຊີວິຕ ຫຼືໄດ້ຮັບບາດເຈັບສາຫັດ ເຖິງຂັ້ນທີ່ໜ່ວຍອາສາກູ້ພັຍ ຕ້ອງເຂົ້າໄປຊ່ອຍເຫຼືອ.
ສຽງ3: “ສຽງເຈົ້າໜ້າທີ່ອາສາກູ້ພັຍ ເມືອງໄຊຍະບູຣີ ແຂວງໄຊຍະບູຣີ”
ໃນຂນະດຽວກັນ, ແຮງສັ່ນສະເທືອນຂອງແຜ່ນດິນໄຫວຈາກເມືອງຫົງສາ ກໍໄດ້ເຮັດໃຫ້ຊາວບ້ານ ໃນເຂດນະຄອນຫຼວງວຽງຈັນ ຮັບຮູ້ເຖິງແຮງສັ່ນສະເທືອນເທື່ອນີ້ ຢ່າງຮຸນແຮງທີ່ສຸດຄັ້ງນຶ່ງ. ດັ່ງຊາວບ້ານ ທ່ານນຶ່ງ ໃນນະຄອນຫຼວງວຽງຈັນ ໄດ້ເລົ່າເຫຕການສູ່ ຂພຈ ຟັງວ່າ:
ສຽງ4: “ສຽງຊາວບ້ານ ໃນເຂດນະຄອນຫຼວງວຽງຈັນ”
ເຖິງຢ່າງໃດກໍຕາມ, ສິ່ງກໍ່ສ້າງຂນາດໃຫຍ່ໃນເມືອງຫົງສາ ຄືໂຮງງານໄຟຟ້າຖ່ານຫີນ ຫົງສາລິກໄນ້ ແລະ ເຂື່ອນໄຟຟ້າໄຊຍະບູຣີ ກໍບໍ່ໄດ້ຮັບຄວາມເສັຽຫາຍແຕ່ຢ່າງໃດ, ອີງຕາມແຈ້ງການຢ່າງເປັນທາງການຂອງທັງສອງບໍຣິສັດ ຄືບໍຣິສັດໄຟຟ້າຫົງສາ ຈຳກັດ ແລະ ບໍຣິສັດ CK Power ຈຳກັດ ມະຫາຊົນ. ມີພຽງອາຄານຂນາດນ້ອຍບາງສ່ວນ ຢູ່ເຂດໂຮງງານໄຟຟ້າຫົງສາລິກໄນ້ ທີ່ພື້ນຜິວ ໄດ້ຮັບຄວາມເສັຽຫາຍພໍສົມຄວນ.
ຄວາມເສັຽຫາຍທີ່ເກີດຈາກແຜ່ນດິນໄຫວຈາກເມືອງຫົງສານີ້, ໃນເບື້ອງຕົ້ນ ທາງການໄດ້ປະເມີນວ່າ ມີຄວາມເສັຽຫາຍປະມານ 2 ຕື້ກີບ. ມີ 25 ບ້ານ ໄດ້ຮັບຜົລກະທົບ ໃນເຂດເມືອງຫົງສາ ແລະ ໄຊສະຖານ, ເຊິ່ງມີ 174 ຫຼັງຄາເຮືອນ ໄດ້ຮັບຄວາມເສັຽຫາຍ ແລະ ມີ 4 ຫຼັງຄາເຮືອນ ທີ່ໄດ້ຮັບຄວາມເສັຽຫາຍຫຼາຍສົມຄວນ ແລະ ເສັ້ນທາງຈຳນວນນຶ່ງ ກໍແຕກຍະ.
ເຫຕການຄັ້ງນີ້, ໄດ້ເຮັດໃຫ້ທາງການລາວ ອອກແຈ້ງເຕືອນໃຫ້ປະຊາຊົນ ຕ້ອງເອົາໃຈໃສ່ຕິດຕາມສະຖານະການ ຢ່າງໃກ້ຊິດ ແລະ ປະຊາຊົນສ່ວນນຶ່ງ ທີ່ອາໃສຢູ່ເຂດໃກ້ຈຸດສູນກາງຂອງແຜ່ນດິນໄຫວ ກໍພາກັນຮູ້ສຶກເອິກສັ່ນຂວັນຫາຍ ຈົນບໍ່ກ້ານອນໃນເຮືອນ ແລ້ວອອກມານອນຢູ່ກາງແຈ້ງແທນ ເພາະຢ້ານບໍ່ປອດພັຍ.