ສນາມບິນ ຂ.ຊຽງຂວາງ ຈະເລີ້ມແລ້ວ

• 
  2014-01-20

ເຈົ້າຫນ້າທີ່ທ່ານນື່ງ ກ່າວວ່າ ໂຄງການສ້າງສນາມບິນ ແຂວງຊຽງຂວາງ ໃນເຂດທົ່ງໃຫຫີນ ທີ່ໄດ້ວາງແຜນມາດົນແລ້ວນັ້ນຈະເລີ້ມ ລົງມືສ້າງໃນປີນີ້ ໂດຍຈະໃຊ້ທຶນ ກໍ່ສ້າງທັງຫມົດ 80 ລ້ານໂດລາ ຈະຢຶມເງີນ ຈາກ ທະນາຄານຈີນ ດັ່ງທ່ານກ່າວວ່າ:

"ກະບໍຮູ້ລະອຽດ ແຕ່ວ່າໃນປີ 2014 ນີ້ ຂະເຈົ້າສຳຫຣວດອອກແບບແລ້ວ ມີແຕ່ເດືອນສອງ ນີ້ຫນະຜ່ານມາແບບໃນເບື້ອງຕົ້ນ ຄາດ ຄະເນປະມານ 80 ລ້ານໂດລາ ຢຶມເງີນກູ້ຂອງຈີນ".

ທ່ານກ່າວຕື່ມວ່າ ໂຄງການນີ້ເມື່ອສ້າງແລ້ວ ກໍຈະມີບໍຣິສັດຈີນເຂົ້າມາສຳປະທານ ເພາະ ເປັນເງີນກູ້ຈາກຈີນ ສຳລັບວັນເວລາ ທີ່ຈະ ລົງມືກໍ່ສ້າງນັ້ນ ຍັງບໍ່ຮູ້ວ່າຈະເປັນຕົ້ນປີ ຫລືກາງປີ ອາດຈະໃຊ້ເວລາໃນການກໍສ້າງ 3 ປີ ເປັນຢ່າງນ້ອຍ.

ໃນເດືອນຕຸລາຜ່ານມາ ໄດ້ຍີນວ່າ ຜູ້ລັບເຫມົາກໍສ້າງໂຄງການດັ່ງກ່າວ ຈະເປັນ ບໍຣິສັດພົງຊັບທະວີ ກໍ່ສ້າງຂົວທາງ ຂອງລາວ ໃນ ເນື້ອທີ່ປະມານ 300 ເຮັກຕາ ສ່ວນໃຫຍ່ເປັນດີນຂອງຣັຖ ແລະມີບາງສ່ວນກວມເອົາດິນ ຊາວບ້ານຫນ້ອຍນື່ງ ແຕ່ກໍບໍ່ມີບັນຫາຫລາຍ ໃນການໂຍກຍ້າຍຍ້ອນວ່າ ບ້ານ ເຮືອນຂອງປະຊາຊົນນັ້ນ ເປັນເຮືອນສ້າງແບບຊົ່ວຄາວ.

ເຈົ້າຫນ້າທີ່ອີກທ່ານນື່ງເວົ້າວ່າ ເມື່ອສນາມບິນນີ້ສ້າງສຳເຣັດ ກໍຈະສາມາດ ຮອງຮັບເຮືອບິນຂນາດໃຫຍ່ໄດ້ດັ່ງ:ໂບອີງ ແລະກໍຈະສາ ມາດຮອງຮັບ ນັກທ່ອງທ່ຽວຕ່າງຊາດ ຜູ້ທີ່ຈະເຂົ້າມາ ທ່ຽວຊົມ ມໍຣະດົກໂລກ ທົ່ງໃຫຫີນ ໃນອະນາຄົດ ທາງການຄາດວ່າ ຈະມີນັກ ທ່ອງທ່ຽວ ເຂົ້າມາທ່ຽວ ແຂວງຊຽງຂວາງ ເພີ້ມຂື້ນ 1 ແສນຄົນ ໃນແຕ່ລະປີ ຈາກ ໃນປັດຈຸບັນ 80 ພັນ ຄົນ.