ນ້ຳຖ້ວມຖນົນ ຢູ່ນະຄອນຫລວງ ຍັງເປັນບັນຫາ ຊຳເຮື້ອ
2022.08.03
ຮູບໂຕຢ່າງ: ເກີດນ້ຳຖ້ວມຂັງ ຢູ່ຫຼາຍພື້ນທີ່ ໃນນະຄອນຫຼວງວຽງຈັນ ພາຍຫຼັງທີ່ຝົນຕົກໜັກ ຕິດຕໍ່ກັນຫຼາຍຊົ່ວໂມງ ປີທີ່ຜ່ານໆມາ.
ນ້ຳຖ້ວມຂັງຕາມຖນົນ ຢູ່ນະຄອນຫລວງວຽງຈັນ ຫຼັງຈາກເກີດຝົນຕົກໜັກ ເປັນເວລາຫຼາຍຊົ່ວໂມງ ແລະ ປັດຈຸບັນ ກໍຍັງບໍ່ທັນໄດ້ຮັບການແກ້ໄຂ ຈາກພາກສ່ວນກ່ຽວຂ້ອງ. ນ້ຳຖ້ວມຂັງຢູ່ເຂດໂຕເມືອງ ໃນເວລາຝົນຕົກ ເປັນຜົລມາຈາກ ຂາດງົບປມານ ໃນການປັບປຸງ ທໍ່ລະບາຍນ້ຳ ທີ່ບໍ່ພຽງພໍກັບຂນາດ ຂອງເມືອງ ແລະ ເຮັດໃຫ້ນ້ຳ ບໍ່ສາມາດລະບາຍໄດ້ທັນ ໃນເວລາຝົນຕົກໜັກ.
ເຈົ້າໜ້າທີ່ ກົມເຄຫາ-ຜັງເມືອງ ກະຊວງໂຍທາທິການ ແລະ ຂົນສົ່ງ ຜູ້ທີ່ບໍ່ປະສົງອອກຊື່ ແລະ ຕຳແໜ່ງ ທ່ານ ນຶ່ງ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 3 ສິງຫາ ວ່າ:
“ຫ້ອງການນີ້ ຕັ້ງຂຶ້ນມາແລ້ວ ມັນບໍ່ມີງົບປມານສນອງຂະເຈົ້າ ຂະເຈົ້າຢາກສ້າງ ໂຕເມືອງ ຢາກພັທນາໂຕເມືອງ ອັນວຽກເຮົາມີຢູ່ ອັນສເນີເພິ່ນຢູ່ວ່າ ບ້ານເມືອງຕ້ອງພັທນາແບບນີ້ ສອງມາແບບນີ້ນິ ທໍ່ລະບາຍນ້ຳແນວນີ້ນິ ແຕ່ວ່າ ສ່ວນໃຫຍ່ຂຶ້ນງົບໄປ ແຕ່ວ່າ ເພິ່ນບໍ່ສນອງໃຫ້ ທາງເຮົາກໍຈຳເປັນ ຕ້ອງໄດ້ເຂົາຫັ້ນນ່າ ທຶນຈາກຕ່າງປະເທດເນາະ ອັນນຶ່ງ. ອັນທີສອງມາແມ່ນເປັນ ເຣື່ອງການເກັບຂີ້ເຫຍື້ອ ບໍ່ອີ່ຫຍັງ ຂະເຈົ້າມີລາຍໄດ້ສູງ.”
ທ່ານ ກ່າວຕື່ມວ່າ ພາກສ່ວນທີ່ເຮັດວຽກ ໃນການແກ້ໄຂບັນຫາດັ່ງກ່າວ ຢູ່ນະຄອນຫລວງວຽງຈັນ ໄດ້ຮັບງົບປມານ ສນັບສນູນຈາກອົງການສາກົນ ແລະ ຈາກການເຮັດສັນຍາເກັບຊື້ ຂີ້ເຫຍື້ອຈາກປະຊາຊົນ ແຕ່ທີ່ຜ່ານມາ ງົບປມານດັ່ງກ່າວນີ້ ບໍ່ພຽງພໍກັບຄວາມຕ້ອງການ ໃນການແກ້ໄຂບັນຫານ້ຳຖ້ວມຂັງ ໃນຂະທີ່ ຄອນຫລວງວຽງຈັນ ແລະ ທຸກແຂວງໃນປະເທດລາວ ທີ່ມີການຂຍາຍໂຕ ນັບມື້ນັບເພີ່ມຂຶ້ນ ເຖິງວ່າ ເຈົ້າໜ້າທີ່ກ່ຽວຂ້ອງ ມີແຜນໃນການພັທນາໂຕເມືອງ ແຕ່ ບໍ່ສາມາດຈັດຕັ້ງປະຕິບັດໄດ້ ຍ້ອນບໍ່ມີງົບປມານ.
