ຮ້ານກິນດື່ມຍັງທ້າທາຍ ຄໍາສັ່ງ

ນັບຕັ້ງແຕ່ທາງການລາວ ໄດ້ອອກຄຳສັ່ງຫ້າມ ບໍ່ໃຫ້ຮ້ານກິນດື່ມ ເປີດບໍຣິການໃກ້ ສະຖາບັນສຶກສາ ຫລືໂຮງຮຽນ ໃນທົ່ວປະເທດ ຢ່າງນ້ອຍ 500 ແມັດຂຶ້ນໄປ ເປັນເທື່ອທີສອງ ໃນມື້ວັນທີ 1 ກັນຍາ ຜ່ານມາ ມາຮອດປັດຈຸບັນ ຍັງມີຮ້ານກິນດື່ມ ບາງແຫ່ງ ຍັງເປີດບໍຣິການໃກ້ກັບ ມະຫາວິທຍາລັຍຢູ່ເປັນຕົ້ນ ມະຫາວິທຍາລັຍ ສຸພານຸວົງ ທີ່ນະຄອນຫລວງພຮະບາງ. ດັ່ງອາຈານ ມະຫາວິທຍາລັຍ ທ່ານຶ່ງກ່າວໃນມື້ວັນທີ 12 ທັນວາ ນີ້ວ່າ:

"ເປີດປົກກະຕິຫັ້ນແຫລະ ມີແຕ່ປິດຊົ່ວຄາວແລ້ວເພິ່ນກໍເປີດ ຍາມໃດຊີ່ເຮັດຈັ່ງເຮັດຊັ້ນນ່າ ຢູ່ແຂວງການນຳເພິ່ນມີກອງປະຊຸມຍາມໃດ ເພິ່ນກໍຍົກຂຶ້ນ ແຕ່ວ່າບໍ່ມີຫນ່ວຍງານເປັນຕົວຕັ້ງຕົວຕີ ເພິ່ນມອບໃຫ້ພາກສ່ວນນັ້ນ ພາກສ່ວນນີ້ ບາດແລ້ວແກ້ບໍ່ຕົກ ຫັ້ນແຫລະ."

ທ່ານກ່າວຕື່ມວ່າ ເຖິງແມ່ນວ່າເຈົ້າຫນ້າທີ່ຈະລົງມາກວດກາ ແລະສັ່ງໃຫ້ຍ້າຍອອກໄປຕັ້ງບໍ່ໃຫ້ຫຼຸດ 500 ແມັດຕາມຣະບຽບການແລ້ວກໍຕາມ ແຕ່ຜູ້ປະກອບການກໍຍັງເປີດຄືເກົ່າ. ການບໍ່ປະຕິບັດຕາມ ຄຳສັ່ງຂອງທາງການ ສົ່ງຜົລກະທົບ ຕໍ່ການສຶກສາ ໃນມະຫາວິທຍາລັຍໂດຍກົງ ຊຶ່ງຫລາຍຄົນຫລັງຈາກເລີກການຮຽນ ຍັງບໍ່ປ່ຽນຊຸດນັກຮຽນ ກໍແວ່ໄປໃຊ້ບໍຣິການ ກ່ອນຈະກັບຫໍພັກ ແລະບາງຄົນກໍມືນເມົາ ຈົນບໍ່ສາມາດ ໄປເຂົ້າຮຽນໄດ້ ໃນມື້ຕໍ່ມາ, ບາງຮ້ານກໍເປີດເພງດັງ ລົບກວນການຮຽນການສອນ ຂອງ ມະຫາວິທຍາລັຍ ແລະ ຫໍພັກນັກຮຽນ.

ທ່ານ ທອງລຸນ ສີສຸລິດ ນາຍົກຣັຖມົນຕຣີລາວ ໄດ້ອອກຄຳສັ່ງຫ້າມ ບໍ່ໃຫ້ເປີດຮ້ານກິນດື່ມ ໃກ້ກັບສະຖາບັນແລະໂຮງຮຽນທົ່ວໄປ ໃນທົ່ວ ປະເທດ ໃນມື້ວັນທີ 7 ຕຸລາ ປີ 2016 ໂດຍອະນຸມັດ ໃຫ້ພາກສ່ວນທີ່ຮັບຜິດຊອບ ສາມາດຖອນໃບອະນຸຍາດ ແລະ ປິດກິຈການຮ້ານ ດັ່ງກ່າວໄດ້ ຖ້າບໍ່ປະຕິບັດຕາມ ແຕ່ໃນປັດຈຸບັນ ຍັງມີບາງຮ້ານ ຍັງຣະເມີດຄຳສັ່ງດັ່ງກ່າວຢູ່.