ນັກລົງທຶນຈາກປະເທດສິງກະໂປ ຈະສ້າງໂຄງການໄຟຟ້າແສງຕາເວັນ ຫຼື Solar Attapeu Power Sole Company ທີ່ມີກຳລັງການຜລິຕ 64 ເມກາວັດ ຢູ່ບ້ານຫາດຊັນ ເມືອງໄຊເສດຖາ ແຂວງອັດຕະປື ເພື່ອຊຸກຍູ້ເສຖກິຈ ອັດຕະປື ໃຫ້ຂຍາຍໂຕຂຶ້ນ.
ໂຄງການດັ່ງກ່າວ ໄດ້ມີການວາງສີລາເຣີກ ການກໍ່ສ້າງໄປແລ້ວ ໃນວັນທີ 12 ສິງຫາ 2022 ທີ່ຜ່ານມາ. ການພັທນາໂຄງການດັ່ງກ່າວ ຈະກວມເອົາດິນກະສິກັມ ຂອງຊາວບ້ານ 20 ຄອບຄົວ, ແຕ່ໂຄງການກໍຈະຈ່າຍຊົດເຊີຍໃຫ້ແກ່ຊາວບ້ານ.
ຊາວບ້ານຢູ່ເມືອງໄຊເສດຖາ ໄດ້ກ່າວຕໍ່ເອເຊັຽເສຣີ ໃນວັນທີ 25 ສິງຫາ ວ່າ:
" ແມ່ນໆ ບໍ່ ໄດ້ໂຍກຍ້າຍ ເພາະວ່າ ມັນເປັນໄຟຟ້າແສງຕາເວັນ ອັນນຶ່ງ ມັນກະຢູ່ຫ່າງຈາກຊຸມຊົນວ່າ ຊັ້ນສາ ມີແຕ່ຖືກຜົລກະທົບເລັກໜ້ອຍ ເປັນດິນສວນຂອງປະຊາຊົນນ່າ ເພາະວ່າ ດິນມັນບໍ່ມີໃບແຈ້ງ ສ່ວນຫຼາຍເຂົາຊົດເຊີຍ ຄ່າຜົລຜລິຕ ຄ່າແຮງງານ ຊິບໍ່ຫຼາຍດອກ ເຮັກຕ້ານຶ່ງກະຊິປະມານ 7-8 ລ້ານ ກິບ ປະມານນັ້ນແຫຼະ."
ຊາວບ້ານຜູ້ນີ້ ກ່າວຕື່ມວ່າ ເຖິງຈະສູນເສັຽທີ່ດິນກະສິກັມ ໄປຈຳນວນໜຶ່ງ ແຕ່ຊາວບ້ານ ທຸກຄອບຄົວ ກໍຍັງມີດິນພຽງພໍ ເພື່ອຜລິຕກະສິກັມ ແລະ ໂຄງການພັທນາດັ່ງກ່າວ ກໍບໍ່ໄດ້ສົ່ງຜົລກະທົບ ຮຸນແຮງຕໍ່ສິ່ງແວດລ້ອມ ແລະ ສັງຄົມ ຈຶ່ງເຮັດໃຫ້ຊາວບ້ານຍອມຮັບ ໂຄງການພັທນາດັ່ງກ່າວ.
ຖ້າໂຄງການໄຟຟ້າແສງຕາເວັນ ພັທນາສຳເຣັດ ໃນອະນາຄົຕ ໂຄງການດັ່ງກ່າວ ຈະຊ່ວຍສົ່ງເສີມ ແລະ ພັທນາເສຖກິຈ ການຄ້າຂາຍ ຢູ່ໃນບ້ານຫາດຊັນ ແລະ ເມືອງໄຊເສດຖາ ເປັນຢ່າງດີ.
ຊາວບ້ານເຫັນວ່າ ໂຄງການຄວນສ້າງວຽກເຮັດງານທຳ ໃຫ້ຊາວບ້ານໃນພື້ນ ແລະ ໃຫ້ເຂົາເຈົ້າຈະມີສ່ວນຮ່ວມ.
ຊາວບ້ານອີກຄົນນຶ່ງ ຢູ່ເມືອງໄຊເສດຖາ ໄດ້ກ່າວໃນວັນທີ 25 ສິງຫາ ວ່າ:
" ກໍ ລະນີ ການມີສ່ວຮ່ວມຂອງປະຊາຊົນນີ້ ຕ້ອງໄດ້ມີສ່ວນຮ່ວມແນວໃດ ມີຣາຍຮັບແນວໃດ ຫຼືວ່າ ຈັດສັນອາຊີບ ເຂົາເອີ້ນພັທນາທ້ອງຖິ່ນຫັ້ນນ່າ, ຖ້າວ່າ ເຮົາຈະບໍ່ມີການປະກອບສ່ວນ ອີ່ຫຍັງຫັ້ນກະບໍ່ເປັນ."