ແຕ່ລະປີ ຢູ່ນະຄອນຫລວງວຽງຈັນ ຈະປະສົບກັບບັນຫານ້ຳຖ້ວມຂັງ. ເຈົ້າໜ້າທີ່ຫ້ອງການໂຍທາທິການ ແລະ ຂົນສົ່ງ ເມືອງສີໂຄດຕະບອງ ນະຄອນຫລວງວຽງຈັນ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 3 ສິງຫາ ວ່າ:
“ເອີ ກໍມີຢູ່ ມີຢູ່ໃດ ເອີມັນກໍເປັນທາງຫລວງນີ້ແຫຼະ ທາງຢູ່ໃນໂຕເມືອງ ຢູ່ໃນນະຄອນຫລວງວຽງຈັນ ມັນກໍອັນພຽງພໍ ທໍ່ລະບາຍນ້ຳບໍ່ພຽງພໍ ກໍເລີຍເຮັດໃຫ້ນ້ຳອັ່ງ.”
ກ່ຽວກັບເຣື່ອງນີ້ ເອເຊັຽເສຣີ ໄດ້ຕິດຕໍ່ໄປຫາຫ້ອງການຄຸ້ມຄອງ ແລະ ບໍຣິຫານ ໂຕເມືອງວຽງຈັນ ເພື່ອຖາມກ່ຽວກັບແນວທາງໃນການແກ້ໄຂ ບັນຫານ້ຳຖ້ວມຂັງຕາມຖນົນຫົນທາງ ຢູ່ບ້ານ ແລະ ເມືອງ ຕ່າງໆ ພາຍໃນນະຄອນຫລວງວຽງຈັນ ຍ້ອນວ່າ ມັນເປັນບັນຫາ ກະທົບຕໍ່ຊີວິຕ ການເປັນຢູ່ຂອງຊາວບ້ານ ແຕ່ ເຈົ້າໜ້າທີ່ ຮັບຜິດຊອບບໍ່ສະດວກໃຫ້ຂໍ້ມູນ.
ຊາວນະຄອນຫລວງວຽງຈັນ ຈຳນວນນຶ່ງກໍຢາກໃຫ້ ພາກສ່ວນກ່ຽວຂ້ອງ ດຳເນີນການແກ້ໄຂ ບັນຫາດັ່ງກ່າວ ຢ່າງຈິງຈັງ ຍ້ອນວ່າ ມັນເປັນບັນຫາທີ່ເກີດຂຶ້ນມາດົນແລ້ວ.
ຊາວນະຄອນຫລວງວຽງຈັນ ທ່ານນຶ່ງ ໄດ້ກ່າວວ່າ:
“ແຕ່ວ່າ ນ້ຳຖ້ວມຂັງມັນແລ້ວແຕ່ໂຊນ ມັນແລ້ວແຕ່ເຂດ ທີ່ເຫັນລົງພາບອັນນ່າ ມັນຈະເປັນທີ່ໄປທາງສີໄຄ ໄປພຸ້ນນ່າ. ເລີຍສີໄຄໄປອອກທາງດ່ວນ ໄປວັງວຽງ ບໍ່ ມັນກໍເປັນໄລຍະ ຄັນເຮົາຢູ່ໃນນະຄອນຫລວງວຽງຈັນ ມັນກໍມີຫຼາຍເສັ້ນທາງໃຫ້ເຮົາໄດ້ແລ່ນໄດ້ ກໍຊິບໍ່ທັນໄດ້ມີອັນໄດ້ຕ້ອງແກ້ໄຂທີ່ເລັ່ງດ່ວນດອກ ເພາະວ່າ ບັນຫາໂຕນີ້ ມັນກໍເກີດຂຶ້ນຢູ່ຫຼາຍປີແລ້ວ ແຕ່ລະປີ ມັນກໍຈະມີ ຝົນຕົກນ້ຳຂັງ ມັນກໍຈະລະບາຍບໍ່ທັນ.”
ທີ່ຜ່ານມາ ເຈົ້າໜ້າທີ່ກ່ຽວຂ້ອງ ແກ້ໄຂບັນຫາສະເພາະຈຸດເທົ່ານັ້ນ ແຕ່ບໍ່ແມ່ນການແກ້ໄຂບັນຫາໄລຍະຍາວ. ແມ່ຄ້າຂາຍເຄື່ອງ ຢູ່ຕລາດສີໄຄ ເມືອງສີໂຄດຕະບອງ ໄດ້ກ່າວວ່າ:
“ປີຜ່ານມາ ກໍຖ້ວມກໍບຶດດຽວ ກໍລົດລົງຄືເກົ່າ ເພາະວ່າ ມັນເປັນນຳທໍ່ ທໍ່ທີ່ວ່າລະບາຍນ້ຳ ທີ່ມັນບໍ່ທັນບໍ່ ເວລາຝົນມັນແຮງຫັ້ນນ່າ ຄັນນັ້ນ ແລ້ວຂະເຈົ້າກໍມາກວນ ມາຫຍັງແລ້ວ ມັນກໍລົງຄືເກົ່າ ເພາະວ່າ ຂະເຈົ້າອັນນ່າ ກໍມາແກ້ແຕ່ລະຈຸດ ລະຈຸດ.”