ກ່ຽວກັບເຣື່ອງນີ້ ເຈົ້າໜ້າທີ່ຜແນກຊັບພະຍາກອນທັມມະຊາຕ ແລະ ສິ່ງແວດລ້ອມ ແຂວງ ອັດຕະປື ກ່າວວ່າ ການສຳຣວດ ແລະ ສຶກສາຄວາມເປັນໄປໄດ້ ຂອງໂຄງການໄຟຟ້າແສງຕາເວັນ ເຊິ່ງມີເນື້ອທີ່ດິນສັມປະທານ ປະມານ 100 ປາຍເຮັກຕ້າຣ໌ ສ່ວນໃຫຍ່ ຈະເປັນດິນຂອງຣັຖ ແລະ ມີທີ່ດິນຂອງຊາວບ້ານຫາດຊັນ ຈຳນວນນຶ່ງ, ແຕ່ ບໍ່ມີການໂຍກຍ້າຍຊາວບ້ານ ອອກຈາກພື້ນທີ່.
ສ່ວນການຈ່າຍຄ່າຊົດເຊີຍ ໃຫ້ກັບຊາວບ້ານ ທີ່ຖືກຜົລກະທົບນັ້ນ ກໍເປັນໄປຕາມດຳຣັຖ ຂອງທາງການລາວ ເຊິ່ງຊາວບ້ານ ບໍ່ມີໃບຕາດິນຖາວອນ ກໍຈະບໍ່ໄດ້ຮັບເງິນຊົດເຊີຍ ແຕ່ໂຄງການ ກໍຈະຈ່າຍເງິນຊົດເຊີຍ ໃນສ່ວນຂອງ ຜົລປູກ, ຄ່າແຮງງານ ແລະ ສິ່ງປຸກສ້າງ ເຊິ່ງຈະຄິດຄ່າເສັຽຫາຍເປັນເວລາ 3 ປີ.
ເຈົ້າໜ້າທີ່ ຜແນກຊັບພະຍາກອນທັມມະຊາຕ ແລະ ສິ່ງແວດລ້ອມ ແຂວງອັດຕະປື ກ່າວຕໍ່ເອເຊັຽເສຣີ ໃນວັນທີ 25 ສິງຫາ ວ່າ:
" ໂຕນີ້ ບໍ່ ມີໆ [ຜົລກະທົບ] ມີແຕ່ສ່ວນຫຼາຍມັນດິນກະສິກັມ ເອີ… ແລ້ວກະປ່າໄມ້ຈຳນວນນຶ່ງ ບໍ່ມີການໂຍກຍ້າຍດອກ ບໍ່ໄດ້ກະທົບຫຼາຍນ່າ ອັນນີ້ນິ ບໍ່ແມ່ນເຂື່ອນພລັງງານ ນຳມັນເປັນມິຕກັບສິ່ງແວດລ້ອມ ແລ້ວກະກັບສັງຄົມນີ້ແຫຼະ."
ການພັທນາ ພລັງງານທົດແທນ ທັງພລັງງານແສງຕາເວັນ ແລະ ພລັງງານລົມ ເປັນ ພລັງງານທາງເລືອກ ຂອງຫຼາຍປະເທດ ທີ່ພະຍາຍາມຈະຫຼຸດຜ່ອນຜົລກະທົບ ຕໍ່ສິ່ງແວດລ້ອມ-ສັງຄົມ ແລະ ປ້ອງກັນການປ່ຽນແປງຂອງສະພາບດິນຟ້າອາກາດ ໃນໄລຍະຍາວ.
ເຈົ້າໜ້າທີ່ຜແນກພລັງງານ ແລະ ບໍ່ແຮ່ ແຂວງອັດຕະປື ໄດ້ກ່າວໃນວັນທີ 25 ສິງຫາ ວ່າ:
“ຊິໄຄກວ່າສ້າງເຂື່ອນດອກ ເພາະວ່າ ມັນບໍ່ໄດ້ໃຊ້ແນວອື່ນ ເປັນຕາລົງທຶນຢູ່ ຄັນທຶນຫັ້ນນ່າ ຄັນວ່າບໍ່ໄດ້ມີຜົລກະທົບ ກະເຮົາລົງທຶນບໍ່ຫຼາຍ ຄັນບໍ່ມີການໂຍກຍ້າຍປະຊາຊົນນີ້ແຫຼະ ຕົ້ນທຶນກະຕໍ່າ.”
ໂຄງການໄຟຟ້າແສງຕາເວັນ ມີກຳລັງການຜລິດ 64 ເມກາວັນ ເຣີ່ມສຳຣວດ ແລະ ສຶກສາຄວາມເປັນໄປໄດ້ ມາແຕ່ປີ 2014 ແລະ ເຣີ່ມກໍ່ສ້າງໂຄງການ ນັບແຕ່ວັນທີ 12 ສິງຫາ 2022 ເປັນຕົ້ນໄປ ແລະ ມີກຳນົດການຈະສໍາເຣັດໃນປ້າຍປີ 2023 ລວມໄລຍະເວລາ 18 ເດືອນ ສ່ວນວ່າ ສັນຍາສຳປະທານ ທາງການລາວ ແລະ ເຈົ້າຂອງໂຄງການ ຈະມີການເຈຣະຈາກັນ.
ໂຄງການໄຟຟ້າແສງຕາວັນ ມີມູນຄ່າການລົງທຶນເກືອບ 70 ລ້ານ ໂດລາ ຈະຜລິຕໄຟຟ້າຢູ່ທີ່ 128 ກິກະວັດໂມງ ຕໍ່ປີ ແລະ ຈະຂາຍໄຟຟ້າໃຫ້ຣັຖວິສາຫະກິຈໄຟຟ້າລາວ.