ບັນຫານ້ຳຖ້ວມຂັງ ເກີດຂຶ້ນມາຫຼາຍປີແລ້ວ ຍ້ອນວ່າ ມີການກໍ່ສ້າງຫຼາຍຂຶ້ນ ແລະ ບາງຈຸດກໍເປັນຕັນທາງນ້ຳໄຫຼ.
ຊາວບ້ານໜອງໜ້ຽວ ເມືອງສີໂຄດຕະບອງ ນະຄອນຫລວງວຽງຈັນ ໄດ້ກ່າວວ່າ:
ເຣີ່ມຈະຖ້ວມ 2-3 ປີ ນີ້ແຫຼະ ເພາະວ່າ ຂະເຈົ້າກໍສ້າງດິນ ກໍສ້າງໂກດັງແລ້ວ ຂະເຈົ້າ ບໍ່ເຮັດຄອງລະບາຍນ້ຳ ມັນລະບາຍບໍ່ທັນ ຕອນທີ່ຝົນຕົກໜັກໆ ມັນຈະຂັງ 4-5 ມື້ພຸ້ນ ແຫຼະ ແລ້ວໃຫ້ມັນແຫ້ງໄປເອງ ທີ່ນັ້ນ ມັນຈະເປັນຄອງນ້ຳເສັຽຢູ່ແລ້ວ ແຕ່ວ່າ ມັນກະທົບຕໍ່ການສັນຈອນ ແຕ່ວ່າຍຸງລາຍກໍໜ້າຈະ ກໍໜ້າຈະມີບັນຫາພໍສົມຄວນ ຫັ້ນແຫຼະ ເພາະວ່າ ໂຕນັ້ນມັນເປັນນ້ຳຂັງ ທີ່ມັນຈະບໍ່ລະບາຍໄດ້.
ບັນຫານ້ຳຖ້ວມສ່ວນນຶ່ງ ເກີດມາຈາກຂີ້ເຫຍື້ອ ຢູ່ນະຄອນຫລວງວຽງຈັນ ໄປອຸດຕັນທໍ່ລະບາຍນ້ຳ ແລະ ບໍ່ມີການເກັບມ້ຽນ ຂີ້ເຫຍື້ອເປັນລະບົບ.
ເມື່ອບໍ່ດົນຜ່ານມາ, ທ່ານ ບຸນຈັນ ແກ້ວສີທຳມະ (ແກ້ວສີທັມມະ) ຫົວໜ້າຫ້ອງການຄຸ້ມຄອງ ແລະ ບໍຣິຫານໂຕເມືອງວຽງຈັນ ກ່າວວ່າ ການຈັດຕັ້ງປະຕິບັດ ກ່ຽວກັບການເກັບມ້ຽນ ຂີ້ເຫຍື້ອໃນນະຄອນຫລວງວຽງຈັນ ຍັງພົບຄວາມຫຍຸ້ງຍາກຫຼາຍ ຍ້ອນວ່າ ຍັງມີປະຊາຊົນ ຈຳນວນນຶ່ງ ບໍ່ເຮັດສັນຍາ ເກັບມ້ຽນຂີ້ເຫຍື້ອ ເນື່ອງຈາກບໍ່ຢາກຈ່າຍເງິນ ເຮັດໃຫ້ເກີດມີການລັກເອົາ ຂີ້ເຫຍື້ອໄປຖິ້ມໃສ່ ເນື້ອທີ່ດິນເປົ່າວ່າງຕ່າງໆ ຂະນະດຽວກັນ ກໍມີຄົນຂັບຣົຖ ແລະ ແອັດຣົຖເກັບມ້ຽນຂີ້ເຫຍື້ອຈຳນວນນຶ່ງ ສວຍໃຊ້ຊ່ອງວ່າງ ຫາຜົລປໂຍດສ່ວນໂຕ ດ້ວຍການລັກເຮັດສັນຍາ ເກັບມ້ຽນຂີ້ເຫຍື້ອກັບປະຊາຊົນ.
ຫຼ້າສຸດ, ຫຼັງເກີດຝົນຕົກໜັກ ໃນເວລາປະມານ 14 ໂມງ ຂອງວັນທີ 2 ສິງຫາ ເຮັດໃຫ້ເກີດນ້ຳຖ້ວມຂັງ 2 ຈຸດ ບໍຣິເວນເສັ້ນທາງ ໂຮງໝໍ ປົວຕາທົ່ງໂປ່ງ ແລະ ຈຸດຕລາດໂອຊີ ນະຄອນຫລວງວຽງຈັນ ເຮັດໃຫ້ການເດີນທາງ ສັນຈອນ ໄປມາ ຂອງ ພໍ່ແມ່ປະຊາຊົນ ໃນພື້ນທີ່ປະສົບ ຄວາມຫຍຸ້ງຍາກ.